ഇസ്​ലാമാബാദ്​: രാജ്യത്തെ ലൈംഗികാതിക്രമ കേസുകളും സ്​ത്രീകളുടെ വസ്​ത്രധാരണവും തമ്മില്‍ ബന്ധപ്പെടുത്തിവിവാദ പരാമര്‍ശം നടത്തിയ പാകിസ്​താന്‍ പ്രധാനമന്ത്രി ഇമ്രാന്‍ ഖാനെതിരെ വന്‍ പ്രതിഷേധം. പ്രമുഖ അന്തര്‍ദേശീയ മാധ്യമത്തിന്​ നല്‍കിയ അഭിമുഖത്തിലായിരുന്നു ഇമ്രാന്‍ ഖാന്‍റെ വിവാദ പ്രസ്​താവന.

‘സ്​ത്രീകള്‍ കുറച്ചു വസ്​ത്രം മാത്രമാണ്​ ധരിച്ചിരിക്കുന്നതെങ്കില്‍, അത്​ പുരുഷന്‍മാരില്‍ സ്വാധീനം ചെലുത്തും. അല്ലെങ്കില്‍ അവര്‍ റോബോട്ട്​ ആയിരിക്കണം. ഇതൊരു സാമാന്യ ബുദ്ധി മാത്രമാണ്​’ -ഇമ്രാന്‍ ഖാന്‍ ഇത്തരത്തിലാണ് പ്രതികരിച്ചത് .

അതെ സമയം ഇമ്രാന്‍ ഖാന്‍റെ ഈ പ്രസ്​താവനക്കെതിരെ കടുത്ത പ്രതിഷേധമാണ്​ സമൂഹമാധ്യമങ്ങളില്‍ ഉയരുന്നത്​. നിരവധി പ്രതിപക്ഷ നേതാക്കളും മാധ്യമപ്രവര്‍ത്തകരും ​വിമര്‍ശനവുമായി രംഗ​​ത്തെത്തി.

അതെ സമയം ഇതിനുമുമ്ബും സമാന പ്രസ്​താവന ഇമ്രാന്‍ ഖാന്‍ നടത്തിയിരുന്നു. പാകിസ്​താനില്‍ ലൈംഗികാതിക്രമങ്ങള്‍ക്ക്​ കാരണം അശ്ലീലമാണെന്നായിരുന്നു മാസങ്ങള്‍ക്ക്​ മുമ്ബ്​ ഇമ്രാന്‍ ഖാന്‍ നടത്തിയ പ്രതികരണം. ‘പ്രലോഭനം ഒഴിവാക്കുകയെന്നതാണ്​ പര്‍ദയുടെ ആശയം. എന്നാല്‍ ഇതൊഴിവാക്കാനുള്ള ഇച്ഛാശക്തി എല്ലാവര്‍ക്കും ഇല്ല’ -എന്നായിരുന്നു പാക് ​പ്രധാനമന്ത്രിയുടെ പരാമര്‍ശം .

രാജ്യത്ത്​ ബലാത്സംഗവും ലൈംഗികാതിക്രമവും ഒഴിവാക്കാന്‍ എന്ത്​ നടപടി സ്വീകരിക്കുമെന്ന ചോദ്യത്തിനായിരുന്നു പ്രധാനമന്ത്രിയുടെ പ്രതികരണം. അന്ന്​ പ്രധാനമന്ത്രിയുടെ പ്രസ്​താവനക്കെതിരെ നൂറുകണക്കിന്​ പേര്‍ മാപ്പ്​ പറയണമെന്ന ആവശ്യവുമായി കത്തെഴുതിയിരുന്നു.

പാകിസ്​താനില്‍ 24 മണിക്കൂറില്‍ 11 ബലാത്സംഗ കേസുകള്‍ റിപ്പോര്‍ട്ട്​ ചെയ്യുന്നു​ണ്ടെന്നാണ്​ ഔദ്യോഗിക കണക്കുകള്‍. കഴിഞ്ഞ ആറുവര്‍ഷമായി 22,000 കേസുകളാണ്​ റിപ്പോര്‍ട്ട് ചെയ്യപ്പെടുന്നത് .