നദാല്‍ രാജാവ‌്

പാരീസ‌്
കളിമണ്‍ കോര്‍ട്ടില്‍ റാഫേല്‍ നദാലിന‌് എതിരാളികളില്ല. ഫ്രഞ്ച‌് ഓപ്പണ്‍ ടെന്നീസില്‍ നദാലിന‌് തുര്‍ച്ചയായി മൂന്നാം കിരീടം. റൊളാങ്ഗാരോയിലെ ഫൈനലില്‍ ഓസ‌്ട്രിയയുടെ ഡൊമനിക‌് തീമിനെ ഒന്നിനെതിരെ മൂന്ന‌് സെറ്റുകള്‍ക്ക‌് പരാജയപ്പെടുത്തി. മൂന്ന്‌ മണിക്കൂര്‍ നീണ്ട കലാശ പോരാട്ടത്തില്‍ 6--3, 5--7, 6--1, 6-1 നായിരുന്നു വിജയം. ഈ മുപ്പത്തിമൂന്നുകാരന്റെ 18--ാം ഗ്രാന്റ‌്സ്ലാം കിരീടമാണിത‌്. അതില്‍ പന്ത്രണ്ടാം ഫ്രഞ്ച‌് ഓപ്പണ്‍ കിരീടം. ആദ്യ സെറ്റ‌് നദാല്‍ അനായാസം നേടിയപ്പോള്‍ രണ്ടാം സെറ്റില്‍ കടുത്ത മത്സരവുമായി തീം തിരിച്ചുവന്നു. എന്നാല്‍ ആ വീറ‌് അടുത്ത രണ്ട‌് സെറ്റിലും തുടരാനായില്ല. ഒടുവില്‍ കഴിഞ്ഞ വര്‍ഷത്തേതിന്റെ ആവര്‍ത്തനമായി നദാല്‍ ജയിച്ചുകയറി. പുരുഷ ഡബിള്‍സ‌് കിരീടം ജര്‍മന്‍ സഖ്യം നേടി. കെവിന്‍ ക്രവിറ്റ‌്സ‌്--ആന്ദ്രേമിയസ‌് കൂട്ടുകെട്ട‌് ഫ്രഞ്ച‌് സഖ്യമായ ജെര്‍മി ചാര്‍ഡി--ഫാബ്രിസ‌് മാര്‍ട്ടിന്‍ കൂട്ടുകെട്ടിനെ 6--2, 7--6ന‌് തോല്‍പ്പിച്ചു. വനിതാ ഡബിള്‍സില്‍ ഹംഗറിയുടെ തിമിയ ബാബോസ‌്--ഫ്രഞ്ചുകാരി ക്രിസ‌്റ്റീന മ്ലാഡെനൊവിച്ച‌് സഖ്യം കിരീടം ചൂടി. ഫൈനലില്‍ ചൈനക്കാരായ ദുയാന്‍ യിങ്കിങ്--സെങ് സായിസായിയെ 6--2, 6--3ന‌് തോല്‍പ്പിച്ചു. മിക‌്സഡ‌് ഡബിള്‍സില്‍ ക്രൊയേഷ്യയുടെ ഇവാന്‍ ഡോഡിഗും തായ‌്‌വാന്റെ ലതീഷ ചാനും ചേര്‍ന്ന‌് കിരീടം സ്വന്തമാക്കി.