ലൈംഗികാ​ക്രമണങ്ങളുടെ ഉത്തരവാദിത്വം പെണ്‍കുട്ടികള്‍ക്ക്​; വിവാദ സര്‍ക്കുലര്‍ തിരുത്തി ജെ.എന്‍.യു

ന്യൂഡല്‍ഹി: പെണ്‍കുട്ടികളുടെ സുരക്ഷയുമായി ബന്ധപ്പെട്ട വിവാദ സര്‍ക്കുലര്‍ തിരുത്തി ജവഹര്‍ ലാല്‍ നെഹ്​റു സര്‍വകലാശാല. 'ലൈംഗികാക്രമണം ഒഴിവാക്കാന്‍ പെണ്‍കുട്ടികള്‍ പുരുഷ സുഹൃത്തുക്കള്‍ക്കിടയില്‍ ഒരു രേഖ വരയ്ക്കുന്നത്​ എങ്ങനെയെന്ന്​ അറിഞ്ഞിരിക്കണം' എന്ന പരാമര്‍ശമാണ്​ സര്‍ക്കുലറില്‍ തിരുത്തിയത്​.

ജനുവരി 17ന്​ നടക്കാനിരിക്കുന്ന ലൈംഗികാ​ക്രമണവുമായി ബന്ധപ്പെട്ട കൗണ്‍സലിങ്​ സെഷനെക്കുറിച്ച്‌​ വിദ്യാര്‍ഥികളെ അറിയിച്ചുകൊണ്ടുള്ളതായിരുന്നു​ സര്‍ക്കുലര്‍. സര്‍വകലാശാലയുടെ ഇന്‍റേണല്‍ കംപ്ലയിന്‍റ്​ കമ്മിറ്റിയാണ്​ സര്‍ക്കുലര്‍ പുറത്തിറക്കിയത്​. വെബ്​സൈറ്റിലും ഇവ പ്രസിദ്ധീകരിച്ചിരുന്നു.ലൈംഗികാക്രമണ സംഭവങ്ങളില്‍ ഉത്തരവാദിത്തം പെണ്‍കുട്ടികള്‍ക്ക്​ തന്നെയാണെന്ന സര്‍ക്കുലര്‍ ഏറെ പ്രതിഷേധങ്ങള്‍ക്ക്​ ഇടയാക്കിയിരുന്നു.

'അടുത്ത സുഹൃത്തുക്കള്‍ ലൈംഗികാതിക്രമം നടത്തുന്നതായ ഒട്ടേറെ പരാതികള്‍ സമിതിക്ക്​ ലഭിക്കാറുണ്ട്​. ആണ്‍കുട്ടികള്‍ പലപ്പോഴും സൗഹൃദത്തിന്‍റെ അതിര്‍വരമ്ബ്​ ലംഘിക്കാറുള്ളതായി കാണുന്നു. അതുകൊണ്ട്​ ഇത്തരം അതിക്രമങ്ങള്‍ക്ക്​ ഇരയാകാതിരിക്കാന്‍ ആണ്‍സൗഹൃദങ്ങള്‍ക്കിടയില്‍ വ്യക്തമായ അതിര്‍വരമ്ബ്​ ​വരക്കേണ്ടത്​​ എവിടെയാണെന്ന്​ പെണ്‍കുട്ടികള്‍ മനസ്സിലാക്കേണ്ടതുണ്ട്​' -സര്‍ക്കുലര്‍ വിവരിക്കുന്നു. ഇതില്‍ തിരുത്തല്‍ വരുത്തിയാണ്​ പുതിയ സര്‍ക്കുലര്‍ ഇറക്കിയിരിക്കുന്നത്​.'ലൈംഗികാ​ക്രമണമായി കണക്കാക്കുന്ന സൗഹൃദവും പെരുമാറ്റവും സംബന്ധിച്ച്‌​ ആണ്‍കുട്ടികളെ ബോധവല്‍ക്കരിക്കും. ലൈംഗികാക്രമണങ്ങള്‍ എങ്ങനെ ഒഴിവാക്കാമെന്ന്​ പെണ്‍കുട്ടികളെയും ബോധവല്‍ക്കരിക്കും' -പുതിയ സര്‍ക്കുലറില്‍ പറയുന്നു.

ലൈംഗികാക്രമണത്തിന്​ വിധേയമാകുന്നവരെ അധിക്ഷേപിക്കുന്നതാണ്​ സര്‍വകലാശാലയുടെ സര്‍ക്കുലര്‍ എന്ന്​ ചൂണ്ടിക്കാട്ടി പ്രതിഷേധവുമായി വിദ്യാര്‍ഥി യൂണിയനുകള്‍ അടക്കം രംഗത്തെത്തിയിരുന്നു. കൂടാതെ ദേശീയ വനിത കമ്മീഷന്‍ സര്‍ക്കുലര്‍ സ്ത്രീവിരുദ്ധമാണെന്നും പിന്‍വലിക്കണമെന്നും ആവശ്യപ്പെട്ടിരുന്നു. തങ്ങളുടെ ആണ്‍സുഹൃത്തുക്കളുമായുള്ള സൗഹൃദത്തിന്​ എവിടെയാണ്​ അതിര്‍വരമ്ബ്​ വേണ്ടതെന്ന്​ പെണ്‍കുട്ടികള്‍ മനസ്സിലാക്കണം എന്ന്​ ആവശ്യപ്പെടുന്ന സര്‍ക്കുലര്‍ സ്ത്രീവിരുദ്ധമാണെന്ന്​ വനിത കമീഷന്‍ അധ്യക്ഷ രേഖ ശര്‍മ ആരോപിച്ചു.