ഏഷ്യന്‍ സൂചനകളെ മറികടന്ന് ഓഹരി വിപണി നേട്ടത്തില്‍ മുന്നേറുന്നു

കൊറോണ വൈറസുമായി ബന്ധപ്പെട്ട വാര്‍ത്തകള്‍ നിക്ഷേപകരെ പ്രതിസന്ധിയിലാക്കുമ്ബോഴും ഏഷ്യന്‍ വിപണികളിലെ ദുര്‍ബലമായ സൂചനകള്‍ക്കിടയിലും ബെഞ്ച്മാര്‍ക്ക് സൂചികകള്‍ ഇന്ന് നേട്ടത്തില്‍ വ്യാപാരം ആരംഭിച്ചു. കൊറോണ വൈറസ് അണുബാധ മൂലം ലോകമെമ്ബാടുമുള്ള മരണ റിപ്പോര്‍ട്ടുകളാണ് നിക്ഷേപകരെ ആശങ്കപ്പെടുത്തുന്നത്. ജാപ്പനീസ് നിക്കി, ഹോങ്കോങ്ങിന്റെ ഹാംഗ്, കൊറിയന്‍ കോസ്പി എന്നിവയെല്ലാം ഇന്ന് ഇടിവ് രേഖപ്പെടുത്തിയപ്പോള്‍ ഡോവ് ഫ്യൂച്ചേഴ്സും താഴ്ന്ന ഓപ്പണിംഗിലേക്കാണ് വിരല്‍ ചൂണ്ടുന്നത്. എന്നാല്‍ ഇന്ത്യന്‍ ഓഹരി സൂചികകള്‍ മികച്ച തുടക്കം രേഖപ്പെടുത്തി. സെന്‍സെക്സ് ഇന്നലെ 167 പോയിന്‍റ് ഉയര്‍ന്നപ്പോള്‍ നിഫ്റ്റി 37 പോയിന്‍റ് ഉയര്‍ന്നിരുന്നു.ഇന്നലെ ശക്തമായ നേട്ടം കൈവരിച്ചത് ബാങ്കിംഗ് ഓഹരികള്‍ക്കായിരുന്നു. ഐടി ഓഹരികള്‍ക്ക് ചില നഷ്ടങ്ങള്‍ നേരിടാന്‍ തുടങ്ങി. ട്രേഡില്‍ ഏറ്റവും കൂടുതല്‍ നേട്ടമുണ്ടാക്കിയവരില്‍ ഇന്‍ഡസ്‌ഇന്‍ഡ് ബാങ്കും ഉള്‍പ്പെടുന്നു. മാസങ്ങളായി പിന്നിലായിരുന്നു ഇന്‍ഡസിന്‍ഡ് ബാങ്ക്. എന്നാല്‍ ഇന്നലത്തെ വ്യാപാരത്തില്‍ ഓഹരി വില ഉയര്‍ന്നു. ടെക് മഹീന്ദ്ര, ആക്സിസ് ബാങ്ക്, ഇന്‍ഫോസിസ് എന്നിവയാണ് വ്യാപാരത്തില്‍ നേട്ടമുണ്ടാക്കിയ മറ്റ് ഓഹരികള്‍. സീ എന്റര്‍‌ടൈന്‍‌മെന്റ്, ഗ്രാസിം, ജെ‌എസ്‌ഡബ്ല്യു സ്റ്റീല്‍, നെസ്‌ലെ എന്നീ ഓഹരികള്‍ ഇന്ന് നഷ്ടത്തിലാണ് വ്യാപാരം ആരംഭിച്ചിരിക്കുന്നത്. അതേസമയം, ഡോളറിനെതിരെ രൂപ ഇന്ന് 75.87 എന്ന നിലയിലാണ് തുറന്നത്. ബുധനാഴ്ച ഇത് 75.88 ആയിരുന്നു.