ബമാകോ: ആഫ്രിക്കന്‍ രാജ്യമായ മാലിയില്‍ മാസങ്ങള്‍ക്കിടെ വീണ്ടും പട്ടാള അട്ടിമറിയെന്ന്​ സംശയം. പ്രസിഡന്‍റ്​, പ്രധാനമന്ത്രി, പ്രതിരോധ മന്ത്രി എന്നിവരെ സൈന്യം അറസ്​റ്റ്​ ചെയ്​തു. പ്രധാനമന്ത്രി ബാഹ്​ എന്‍ഡാവ്​, പ്രധാനമന്ത്രി മുക്​താര്‍ ഔന്‍, പ്രതിരോധ മന്ത്രി സുലൈമാന്‍ ദുകോര്‍ എന്നിവരെ തലസ്​ഥാന നഗരമായ ബമാക്കോക്കു സമീപം കാറ്റിയിലെ സൈനിക താവളത്തിലേക്ക്​ മാറ്റി. കഴിഞ്ഞ ആഗസ്​റ്റില്‍ പ്രസിഡന്‍റ്​ ഇബ്രാഹിം ബൂബക്കര്‍ കീറ്റയെ സമാനമായി സൈന്യം അറസ്​റ്റ്​ ചെയ്​തിരുന്നു.

കഴിഞ്ഞ ദിവസം സര്‍ക്കാര്‍ നടത്തിയ പുനഃസംഘടനയില്‍, പട്ടാള അട്ടിമറിയില്‍ പങ്കാളികളായ രണ്ട്​ സൈനിക പ്രമുഖര്‍ക്ക്​ സ്​ഥാനം നഷ്​ടമായതിനു പിന്നാലെയാണ്​ ഇടപെടല്‍.

രാഷ്​ട്രീയ അസ്​ഥിരതയും സൈനികര്‍ക്കിടയിലെ പോരും രാജ്യത്ത്​ ജനജീവിതം കടുത്ത പ്രതിസന്ധിയിലാക്കുന്നത്​ തുടരുകയാണ്​. വിദേശ ഇടപെടലുകളും ഇതുവരെ ഫലം ചെയ്​തിട്ടില്ല. ഐ.എസ്​, അല്‍ഖാഇദ പോലുള്ള ​ഭീകര സംഘടനകള്‍ രാജ്യത്തി​െന്‍റ ഒരു ഭാഗം നിയന്ത്രണത്തിലാക്കിയതും ഭീഷണിയാണ്​.

ഭരണ മേധാവികളെ അടിയന്തരമായി വിട്ടയക്കണമെന്ന്​ മാലിയിലെ യു.എന്‍ മിഷന്‍ ആവശ്യപ്പെട്ടു. മേഖലയിലെ വിഷയങ്ങള്‍ പരിഹരിക്കാനായി രൂപം നല്‍കിയ പശ്​ചിമ ആഫ്രിക്കന്‍ രാജ്യങ്ങളുടെ കൂട്ടായ്​മയിലെ ഒരു സംഘം ബമാകോയിലേക്ക്​ തിരിച്ചിട്ടുണ്ട്​. യു.എന്‍, ആഫ്രിക്കന്‍ യൂനിയന്‍, യൂറോപ്യന്‍ യൂനിയന്‍ എന്നിവയും വിഷയം ഗൗരവത്തോടെയാണ്​ കാണുന്നത്​.

സൈനിക ഭരണത്തിലായിരുന്ന രാജ്യത്തെ തിരികെ സിവിലിയന്‍ ഭരണത്തിലേക്ക്​ എത്തിക്കുകയെന്ന ദൗത്യവുമായാണ്​ എന്‍ഡാവും ഔനും ഭരണമേറിയിരുന്നത്​. ഇരുവരും സൈനിക നിയന്ത്രണത്തില്‍നിന്ന്​ പതിയെ രാജ്യത്തെ മോചിപ്പിക്കാന്‍ നടത്തിയ നീക്കങ്ങളാണ്​ വീണ്ടും പട്ടാള അട്ടിമറിയിലേക്ക്​ കാര്യങ്ങള്‍ എത്തിച്ചതെന്നാണ്​ സൂചന. എന്നാല്‍, അട്ടിമറി നടന്നിട്ടില്ലെന്നും പുതിയ പുനഃസംഘടന ശരിയായില്ലെന്ന്​ ബോധ്യപ്പെടുത്തല്‍ മാത്രമാണ്​ അറസ്​റ്റിനു പിന്നിലെന്ന​ും സൈനിക പ്രതിനിധി അറിയിച്ചു.

അ​തേ സമയം, മുമ്ബും ഇതേ കേന്ദ്രത്തിലെത്തിച്ചാണ്​ നേതാക്കളെ സൈന്യം പുറത്താക്കിയിരുന്നത്​. മുന്‍ഗാമിയായ പ്രസിഡന്‍റ്​ കീറ്റയെയും ഇ​വിടെയെത്തിച്ചിരുന്നു.