ഒമിക്രോണ്‍ ഭീതിയില്‍ നിന്നും കരകയറി ദക്ഷിണാഫ്രിക്ക; നാലാം തരംഗത്തിന്‍റെ തീവ്രത കുറയുകയാണെന്ന്​ സര്‍ക്കാര്‍

ജോഹന്നാസ്​ബര്‍ഗ്​: കോവിഡിന്‍റെ ഒമിക്രോണ്‍ വകഭേദം സൃഷ്ടിക്കുന്ന ഭീതിയില്‍ നിന്നും കരകയറി ദക്ഷിണാഫ്രിക്ക.കോവിഡിന്‍റെ നാലാം തരംഗത്തിന്‍റെ തീവ്രത കുറയുകയാണെന്ന്​ ദക്ഷിണാഫ്രിക്കന്‍ സര്‍ക്കാര്‍ അറിയിച്ചു. ഒമിക്രോണ്‍ ബാധിച്ച്‌​ ആശുപത്രിയില്‍ പ്രവേശിപ്പിക്കപ്പെടുന്നവരുടെ എണ്ണം താരതമ്യേന കുറവാണെന്നും അധികൃതര്‍ വ്യക്​തമാക്കി.

കോവിഡിന്‍റെ ഒമിക്രോണ്‍, ഡെല്‍റ്റ വകഭേദങ്ങള്‍ കോവിഡ്​ സുനാമിക്ക്​ കാരണമാകുമെന്ന്​ ലോകാരോഗ്യസംഘടന മുന്നറിയിപ്പ്​ നല്‍കിയിരുന്നു. ഇതിന്​ പിന്നാലെയാണ്​ ദക്ഷിണാഫ്രിക്കന്‍ സര്‍ക്കാറിന്‍റെ അറിയിപ്പ്​.ദക്ഷിണാഫ്രിക്ക കഴിഞ്ഞ ദിവസം പുറത്തിറക്കിയ പ്രസ്താവന പ്രകാരം ​കോവിഡ്​ ബാധിച്ച്‌​ ആശുപത്രികളില്‍ പ്രവേശിക്കപ്പെടുന്നവരുടെ എണ്ണം എല്ലാ പ്രവിശ്യകളിലും കുറയുകയാണ്​. ​ഡിസംബര്‍ 25ന്​ അവസാനിച്ച ആഴ്ചയില്‍ ദക്ഷിണാഫ്രിക്കയിലെ കോവിഡ്​ രോഗികളുടെ എണ്ണം 89,781 ആയിരുന്നു. ഒരാഴ്ച മുമ്ബ്​ രോഗികളുടെ എണ്ണം 127,753 ആണ്​.

രോഗികളുടെ എണ്ണം കുറഞ്ഞതോടെ നിയന്ത്രണങ്ങളില്‍ ദക്ഷിണാഫ്രിക്ക ഇളവ്​ വരുത്തിയിട്ടുണ്ട്​. രാത്രി കര്‍ഫ്യു ഉള്‍പ്പടെയുള്ള നിയന്ത്രണങ്ങളിലാണ്​ ഇളവ്​. ജനങ്ങള്‍ വാക്സിന്‍ സ്വീകരിക്കുകയും മാസ്ക്​ ധരിക്കുകയും ചെയ്യണമെന്ന്​ അധികൃതര്‍ അഭ്യര്‍ഥിച്ചു.