മ്യാന്‍മറിലെ സൈനിക അട്ടിമറി റോഹിങ്ക്യന്‍ മുസ്​ലിം ദുരിതം രൂക്ഷമാക്കുമെന്ന്​ യു.എന്‍

നായ്​പിഡാവ്​: വര്‍ഷങ്ങളായി റാഖൈനിലും രാജ്യത്തിന്​ പുറത്തും നരക ജീവിതം നയിക്കുന്ന റോഹിങ്ക്യന്‍ മുസ്​ലിംകളെ​ മ്യാന്‍മറിലെ സൈനിക അട്ടിമറി കൂടുതല്‍ ദുരിതത്തിലേക്ക്​ തള്ളിവിടുമെന്ന ആശങ്ക പങ്കുവെച്ച്‌​ ഐക്യരാഷ്​ട്ര സഭ. ഒരു ദശലക്ഷത്തോളം റോഹിങ്ക്യകള്‍ വര്‍ഷങ്ങളായി ബംഗ്ലദേശിലുള്‍പെടെ അഭയാര്‍ഥികളായി കഴിയുന്നുണ്ട്​. മ്യാന്‍മറില്‍​ അവശേഷിക്കുന്നത്​ ആറു ലക്ഷ​ത്തോളം ​പേരാണ്​. ഇവരെ കൂടി അഭയാര്‍ഥികളാക്കി മാറ്റുന്നതാകുമോ സൈനിക മേധാവിത്തമെന്നാണ്​ ആശങ്ക. വിഷയം ചര്‍ച്ച ചെയ്യാന്‍ യു.എന്‍ രക്ഷാ സമിതി അടിയന്തര സമ്മേളനം ചേരുന്നുണ്ട്​.

കഴിഞ്ഞ തിങ്കളാഴ്​ചയാണ്​ ജനാധിപത്യപരമായി തെരഞ്ഞെടുക്കപ്പെട്ട സര്‍ക്കാറിനെ അട്ടിമറിച്ച്‌​ പട്ടാളം വീണ്ടും അധികാരം പിടിച്ചത്​. നേതൃത്വത്തിലുണ്ടായിരുന്ന ഓങ്​ സാന്‍ സൂചി ഉള്‍പെടെ പ്രമുഖരെ പുലര്‍ച്ചെ നടന്ന റെയ്​ഡില്‍ അറസ്​റ്റ്​ ചെയ്​തരുന്നു.

മ്യാന്‍മറിലെ റാഖൈനില്‍ 2017ല്‍ നടന്ന സൈനിക നീക്കത്തില്‍ എല്ലാം നഷ്​ടപ്പെട്ട ഏഴു ലക്ഷം റോഹിങ്ക്യന്‍ മുസ്​ലിംകള്‍ ബംഗ്ലദേശിലേക്ക്​ പലായനം ചെയ്​തിരുന്നു. ഗ്രാമങ്ങള്‍ അഗ്​നിക്കിരയാക്കിയും സ്ത്രീകളെ ബലാത്സംഗം​ ചെയ്​തും ആരോഗ്യപരിചരണം നിഷേധിച്ചും നടന്ന വംശഹത്യക്കെതിരെ സൂചിയും ഭരണകൂടവും പ്രതികരിച്ചിരുന്നില്ല. ബംഗ്ലദേശിലേക്കു കടന്ന റോഹിങ്ക്യകള്‍ ഇപ്പോഴും അഭയാര്‍ഥി ക്യാമ്ബുകളിലാണ്​. സൈന്യം വംശഹത്യയാണ്​ റാഖൈനില്‍ നടത്തിയതെന്ന്​ യു.എന്‍​ സെക്രട്ടറി ജനറല്‍ ആന്റോണിയോ ഗുട്ടറെസും പാശ്​ചാത്യ രാജ്യങ്ങളും ​ കുറ്റപ്പെടുത്തിയിരുന്നു. നടപടിക്കെതിരെ അന്താരാഷ്​ട്ര കോടതിയില്‍ കേസ്​ വിചാരണ പുരോഗമിക്കുകയാണ്​.

