ബെയ്റൂത്തില്‍ ഇസ്രായേലിന്‍റെ കനത്ത വ്യോമാക്രമണം; മൂന്ന് ലബനാൻ സൈനികര്‍ കൊല്ലപ്പെട്ടു, ആറ് കെട്ടിടങ്ങള്‍ തകര്‍ന്നു
ബെയ്റൂത്ത്: ലബനാൻ തലസ്ഥാനമായ ബെയ്റൂത്തില്‍ ഇസ്രായേലിന്‍റെ കനത്ത വ്യോമാക്രമണം. ആറ് കെട്ടിടങ്ങള്‍ തകർന്നു. മൂന്ന് ലബനാൻ സൈനികർ കൊല്ലപ്പെട്ടു.സിറിയൻ തലസ്ഥാനമായ ദമാസ്കസിലെ വ്യോമാക്രമണത്തില്‍ സിറിയൻ സൈനികനും കൊല്ലപ്പെട്ടു.വടക്കൻ ഗസ്സയിലും കനത്ത വ്യോമാക്രമണം തുടരുകയാണ്. 200 ഓളം ഫലസ്തീനികളെ സൈന്യം അറസ്റ്റ് ചെയ്ത് കൊണ്ടുപോയി. ഇസ്രയേലിന് നേരെ ഹിസ്ബുല്ലയും റോക്കാറ്റാക്രമണം കടുപ്പിച്ചു. ലബനാന് നേരെ ആക്രമണം തുടങ്ങിയ ശേഷമുള്ള ഇസ്രായേലിന്‍റെ ഏറ്റവും കനത്ത വ്യോമാക്രമണമാണ് കഴിഞ്ഞ രാത്രിയില്‍ ബെയ്റൂത്തില്‍ നടന്നത്. ഇസ്രായേല്‍ ഫൈറ്റർ ജെറ്റുകള്‍ വ്യാപകമായി ബേംബ് വർഷിച്ചു. ബെയ്റൂത്തിലും തൈർ പട്ടണത്തിലും 3 മണിക്കൂറിനിടെ 17 തവണയാണ് സൈന്യം ബോംബാക്രമണം നടത്തിയത്. ബെയ്റൂത്തില്‍ ജനവാസ മേഖലയിലായ ലയ്‍ലാക്കിയില്‍ ആറ് കെട്ടിടങ്ങള്‍ നിലംപൊത്തി. തെക്കൻ ലബനാനിലെ ബിൻത് ജുബൈലില്‍ മൂന്ന് ലബനാൻ സൈനികർ കൂടി കൊല്ലപ്പെട്ടു. യാതെർ പ്രദേശത്ത് നിന്ന് പരിക്കേറ്റവരെ രക്ഷപ്പെടുത്തുന്നതിനിടെയാണ് സൈനികർ കൊല്ലപ്പെട്ടത്. ഇസ്രായേല്‍ ആക്രമണത്തില്‍ ഇതുവരെ 13 ലബനാൻ സൈനികരാണ് കൊല്ലപ്പെട്ടത്.കഴിഞ്ഞ ദിവസം സിറിയൻ തലസ്ഥാനമായ ദമാസ്കസിലെ കഫർ സോസയില്‍ ഇസ്രായേല്‍ സൈന്യം നടത്തിയ വ്യോമാക്രമണത്തില്‍ ഒരു സിറിയൻ സൈനികനും കൊല്ലപ്പെട്ടു. 7 സൈനികർക്ക് പരിക്കേറ്റതായും സിറിയൻ പ്രതിരോധ മന്ത്രാലയം അറിയിച്ചു. നേരത്തെ ഇസ്രായേല്‍ ആക്രമണത്തില്‍ തകർന്ന ബെയ്റൂത്തിലെ അല്‍ സാഹെല്‍ ആുപത്രിക്കടിയില്‍ പണവും സ്വർണവുമുണ്ടെന്ന ആരോപണത്തിന് തെളിവില്ലെന്ന് അമേരിക്കൻ പ്രതിരോധ സെക്രട്ടറി ലോയ്ഡ് ഓസ്റ്റിൻ വ്യക്തമാക്കി.വടക്കൻ ഗസ്സയില്‍ ഇസ്രായേല്‍ സൈനിക ഉപരോധം തുടങ്ങിയിട്ട് 20 ദിവസം പിന്നിട്ടു. മേഖലയില്‍ ഇന്ന് 200 ഓളം ഫലസ്തീനി യുവാക്കളെയാണ് ഇസ്രായേല്‍ തടവിലാക്കിയത്. ഇസ്രായേലില്‍ സിംചത് തോറ ആഘോഷം നടക്കുന്നതിനിടയില്‍ കഴിഞ്ഞ ദിവസം ഹിസ്ബുല്ല വ്യാപക വ്യോമാക്രമണം നടത്തി. തെല്‍ അവീവിലേക്ക് നാല് മീഡിയം റൈഞ്ച് മിസൈലുകളച്ചായിരുന്നു ഹിസ്ബുല്ലയുടെ ആക്രമണം . തെല്‍ അവീവിനു പുറമെ ഹൈഫയിലും സമീപ പ്രദേശങ്ങളിലും ഹിസ്ബുല്ല വ്യാപകമായ റോക്കറ്റാക്രമണവും നടത്തി. ഹമാസ് ആക്രമണത്തിന്‍റെ വാർഷികത്തില്‍ ഇസ്രായേല്‍ ജനത സിംചത് തോറ ആചരണത്തിലായിരുന്നു .
