യാക്കോബായ സഭ 6 പള്ളികള്‍ ഓര്‍ത്തഡോക്‌സ് സഭയ്ക്ക് കൈമാറണം, സര്‍ക്കാരിനെ ഇടപെടുത്തരുത്; സുപ്രീം കോടതി
ന്യൂഡല്‍ഹി: ഓർത്തഡോക്സ് യാക്കോബായ തർക്കത്തില്‍ സുപ്രധാനമായ നിർദേശവുമായി സുപ്രീം കോടതി. തർക്കത്തിലുള്ള എറണാകുളം, പാലക്കാട് ജില്ലകളിലായുള്ള ആറ് പള്ളികളുടെ ഭരണം ഓർത്തഡോക്സ് സഭയ്ക്ക് കൈമാറാൻ സുപ്രീം കോടതി യാക്കോബായ സഭയോട് നിർദേശിച്ചു.അതേസമയം പള്ളികളിലെ സെമിത്തേരി, സ്കൂളുകള്‍ എന്നിവ ഉള്‍പ്പടെയുള്ള പൊതുസംവിധാനങ്ങളില്‍ ഒരുവിഭാഗത്തില്‍ പെട്ടവരെയും വിലക്കരുതെന്ന് സുപ്രീം കോടതി ഓർത്തഡോക്സ് സഭയ്ക്ക് നിർദേശംനല്‍കി.മലങ്കര സഭയ്ക്കു കീഴിലുള്ള പള്ളികള്‍ 1934-ലെ ഭരണഘടന അനുസരിച്ചു വേണം ഭരണം നടത്തേണ്ടതെന്ന 2017-ലെ സുപ്രീംകോടതി വിധിയുടെ അടിസ്ഥാനത്തിലാണ് നിർദേശം നല്‍കുന്നതെന്ന് ജസ്റ്റിസുമാരായ സൂര്യകാന്ത്, ഉജ്ജ്വല്‍ ഭുയാൻ എന്നിവരടങ്ങിയ ബെഞ്ച് വ്യക്തമാക്കി. 2017-ലെ വിധിക്കുശേഷം നല്‍കിയ പല പ്രത്യേക അനുമതി ഹർജികളും സുപ്രീം കോടതിയുടെ പരിഗണനയിലാണെന്ന് യാക്കോബായ സഭയ്ക്കുവേണ്ടി ഹാജരായ സീനിയർ അഭിഭാഷകരായ രഞ്ജിത്ത് കുമാർ, ശ്യാം ദിവാൻ എന്നിവർ സുപ്രീം കോടതിയില്‍ ചൂണ്ടിക്കാട്ടി. എന്നാല്‍, 2017-ലെ വിധി നടപ്പാക്കാൻ തയ്യാറാകാത്ത യാക്കോബായ വിഭാഗത്തിന്റെ നടപടി കോടതിയലക്ഷ്യമാണെന്ന് ബെഞ്ച് ചൂണ്ടിക്കാട്ടി. യാക്കോബായ സഭയുടെ ആവശ്യങ്ങള്‍ കേള്‍ക്കണെമെങ്കില്‍ പള്ളികളുടെ ഭരണം ഓർത്തഡോക്സ് വിഭാഗത്തിന് കൈമാറണമെന്നും സുപ്രീം കോടതി നിർദേശിച്ചു.ആറ് പള്ളികളുടെ ഭരണം കൈമാറിയെന്ന സത്യവാങ്മൂലം രണ്ടാഴ്ചയ്ക്കുള്ളില്‍ യാക്കോബായ സഭ സുപ്രീം കോടതിക്ക് കൈമാറണം. മലങ്കര സഭാതർക്കവുമായി ബന്ധപ്പെട്ട വിഷയങ്ങള്‍ സൗഹൃദപരമായി പരിഹരിക്കാനാണ് സുപ്രീം കോടതി ഉദ്ദേശിക്കുന്നതെന്ന് ജസ്റ്റിസ് സൂര്യകാന്ത് പറഞ്ഞു.