ഇറാനുമായി ചേര്‍ന്ന്​ അഫ്​ഗാനില്‍ ചുവടുറപ്പിക്കാന്‍ ചൈന

ബെയ്​ജിങ്​: ഇറാനു​മായി കൈകോര്‍ത്ത്​ അഫ്​ഗാനിസ്​താനില്‍ സ്വാധീനമുറപ്പിക്കാന്‍ ചൈന. ശനിയാഴ്​ച ഇറാന്‍ വിദേശകാര്യ മന്ത്രി ഹുസൈന്‍ അമീര്‍ അബ്​ദുല്ലാഹിയുമായി ചൈനീസ്​ വിദേശകാര്യ മന്ത്രി വാങ്​ യി ടെലിഫോണില്‍ സംസാരിച്ചിരുന്നു. താലിബാന്‍ സര്‍ക്കാര്‍ രൂപവത്​കരിക്കുന്നത്​ കാത്തിരിക്കുകയാണെന്ന്​ സംസാരത്തിനിടെ വാങ്​ അറിയിച്ചു.

അഫ്​ഗാന്‍ മണ്ണിലെ തീവ്രവാദപ്രസ്ഥാനങ്ങളെ വേരോടെ പിഴുതുമാറ്റാന്‍ താലിബാന്​ കഴിയുമെന്നും മറ്റു രാജ്യങ്ങളുമായി ഊഷ്​മള ബന്ധം കാത്തുസൂക്ഷിക്കാന്‍ കഴിയുമെന്നും പ്രതീക്ഷ അദ്ദേഹം പങ്കുവെച്ചു. അഫ്​ഗാനില്‍ നിലവിലെ ദാരുണാവസ്ഥയുടെ മൂലകാരണം യു.എസിന്റെ നിരുത്തരവാദിത്തമാണെന്ന്​ അബ്​ദുല്ലാഹി കുറ്റപ്പെടുത്തി. താലിബാന്‍ ഭരണം പിടിച്ച അഫ്​ഗാനില്‍ റഷ്യക്കു പാകിസ്​താനുമൊപ്പം എംബസി നിലനിര്‍ത്തിയ രാജ്യമാണ്​ ചൈന. അതേസമയം, താലിബാന്‍ സര്‍ക്കാറിന്​ തിരക്കിട്ട്​ അംഗീകാരം നല്‍കാനില്ലെന്നാണ്​ യു.എസും ബ്രിട്ടനും അറിയിച്ചത്​.

പഞ്ചശീര്‍ താഴ്​വരയില്‍ താലിബാനും പ്രതിരോധ സേനയും തമ്മില്‍ തുടരുന്ന പോരാട്ടത്തെയും സൂക്ഷ്​മമായി നിരീക്ഷിക്കുകയാണ്​ ബെയ്​ജിങ്​. യു.എസ്​ ഉപരോധത്തില്‍ തളര്‍ന്ന ഇറാന്‍​ ചൈനയുമായി അടുത്തകാലങ്ങളില്‍ ഊഷ്​മളബന്ധമാണ്​ പുലര്‍ത്തുന്നത്​. അടുത്തിടെയായി ചൈന ഇറാനിലെ നിക്ഷേപങ്ങളും വര്‍ധിപ്പിച്ചിരുന്നു. അയല്‍രാജ്യങ്ങളെന്ന നിലയില്‍ അഫ്​ഗാന്റെ  സമാധാനപരമായ നവീകരണത്തിന്​ മുഖ്യപങ്കുവഹിക്കുന്നതി​നായി ആശയവിനിമയം ശക്തിപ്പെടുത്തേണ്ടത്​ ഇറാന്റെയും ചൈനയുടെയും ആവശ്യമാണ്​.

അഫ്​ഗാനില്‍ തെരഞ്ഞെടുപ്പ്​ നടത്തണം -ഇറാന്‍

തെഹ്​റാന്‍: താലിബാന്‍ ഭരണം പിടിച്ച അഫ്​ഗാനിസ്​താനില്‍ സമാധാനം പുനഃസ്ഥാപിക്കാന്‍ തെരഞ്ഞെടുപ്പ്​ നടത്തണമെന്ന്​ ഇറാന്‍ പ്രസിഡന്‍റ്​ ഇബ്രാഹീം റഈസി. വോ​ട്ടെടുപ്പിലൂടെ എത്രയും വേഗം അഫ്​ഗാന്‍ ജനത അവരുടെ സര്‍ക്കാറിനെ തെരഞ്ഞെടുക്ക​ട്ടെ. അവിടെ ജനഹിതമനുസരിച്ചുള്ള സര്‍ക്കാര്‍ വര​ട്ടെ. അങ്ങനെയുള്ള സര്‍ക്കാറിന്​ എല്ലാ പിന്തുണയും നല്‍കുമെന്നും റഈസി പറഞ്ഞു.