ട്രാക്​ടറോടിച്ച്‌​ പാര്‍ലമെന്‍റിലേക്ക്;​ കാര്‍ഷിക പ്രക്ഷോഭത്തിന്​ ഐക്യദാര്‍ഢ്യവുമായി രാഹുല്‍ ഗാന്ധി

ന്യൂ ഡല്‍ഹി: ഇടവേളക്കു ശേഷം കര്‍ഷക സംഘടനകള്‍ വീണ്ടും സജീവമായ പ്രക്ഷോഭത്തിന്​ കോണ്‍ഗ്രസ്​ നേതാവ്​ രാഹുല്‍ ഗാന്ധിയുടെ വേറിട്ട ഐക്യദാര്‍ഢ്യം. മൂന്ന്​ വിവാദ കാര്‍ഷിക നിയമങ്ങളും പിന്‍വലിക്കണമെന്ന ആവശ്യവുമായി ഡല്‍ഹി നഗരമധ്യത്തിലൂടെ ട്രാക്​ടറിലേറി യാത്ര ചെയ്​താണ്​ രാഹുല്‍ പാര്‍ലമെന്‍റിലെത്തിയത്​. പഞ്ചാബ്​, ഹരിയാന എന്നിവിടങ്ങളില്‍നിന്നുള്ള കോണ്‍ഗ്രസ്​ എം.പിമാരായ ദീപേന്ദര്‍ ഹൂഡ, രവ്​നീത്​ സിങ്​ ബിട്ടു, പ്രതാപ്​ സിങ്​ ബജ്​വ എന്നിവ​ര്‍ക്കൊപ്പമായിരുന്നു വിജയ്​ ചൗക്​ വഴി ട്രാക്​ടര്‍ യാത്ര.
എം.പിമാര്‍ 'കാര്‍ഷിക നിയമങ്ങള്‍ പിന്‍വലിക്കുക', 'കര്‍ഷക വിരുദ്ധ കരിനിയമങ്ങള്‍ പിന്‍വലിക്കുക' തുടങ്ങിയ പ്ലക്കാര്‍ഡുകള്‍ ഉയര്‍ത്തി. ട്രാക്​ടറിന്‍റെ മുന്നിലും ഇതേ ആവശ്യവുമായി കൂറ്റന്‍ ബാനര്‍ തൂക്കി. എന്‍95 മാസ്​കണിഞ്ഞ്​ ഡ്രൈവറുടെ സീറ്റിലിരുന്ന രാഹുല്‍ മറ്റു എം.പിമാരുമായി ആശയങ്ങള്‍ പങ്കുവെച്ചും ട്രാക്​ടര്‍ ഓടിച്ചുമായിരുന്നു യാത്ര. അടിച്ചമര്‍ത്തപ്പെട്ടവരുടെ ശബ്​ദങ്ങള്‍ പാര്‍ലമെന്‍റിലെത്തിക്കാനായിരുന്നു യാത്രയെന്ന്​ രാഹുല്‍ പിന്നീട്​ മാധ്യമ പ്രവര്‍ത്തകരോട്​ പറഞ്ഞു. കഴിഞ്ഞ ആഴ്ച ആരംഭിച്ച പാര്‍ലമെന്‍റ്​ വര്‍ഷകാല സമ്മേളനത്തില്‍ കാര്‍ഷിക വിഷയങ്ങള്‍ കടുത്ത പ്രതിഷേധത്തിനിടയാക്കിയിരുന്നു. കോവിഡ്​ മഹാമാരി കൈകാര്യം ചെയ്​തതിലെ വീഴ്ചകള്‍ക്കെതിരെയും പെഗസസ്​ ചാരപ്പണിക്കെതിരെയും പ്രതിഷേധക്കാര്‍ രംഗത്തെത്തി.