![](http://pravasiworld.in/pwn/wp-content/uploads/2022/11/eed09f38f44acc9143b87a929d5cc9eb11cdf99dae487b5d8b8f25f81f37c4e0.webp)
ചരിത്ര വിധി; മുന്നാക്ക സംവരണം സുപ്രിംകോടതി ശരിവച്ചു
ന്യൂഡല്ഹി: മുന്നാക്ക സംവരണം ഏര്പ്പെടുത്തിയ ഭരണഘടനാ ഭേദഗതിക്ക് അംഗീകാരം നല്കി സുപ്രിംകോടതി. മുന്നാക്ക വിഭാഗത്തിലെ പിന്നാക്കക്കാര്ക്ക് 10 ശതമാനം സംവരണം ഏര്പ്പെടുത്തിക്കൊണ്ടുള്ള കേന്ദ്ര സര്ക്കാര് നടപടിയാണ് ചീഫ് ജസ്റ്റിസ് യു.യു ലളിത് അധ്യക്ഷനായ അഞ്ചംഗ ഭരണഘടനാ ബെഞ്ച് ശരിവച്ചത്.ജഡ്ജിമാരില് അഞ്ചില് മൂന്നുപേര് ഭേദഗതിയെ പിന്തുണച്ചപ്പോള് ചീഫ് ജസ്റ്റിസ് യു.യു ലളിതും ജസ്റ്റിസ് രവീന്ദ്ര ഭട്ടും വിയോജിപ്പ് രേഖപ്പെടുത്തുകയും ചെയ്തു.
മുന്നാക്ക സംവരണം ഭരണഘടനാ വിരുദ്ധമാണെന്ന് ചൂണ്ടിക്കാട്ടിയ ഹരജികളിലാണ് കോടതി വിധിപറഞ്ഞത്. തൊഴില്, വിദ്യാഭ്യാസ മേഖലകളിലാണ് പത്തു ശതമാനം മുന്നാക്ക സംവരണം നടപ്പാക്കി കേന്ദ്ര സര്ക്കാര് ഭരണഘടനാ ഭേദഗതി നടത്തിയത്. ഇത് ഭരണഘടനയുടെ അടിസ്ഥാന ഘടനയെ മാറ്റുന്നതാണെന്ന് ചൂണ്ടിക്കാട്ടിയായിരുന്നു ഹരജികള്. ചീഫ് ജസ്റ്റിസിനും ജ. രവീന്ദ്ര ഭട്ടിനും പുറമെ ജസ്റ്റിസുമാരായ ദിനേശ് മഹേശ്വരി, ബേല എം. ത്രിവേദി, ജെ.ബി പാര്ദിവാല എന്നിവരാണ് ഭരണഘടനാ ബെഞ്ചിലുണ്ടായിരുന്നത്.
മുന്നാക്ക വിഭാഗങ്ങളിലെ സാമ്ബത്തികമായി പിന്നാക്കം നില്ക്കുന്നവര്ക്ക് 10 ശതമാനം സംവരണം ഏര്പ്പെടുത്തിയായിരുന്നു 2019ല് കേന്ദ്ര സര്ക്കാര് ഭരണഘടനാ ഭേദഗതി നടത്തിയത്. എന്നാല്, സാമ്ബത്തികം അടിസ്ഥാനമാക്കി സംവരണം ഉള്പ്പെടെ പ്രത്യേക വകുപ്പുകള് സൃഷ്ടിക്കാന് സംസ്ഥാനങ്ങള്ക്ക് അനുമതി നല്കുന്ന 103-ാം ഭേദഗതി ഭരണഘടനയുടെ അടിസ്ഥാനഘടനയെ തകര്ക്കുന്നതാണെന്നാണ് ഹർജിക്കാര് കോടതിയില് വാദിച്ചു. സെപ്റ്റംബര് 13 മുതല് ആറര ദിവസം നീണ്ട വാദത്തിനൊടുവിലാണ് ഹരജികള് വിധി പറയാന് മാറ്റുകയായിരുന്നു.