മലവെള്ളപ്പാച്ചില്‍; ഹിമാചലിലും കശ്മീരിലും 22 പേര്‍ മരിച്ചു

ഹിമാചല്‍പ്രദേശിലും കശ്മീരിലും മലവെള്ളപ്പാച്ചിലില്‍ 22 പേര്‍ മരിച്ചു. 30ലേറെ പേര്‍ക്ക്​ പരിക്കേറ്റു. ജലവൈദ്യുതി പദ്ധതിക്കും നിരവധി വീടുകള്‍ക്കും കേടുപാട്​ സംഭവിച്ചു. പ്രളയത്തില്‍ നാശനഷ്ടങ്ങളുണ്ടായ സംസ്ഥാനങ്ങള്‍ക്ക് വേണ്ട സഹായം നല്‍കുമെന്ന് പ്രധാനമന്ത്രി അറിയിച്ചു.
കശ്മീരിലെ കിശ്ത്വര്‍ ജില്ലയിലെ വിദൂര ഗ്രാമത്തിലാണ് മേഘവിസ്​ഫോടനവും അതിശക്തമായ കാറ്റും മഴയുമുണ്ടായത്. ലഡാക്കിലെ കാര്‍ഗിലിലും മഴ ശക്തമായി തുടരുകയാണ്. മണ്ണിടിച്ചിലില്‍ പലയിടത്തും റോഡുകള്‍​ ‌തകര്‍ന്നു. ഡല്‍ഹിയില്‍ നിന്നുള്ള വിനോദസഞ്ചാരിയും വൈദ്യുതി വകുപ്പ് ഉദ്യോഗസ്ഥനുള്‍പ്പെടെ കുളു ജില്ലയില്‍ 4 പേരെ കാണാതായി. ഉത്തരാഖണ്ഡിലും ശക്തമായ മണ്ണിടിച്ചില്‍ തുടരുകയാണ്. പ്രധാന റോഡുകളെല്ലാം അടച്ചു.നിരവധി ആളുകളെ മാറ്റിപ്പാര്‍പ്പിക്കുകയും ചെയ്തു. മഴ മാഹാരാഷ്ട്രയിലും ദുരന്തം വിതച്ചു. സംസ്​ഥാന ദുരന്തനിവാരണ സേനയും സൈന്യവും തിരച്ചില്‍ തുടരുകയാണ്​. രാഷ്ട്രപതി രാംനാഥ് ഗോവിന്ദ് ,പ്രധാനമന്ത്രി നരേന്ദ്രമോദി എന്നിവര്‍ മരിച്ചവര്‍ക്ക് അനുശോചനം രേഖപ്പെടുത്തി.സാധ്യമായ എല്ലാ സഹായങ്ങളും സംസ്ഥാനങ്ങള്‍ക്ക് നല്‍കുമെന്നും പ്രധാനമന്ത്രി വ്യക്തമാക്കി.