റാഖൈന്‍ സംസ്​ഥാനത്തു മാത്രം ആറു ലക്ഷം റോഹിങ്ക്യന്‍ മുസ്​ലിംകളുണ്ട്​. ഇവരില്‍ 1.20 ലക്ഷം പേര്‍ സഞ്ചാര സ്വാതന്ത്ര്യം പോലും നിഷേധിക്കപ്പെട്ട്​ അടിയന്തര ചികിത്സ പോലും ലഭിക്കാതെ ക്യാമ്ബുകളില്‍ കുടുങ്ങിക്കിടക്കുകയാണ്​. ഇവര്‍ക്ക്​ കാര്യങ്ങള്‍ കൂടുതല്‍ ഗുരുതരമാകുമെന്ന്​ ഭയക്കുന്നതായി യു.എന്‍ വക്​താവ്​ സ്​റ്റെഫാന്‍ ദുജാരിച്​ പറഞ്ഞു.ചൊവ്വാഴ്​ച ചേരുന്ന 15 അംഗ യു.എന്‍ രക്ഷാ സമിതി യോഗം മ്യാന്‍മര്‍ പ്രശ്​നം അടിയന്തരമായി ചര്‍ച്ച ചെയ്യും. സൈനിക അട്ടിമറി അവസാനിച്ചില്ലെങ്കില്‍ ഉപരോധം പ്രഖ്യാപിക്കുമെന്ന്​ യു.എസ്​ മുന്നറിയിപ്പ്​ നല്‍കിയിരുന്നു.

2017ലെ സൈനിക നീക്കത്തിനെതിരെ യു.എന്‍ നടപടിക്ക്​ ഒരുങ്ങിയിരുന്നുവെങ്കിലും റഷ്യയുടെയും ചൈനയുടെയും പിന്തുണയോടെ മ്യാന്‍മര്‍ രക്ഷപ്പെടുകയായിരുന്നു. എന്നാല്‍, നാല്​ സൈനിക കമാന്‍ഡര്‍മാര്‍ക്കെതിരെ അന്ന്​ ട്രംപ്​ ഭരണകൂടം ഉപരോധമേര്‍പെടുത്തി.തെരഞ്ഞെടുപ്പ്​ കൃത്രിമം ആരോപിച്ചാണ്​ സൈന്യം മ്യാന്‍മറില്‍ സൂചിയെയും ഭരണപ്രമുഖരെയും കസ്​റ്റഡിയിലെടുത്തത്​. ഒരു വര്‍ഷത്തേക്ക്​ അടിയന്തരാവസ്​ഥയും പ്രഖ്യാപിച്ചു.

മ്യാന്‍മറില്‍ ബാങ്കി്ങ്​, ടെലികോം, രത്​നം, ടെക്​സ്​റ്റൈല്‍, ലോഹ മേഖലകളിലുള്‍പെടെ സമ്പുര്‍ണ നിയന്ത്രണമുള്ള രണ്ട്​ മുന്‍നിര കമ്പനികള്‍ സൈന്യത്തിന്റെ  നിയന്ത്രണത്തിലാണ്​. മ്യാന്‍മര്‍ എക്കണോമിക്​ ഹോള്‍ഡിങ്​സ്​ ലിമിറ്റഡ്​, മ്യാന്‍മര്‍ എക്കണോമിക്​ കോര്‍പറേഷന്‍ എന്നിവയാണവ. രണ്ടു സ്​ഥാപനങ്ങളിലും സൈനിക പങ്കാളിത്തം ശക്​തമായതിനാല്‍ ബാഹ്യ ഇടപെടലുകള്‍ക്ക്​ എത്രത്തോളം മാറ്റം വരുത്താനാകുമെന്നാണ്​ ലോകം ഉറ്റുനോക്കുന്നത്​. à´ˆ സ്​ഥാപനങ്ങള്‍ക്കെതിരെ നേരത്തെ യു.എസ്​ ഉപരോധം പ്രഖ്യാപിച്ചിരുന്നുവെങ്കിലും ഫലം  കണ്ടിരുന്നില്ല.രാജ്യത്ത്​ ഭരണത്തോടൊപ്പം സാമ്ബത്തിക രംഗവും നിയന്ത്രിക്കുന്നതാണ്​ സൈന്യത്തെ കൂടുതല്‍ ശക്​തിപെപടുത്തുന്നത്​.