മെഡിറ്ററേനിയനില്‍ അഭയാര്‍ഥി ബോട്ട്​ മുങ്ങി 41 മരണം

റോം: ഇറ്റാലിയന്‍ ദ്വീപായ ലാംപെഡുസ ലക്ഷ്യമിട്ട്​ ടുണീഷ്യയിലെ എസ്​ഫാക്​സില്‍നിന്ന്​ അഭയാര്‍ഥികളുമായി പോയ ബോട്ട്​ മുങ്ങി 41 പേര്‍ മരിച്ചു. ടുണീഷ്യന്‍ തീരത്തിനു സമീപം സിദി മന്‍സൂറിനോടു ചേര്‍ന്നാണ്​ ബോട്ട്​ കാറ്റി​ലും കോളിലും തകര്‍ന്നത്​. ഒരു കുട്ടിയുള്‍പെടെ 41 പേരുടെ മൃതദേഹങ്ങള്‍ ക​െണ്ടത്തിയതായി ടുണീഷ്യന്‍ തീരദേശ സേന പറഞ്ഞു. അവശേഷിച്ചവര്‍ക്കായി തിരച്ചില്‍ തുടരുകയാണ്​.
ആഫ്രിക്കയില്‍നിന്നും ഏഷ്യന്‍ രാജ്യങ്ങളില്‍നിന്നും യൂറോപ്​ ലക്ഷ്യമിട്ട്​ നീങ്ങുന്ന ആയിരക്കണക്കിന്​ അഭയാര്‍ഥികള്‍ പ്രധാനമായി ഉപയോഗിക്കുന്ന കേന്ദ്രങ്ങളിലൊന്നാണ്​ എസ്​ഫാക്​സ്​. കഴിഞ്ഞ മാസവും ഇതേ തീരത്തുനിന്ന്​ പുറപ്പെട്ട ബോട്ട്​ മുങ്ങി 39 പേര്‍ മരിച്ചിരുന്നു. കഴിഞ്ഞ വര്‍ഷം 60ലേറെ പേരാണ്​ സമാന ദുരന്തത്തിനിരയായത്​. മനുഷ്യക്കടത്തു സംഘങ്ങള്‍ റബര്‍ വള്ളങ്ങളി​േലാ ഉപേക്ഷിച്ച മത്സ്യബന്ധ ബോട്ടുകളിലോ അഭയാര്‍ഥികളെ കുത്തിനിറച്ച്‌​ കടലില്‍ ഇറക്കിവിടുന്നത്​ പതിവു കാഴ്ചയാണ്​. ഇവയില്‍ ചിലത്​ മറുകര താണ്ടുമെങ്കിലും അപകടങ്ങളുമേറെ. ആഫ്രിക്കയിലും പരിസരങ്ങളിലും കൊടിയ പട്ടിണിയില്‍ മുങ്ങി ജീവിതത്തിന്‍റെ മറുകര പിടിക്കാന്‍ ആയിരങ്ങളാണ്​ നാടുവിടുന്നത്​. കഴിഞ്ഞ വര്‍ഷം ടുണീ്ഷ്യയില്‍നിന്ന്​ ഇങ്ങനെ കടല്‍ കടക്കുന്നവരുടെ എണ്ണം മൂന്നിരട്ടിയായി വര്‍ധിച്ചതായി യു.എന്‍ അഭയാര്‍ഥി ഏജന്‍സി പറയുന്നു. 2014നു ശേഷം മാത്രം ആഫ്രിക്കയില്‍നിന്ന്​ യൂറോപിലേക്ക്​ കടക്കുന്നതിനിടെ കടലില്‍ ജീവിതം നഷ്​ടമായത്​ 20,000 ലേറെ പേര്‍ക്കാണ്​. ഇൗ വര്‍ഷം മാത്രം മെഡിറ്ററേനിയനില്‍ 406 പേര്‍ മരിച്ചതായി രാജ്യാന്തര കുടിയേറ്റ സംഘടന (ഐ.ഒ.എം) പറയുന്നു. അതേ സമയം, ഇൗ വര്‍ഷം ഇതുവരെയായി ഇറ്റലിയിലെത്തിയ കുടിയേറ്റക്കാരുടെ എണ്ണം 8,500 ലേറെയാണ്​. ഇവരില്‍ ഏറ്റവും കൂടുതല്‍ ടുണീഷ്യയില്‍നിന്നാണ്​. സമാനമായി, ലിബിയയില്‍നിന്നാണ്​ യൂറോപ്​ ലക്ഷ്യമിട്ട്​ കുടിയേറുന്നവര്‍ കൂടുതല്‍, ബോട്ടപകടങ്ങളും.