അഫ്​ഗാനില്‍ കടുത്ത മനുഷ്യാവകാശ ലംഘനങ്ങള്‍ നടക്കുന്നതായി യു.എന്‍

ജനീവ: അഫ്​ഗാനില്‍ താലിബാന്‍ നിയന്ത്രണത്തിലാക്കിയ മേഖലകളില്‍ പൗരന്മാരെയും കീഴടങ്ങിയ സൈനികരെയും വധിക്കുന്നത്​ ഉള്‍പ്പെടെ നിരവധി മനുഷ്യാവകാശ ലംഘനങ്ങള്‍ നടക്കുന്നതായി​ വിശ്വസനീയ റിപ്പോര്‍ട്ടുകള്‍ ലഭിച്ചതായി യു.എന്‍ മനുഷ്യാവകാശ കമ്മീഷന്‍ മേധാവി മിഷേല്‍ ബാഷ്​ലറ്റ്​.

ഈ മേഖലകളില്‍ കടുത്ത നിയന്ത്രണങ്ങളാണ്​ സ്​ത്രീകള്‍ അനുഭവിക്കുന്നത്​. ഇക്കണക്കിനു പോയാല്‍ സ്​ത്രീകളോടുള്ള താലിബാ​െന്‍റ അടിച്ചമര്‍ത്തല്‍ നിയന്ത്രണരേഖ കടക്കും. സ്​ത്രീകളുടെ അവകാശങ്ങള്‍ മാനിക്കാന്‍ താലിബാന്‍ തയാറാകണം. മാത്രമല്ല, മേഖലകളില്‍നിന്ന്​ കുട്ടികളെ വ്യാപകമായി താലിബാന്‍ സേനാംഗങ്ങളാക്കുകയാണെന്നും റി​പ്പോര്‍ട്ടുണ്ട്​. പെണ്‍കുട്ടികളെ​ സ്​കൂളില്‍ പോകാന്‍ അനുവദിക്കുന്നില്ല. അഫ്​ഗാനിസ്​താനില്‍ താലിബാ​െന്‍റ ഭരണത്തെ കുറിച്ച്‌​ ആശങ്ക നിലനില്‍ക്കുന്ന സാഹചര്യത്തില്‍ മനുഷ്യാവകാശ ലംഘനങ്ങളെ കുറിച്ച്‌​​ മനുഷ്യാവകാശ കൗണ്‍സില്‍ അന്വേഷിക്കണമെന്നും അവര്‍ ആവശ്യപ്പെട്ടു.

താലിബാന്‍ പറയുന്നത്​ ഒന്നും ചെയ്യുന്നത്​ മറ്റൊന്നുമാകുന്ന സാഹചര്യത്തില്‍ എ​ത്രമാ​ത്രം മനുഷ്യാവകാശ ലംഘനങ്ങള്‍ അവി​െട നടക്കുന്നുണ്ടെന്ന്​ വ്യക്തമല്ല. 90കളില്‍ ​താലിബാന്‍ അധികാരത്തിലെത്തിയപ്പോള്‍, സ്​ത്രീകള്‍ക്ക്​ സ്വതന്ത്രമായി സഞ്ചരിക്കാന്‍ സാധിച്ചിരുന്നില്ല. രാജ്യത്ത്​ ടെലിവിഷനും സംഗീതവും നിരോധിച്ചിരുന്നു. മോഷണം നടത്തുന്നവരെ കൈകള്‍ ഛേദിക്കുകയും പരസ്യമായി കഴുവേറ്റുകയും ചെയ്​തിരുന്നു. ഇതേ ക്രൂരമായ ശിക്ഷാമുറകള്‍ വീണ്ടും ആവര്‍ത്തിക്കുമെന്ന ഭയപ്പാടിലാണ്​ ജനം കൂട്ടമായി പലായനം ചെയ്യുന്നത്​.

അതേസമയം, സ്​ത്രീകളുടെ അവകാശങ്ങള്‍ അടിച്ചമര്‍ത്തില്ലെന്ന്​ താലിബാന്‍ നേതാക്കള്‍ ഉറപ്പുനല്‍കിയിരുന്നു.