രഞ്ജി ട്രോഫിയില്‍ യുപിയെ തകര്‍ത്ത് കേരളം. ഇന്നിങ്സിനും 117 റണ്‍സിനും കൂറ്റൻ വിജയം;
ഉത്തർപ്രദേശിനെതിരായ രഞ്ജി ട്രോഫി മത്സരത്തില്‍ കിടിലൻ വിജയം സ്വന്തമാക്കി കേരളം. മത്സരത്തില്‍ ഒരു ഇന്നിംഗ്സിനും 117 റണ്‍സിനുമാണ് കേരളം വിജയം സ്വന്തമാക്കിയത്.കേരളത്തിനായി ബാറ്റിംഗില്‍ തിളങ്ങിയത് സല്‍മാൻ നിസാറും സച്ചിൻ ബേബിയുമാണ്.ബോളിങ്ങില്‍ 2 ഇന്നിങ്സുകളിലും മികച്ച പ്രകടനം കാഴ്ചവച്ച ജലജ് സക്സേന കേരളത്തിന്റെ തുറപ്പു ചീട്ടായി മാറുകയായിരുന്നു. തിരുവനന്തപുരത്ത് നടന്ന മത്സരത്തില്‍ ടോസ് നേടിയ കേരളം ബോളിങ് തിരഞ്ഞെടുക്കുകയായിരുന്നു. ഈ തീരുമാനം ശരിയാണ് എന്ന് തോന്നിക്കുന്ന തുടക്കമാണ് കേരളത്തിന് ലഭിച്ചത്. ആദ്യ ഇന്നിംഗ്സില്‍ ഉത്തർപ്രദേശിന്റെ ബാറ്റർമാരെ കൃത്യമായ രീതിയില്‍ എറിഞ്ഞിടാൻ കേരളത്തിന് കഴിഞ്ഞു.ഉത്തർപ്രദേശ് നിരയില്‍ പത്താമനായി ക്രീസിലെത്തിയ ശിവം ശർമ മാത്രമാണ് കുറച്ച്‌ സമയമെങ്കിലും പിടിച്ചുനിന്നത്. ശിവം ശർമ 30 റണ്‍സ് മത്സരത്തില്‍ നേടി. നിതീഷ് റാണ 25 റണ്‍സ് നേടി ഉത്തർപ്രദേശിന് ചെറിയ സംഭാവന നല്‍കി. എന്നാല്‍ മറുവശത്ത് സക്സേന കേരളത്തിന്റെ പടയാളിയായി മാറുകയായിരുന്നു. ഇന്നിംഗ്സില്‍ 56 റണ്‍സ് മാത്രം വിട്ടുനല്‍കിയാണ് സക്സേന 5 വിക്കറ്റുകള്‍ സ്വന്തമാക്കിയത്. ഇതോടെ ഉത്തർപ്രദേശിന്റെ ആദ്യ ഇന്നിങ്സ് കേവലം 162 റണ്‍സില്‍ അവസാനിക്കുകയായിരുന്നു മറുപടി ബാറ്റിംഗ് ആരംഭിച്ച കേരളത്തിന് തരക്കേടില്ലാത്ത തുടക്കമാണ് മുൻനിര ബാറ്റർമാർ നല്‍കിയത്.ബാബ അപരാജിത് 32 റണ്‍സും രോഹൻ കുന്നുമ്മല്‍ 28 റണ്‍സും നേടി കേരളത്തിന് അടിത്തറ നല്‍കി. ശേഷം നായകൻ സച്ചിൻ ബേബി ക്രീസിലുറച്ചത് കേരളത്തിന് വലിയ പ്രതീക്ഷ നല്‍കി. ഏഴാമനായി ക്രീസിലെത്തിയ സല്‍മാൻ നിസാറും സച്ചിൻ ബേബിയും ചേർന്ന് കേരളത്തെ മികച്ച സ്കോറിലേക്ക് എത്തിക്കുകയായിരുന്നു. സച്ചിൻ ബേബി 83 റണ്‍സ് നേടിയപ്പോള്‍ സല്‍മാൻ നിസാർ 93 റണ്‍സാണ് മത്സരത്തില്‍ സ്വന്തമാക്കിയത്. ഒപ്പം ഒമ്ബതാമനായി എത്തിയ മുഹമ്മദ് അസറുദ്ദീൻ 40 റണ്‍സ് കൂടി സ്വന്തമാക്കിയതോടെ കേരളം ആദ്യ ഇന്നിങ്സില്‍ 395 റണ്‍സില്‍ ഫിനിഷ് ചെയ്തു. ഇതോടെ ഒന്നാം ഇന്നിങ്സില്‍ 233 റണ്‍സിന്റെ ലീഡാണ് കേരളത്തിന് ലഭിച്ചത്.രണ്ടാം ഇന്നിങ്സില്‍ ബാറ്റിംഗ് ആരംഭിച്ച ഉത്തർപ്രദേശ് പൂർണ്ണമായും തകർന്നു വീഴുകയായിരുന്നു. ആദ്യ ഇന്നിംഗ്സില്‍ ഉത്തർപ്രദേശിന്റെ വേരറുത്ത സക്സേന രണ്ടാം ഇന്നിംഗ്സിലും മികവ് പുലർത്തി. രണ്ടാം ഇന്നിങ്സില്‍ 6 വിക്കറ്റുകളാണ് സകസേന സ്വന്തമാക്കിയത്. ഉത്തർപ്രദേശ് നിരയില്‍ 36 റണ്‍സ് നേടിയ ഓപ്പണർ മാധവ് കൗശിക്ക് മാത്രമാണ് കുറച്ച്‌ സമയം ക്രീസില്‍ തുടർന്നത്. ഈ തകർപ്പൻ പ്രകടനത്തോടെ മത്സരത്തില്‍ ഒരു ഇന്നിംഗ്സിനും 117 റണ്‍സിനും വിജയം സ്വന്തമാക്കാൻ കേരള ടീമിന് സാധിച്ചു.
