ചെന്നൈ: ദേശീയ മെഡിക്കല്‍ പ്രവേശന പരീക്ഷയായ നാഷനല്‍ ​എലിജിബിലിറ്റി കം എന്‍ട്രന്‍സ്​ ടെസ്​റ്റിന്​ (നീറ്റ്​ പരീക്ഷ) എതിരായ ബില്‍ തമിഴ്​നാട്​ നിയമസഭയില്‍ അവതരിപ്പിച്ചു. മുഖ്യമന്ത്രി എം.കെ. സ്റ്റാലിനാണ്​ ബില്‍ അവതരിപ്പിച്ചത്​. പ്രതിപക്ഷം ബില്ലിനെ അനുകൂലിച്ചു. ഇതോടെ രാജ്യത്ത്​ നീറ്റ്​ പരീക്ഷക്കെതിരെ ആദ്യം രംഗത്തെത്തുന്ന സംസ്​ഥാനമാകും തമിഴ്​നാട്​.പ്ലസ്​ടു മാര്‍ക്കിന്‍റെ അടിസ്​ഥാനത്തില്‍ മെഡിക്കല്‍ കോഴ്​സിന്​ പ്രവേശനം ലഭ്യമാക്കണമെന്നാണ്​ ബില്ലിലെ ആവശ്യം. സാമൂഹിക നീതിയും തുല്യതയും ഉറപ്പാക്കുന്നതിനൊപ്പം എല്ലാവര്‍ക്കും അവസരം നല്‍കി വിദ്യാര്‍ഥി സമൂഹങ്ങളെ വിവേചനങ്ങളില്‍നിന്ന്​ സംരക്ഷിക്കുമെന്നും സ്റ്റാലിന്‍ പറഞ്ഞു. സംസ്​ഥാന സിലബസില്‍ പഠിക്കുന്ന വിദ്യാര്‍ഥികള്‍ക്ക്​ കൂടി മെഡിക്കല്‍, ഡെന്‍റല്‍ കോഴ്​സുകളിലേക്ക്​ പ്രവേശനം അനുവദിക്കുന്നതിനാണ്​ നീക്കം.കഴിഞ്ഞദിവസം നീറ്റ്​ പരീക്ഷ പേടിയെ തുടര്‍ന്ന്​ ഒരു വിദ്യാര്‍ഥി കൂടി ആത്മഹത്യ ചെയ്​തിരുന്നു. ഇതാണ്​ ബില്‍ വേഗത്തിലാക്കാന്‍ തമിഴ്​നാടിനെ പ്രേരിപ്പിച്ചത്​. അധികാരത്തിലെത്തിയാല്‍ നീറ്റ്​ ഒഴിവാക്കുമെന്ന്​ ഡി.എം.കെ തെരഞ്ഞെടുപ്പ്​ വാഗ്​ദാനം നല്‍കിയിരുന്നു.

രാജ്യമെമ്പാടും ഒറ്റ പരീക്ഷയുടെ അടിസ്​ഥാനത്തില്‍ മെഡിക്കല്‍ പ്രവേശനം നടത്തുന്നതോടെ സര്‍ക്കാര്‍ സ്​കൂളില്‍ പഠിച്ചിറങ്ങുന്ന പാവപ്പെട്ട വിദ്യാര്‍ഥികള്‍ക്ക്​ ​പ്രവേശനം നിഷേധിക്കുന്നുവെന്ന്​ സ്റ്റാലിന്‍ പറഞ്ഞു. നീറ്റ്​ പരീക്ഷ വഴി സമൂഹത്തില്‍ പിന്നാക്കം നില്‍ക്കുന്നവര്‍ക്ക്​ മെഡിക്കല്‍ പ്രവേശനം നിഷേധിക്കപ്പെടുന്നുവെന്നും സ്റ്റാലിന്‍ കൂട്ടിച്ചേര്‍ത്തു.

സേലം മേട്ടൂര്‍ സ്വദേശി ധനുഷ്​ എന്ന 18കാരനെയാണ്​ കഴിഞ്ഞദിവസം ആത്മഹത്യചെയ്​ത നിലയില്‍ കണ്ടെത്തിയത്​. ധനുഷ്​ രണ്ടുതവണ നീറ്റ്​ പരീക്ഷ എഴുതിയിരുന്നെങ്കിലും ജയിക്കാനായിരുന്നില്ല. ഇത്തവണയും ജയിക്കാന്‍ കഴിയുമോ എന്ന പേടിയാണ്​ ആത്മഹത്യയിലേക്ക്​ എത്തിച്ചതെന്നും കുടുംബം പറഞ്ഞു. 2018ല്‍ അനിത എന്ന വിദ്യാര്‍ഥിനിയുടെ ആത്മഹത്യയും നീറ്റ്​ പരീക്ഷക്കെതിരായ വന്‍ പ്രക്ഷോഭങ്ങള്‍ക്ക്​ തുടക്കമിട്ടിരുന്നു. വിദ്യാര്‍ഥിയുടെ ആത്മഹത്യയോടെ à´ˆ രീതി അവസാനിപ്പിക്കണമെന്നും രാജ്യത്തെ മറ്റ്​ മുഖ്യമന്ത്രിമാരും ഇതിനെതിരെ രംഗത്തെത്തണമെന്നും സ്റ്റാലിന്‍ ആവശ്യപ്പെട്ടിരുന്നു.