കേന്ദ്ര, സംസ്​ഥാന സര്‍ക്കാര്‍ നയങ്ങള്‍ക്കെതിരെ അമേത്തിയില്‍ പദയാത്രയുമായി രാഹുല്‍ ഗാന്ധി

അമേത്തി: രണ്ടരവര്‍ഷത്തിന്​ ശേഷം ഉത്തര്‍പ്രദേശിലെ അമേത്തിയിലെത്തി കോണ്‍ഗ്രസ്​ നേതാവ്​ രാഹുല്‍ ഗാന്ധി. കേന്ദ്ര, സംസ്​ഥാന സര്‍ക്കാര്‍ നയങ്ങള്‍ക്കെതിരെ രാഹുലിന്‍റെ നേതൃത്വത്തില്‍ ശനിയാഴ്ച പദയാത്ര സംഘടിപ്പിക്കും.

കോണ്‍ഗ്രസ്​ ജനറല്‍ സെക്രട്ടറിയും യു.പിയുടെ ചുമതലയുള്ള നേതാവുമായ പ്രിയങ്ക ഗാന്ധിയും പദയാത്രയില്‍ പ​െങ്കടുക്കും.

തെരഞ്ഞെടുപ്പ്​ ഒരുക്കങ്ങളുടെ മുന്നോടിയായാണ്​ കോണ്‍ഗ്രസിന്‍റെ മുതിര്‍ന്ന നേതാക്കള്‍ അണിനിരക്കുന്ന പദയാത്ര. കേന്ദ്രസര്‍ക്കാറിനെതിരെ രാജസ്​ഥാനില്‍ വന്‍ റാലി നടത്തിയതിന്​ പിന്നാലെയാണ്​ യു.പിയില്‍ കോണ്‍ഗ്രസിന്‍റെ ആറുകിലോമീറ്റര്‍ പദയാത്ര.

അമേത്തിയില്‍നിന്ന്​ മൂന്നുതവണ ലോക്​സഭയിലേക്ക്​ തെരഞ്ഞെടുക്കപ്പെട്ട വ്യക്തിയാണ്​ രാഹുല്‍ ഗാന്ധി. എന്നാല്‍ 2019ലെ തെരഞ്ഞെടുപ്പില്‍ പരാജയപ്പെട്ടു. ബി.ജെ.പിയുടെ സ്​മൃതി ഇറാനിയോട്​ 50,000 വോട്ടുകള്‍ക്കാണ്​ രാഹുല്‍ ഗാന്ധി പരാജയപ്പെട്ടത്​. 2019 ജൂലൈ 10നായിരുന്നു രാഹുലിന്‍റെ അവസാന അമേത്തി സന്ദര്‍ശനം. തെരഞ്ഞെടുപ്പ്​ തോല്‍വി വിലയിരുത്തുന്നതിനായിരുന്നു ഇത്​.

അടുത്തവര്‍ഷം നടക്കാനിരിക്കുന്ന യു.പി നിയമസഭ തെരഞ്ഞെടുപ്പില്‍ അനുകൂല ഫലമുണ്ടാകുമെന്നാണ്​ കോണ്‍​ഗ്രസിന്‍റെ വിലയിരുത്തല്‍. പ്രിയങ്ക ഗാന്ധിയുടെ നേതൃത്വത്തിലാണ്​ കോണ്‍ഗ്രസിന്‍റെ യു.പിയിലെ തെരഞ്ഞെടുപ്പ്​ പ്രവര്‍ത്തനം.