സംസ്ഥാനത്ത് മൊത്തം കോവിഡ് കാരണം മരിച്ചവരില്‍ ഭൂരിഭാഗവും നേരത്തെ മറ്റസുഖങ്ങളുണ്ടായിരുന്നവരും കോവിഡ് കാരണം അവ ഗുരുതരമായവരുമാണ്. ഇതില്‍ 52 ശതമാനവും പ്രമേഹവും അമിതരക്ത സമ്മര്‍ദവുമെന്നാണ് കണക്കുകള്‍. അനുബന്ധ രോഗം ഗുരുതരമായി മരിച്ചവരില്‍ 26 ശതമാനത്തിന് പ്രമേഹവും ബാക്കി 26 ശതമാനത്തിന് അമിത രക്തസമ്മര്‍ദവും ഉണ്ടായിരുന്നു. 10 ശതമാനം ഹൃദ്രോഗികളാണ്.

വയനാട്, ഇടുക്കി, കോട്ടയം, പത്തനംതിട്ട ജില്ലകളിലാണ് മരണങ്ങളില്‍ ഈ അനുബന്ധ രോഗങ്ങളുടെ പങ്ക് കുറഞ്ഞ തോതിലുള്ളത്. ഇവ കോവിഡ് വ്യാപനവും ഏറ്റവും കുറഞ്ഞ ജില്ലകളാണ്. എന്നാല്‍ ഇവിടങ്ങളിലും മരണങ്ങളില്‍ പ്രധാന വില്ലന്‍ മേല്‍പ്പറഞ്ഞ രോഗങ്ങള്‍ തന്നെയാണ്. ഹോം ഐസോലേഷനില്‍ കഴിയുന്ന, മറ്റ് രോഗമുള്ളവര്‍ പെട്ടെന്ന് ചികിത്സ കേന്ദ്രങ്ങളിലേക്ക് മാറണമെന്നാണ് വീടുകളിലെ മരണമുയര്‍ന്നതോടെ സര്‍ക്കാര്‍ നല്‍കിയിരിക്കുന്ന നിര്‍ദേശം. ജീവിതശൈലീ രോഗങ്ങള്‍ വില്ലനാകുന്നുവെന്ന നേരത്തേ മുതലുള്ള മുന്നറിയിപ്പ് ശരിവെക്കുന്ന കണക്കുകളുടെ കൂടി പശ്ചാത്തലത്തിലാണ് ഹോം ഐസൊലേഷന്‍ നയത്തില്‍ തന്നെ സര്‍ക്കാര്‍ വരുത്തിയിരിക്കുന്ന കാതലായ മാറ്റം.