പള്ളികളുടെ കണക്കുകള്‍ നോക്കാനും സർക്കാരിനെ അനുവദിക്കണം- സുപ്രീം കോടതി ഓർത്തഡോക്സ്- യാക്കോബായ തർക്കത്തിലുള്ള പള്ളികളുടെ ഭരണം ഏറ്റെടുക്കാൻ പോലീസിനെ അയക്കുന്നതിനെ വിമർശിച്ച്‌ സുപ്രീം കോടതി. പള്ളികള്‍ മത സ്ഥാപനങ്ങളാണ്. അവിടേക്ക് പോലീസിനെ അയക്കുന്നതിനോട് യോജിക്കുന്നില്ലെന്ന് സുപ്രീം കോടതി വ്യക്തമാക്കി. ഇത്തരം കാര്യങ്ങളില്‍ പോലീസിന്റെ ഇടപെടല്‍ ആവശ്യപ്പെടരുതെന്ന് ഓർത്തഡോക്സ് സഭയ്ക്കുവേണ്ടി ഹാജരായ സീനിയർ അഭിഭാഷകരോട് സുപ്രീം കോടതി നിർദേശിച്ചു. സർക്കാർ ഭരണം ഏറ്റെടുത്ത് നല്‍കണമെന്ന് ആവശ്യപ്പെടുന്നവർ പള്ളികളുടെ കണക്കുകള്‍കൂടി സർക്കാരിനെ ഏല്‍പ്പിക്കാൻ തയ്യാറാകണമെന്നും സുപ്രീം കോടതി അഭിപ്രായപ്പെട്ടു.തർക്കത്തിലുളള പള്ളികളുടെ ഭരണം ഏറ്റെടുത്ത് ഓർത്തഡോക്സ് വിഭാഗത്തിന് നല്‍കാത്തതിനെതിരെ മുൻ ചീഫ് സെക്രട്ടറി ഡോ. വി. വേണു, പോലീസ് മേധാവി ഷെയ്ഖ് ദർവേഷ് സാഹിബ്, അഡീഷണല്‍ ചീഫ് സെക്രട്ടറി ബിശ്വനാഥ് സിൻഹ, സെൻട്രല്‍ സോണ്‍ ഐ.ജി. നീരജ് കുമാർ ഗുപ്ത, എറണാകുളം ജില്ലാ കളക്ടർ എൻ.എസ്.കെ. ഉമേഷ്, എറണാകുളം റൂറല്‍ എസ്.പി. വിവേക് കുമാർ, പാലക്കാട് കളക്ടർ എസ്. ചിത്ര, പാലക്കാട് എസ്.പി. ആർ. ആനന്ദ് തുടങ്ങി രണ്ട് ഡസനോളം ഉദ്യോഗസ്ഥർക്കെതിരെയാണ് കേരള ഹൈക്കോടതി കോടതിയലക്ഷ്യ നടപടി ആരംഭിച്ചത്. ഈ നടപടി ഒഴിവാക്കണമെന്ന് ആവശ്യപ്പെട്ടാണ് ഇവർ സുപ്രീം കോടതിയെ സമീപിച്ചത്. കോടതിയലക്ഷ്യ നടപടികളില്‍ ഹൈക്കോടതിയില്‍ നേരിട്ട് ഹാജരാകുന്നതില്‍നിന്ന് ഉദ്യോഗസ്ഥരെ സുപ്രീം കോടതി ഒഴിവാക്കി.ശബരിമല വിശാല ബെഞ്ചിന്റെ നടപടികളില്‍ പ്രതീക്ഷവെച്ച്‌ യാക്കോബായ സഭ ഓർത്തഡോക്സ് യാക്കോബായ തർക്കവുമായി ബന്ധപ്പെട്ട 2017-ലെ സുപ്രീം കോടതി വിധി സുപ്രീം കോടതിയുടെ ഒൻപതംഗ ബെഞ്ചിന്റെ പരിണഗണനയിലുള്ള ശബരിമല കേസിലെ വിഷയങ്ങളുമായി ബന്ധപ്പെട്ടതാണെന്ന് യാക്കോബായ സഭയുടെ അഭിഭാഷകൻ രഞ്ജിത്ത് കുമാർ സുപ്രീം കോടതിയില്‍ ചൂണ്ടിക്കാട്ടി. മത വിഷയങ്ങളില്‍ കോടതികള്‍ക്ക് ഇടപെടാൻ കഴിയുമോ എന്നതാണ് സുപ്രീം കോടതിയുടെ ഒമ്ബതംഗ ഭരണഘടനാ ബെഞ്ച് പരിഗണിക്കുന്നത്. ശബരിമല യുവതി പ്രവേശന വിധിക്ക് എതിരായ പുനഃപരിശോധന ഹർജി പരിഗണിച്ച ബെഞ്ചാണ് വിഷയം ഒമ്ബതംഗ ബെഞ്ചിൻറെ പരിഗണനയ്ക്ക് വിട്ടത്. ശബരിമല യുവതി പ്രവേശന വിധി നടപ്പാക്കാൻ സർക്കാരിന് പിന്തുണ നല്‍കിയ സഭയാണ് യാക്കോബായ സഭ.യാക്കോബായ സഭയ്ക്കുവേണ്ടി സംസ്ഥാന സർക്കാർ രാഷ്ട്രീയമായ തീരുമാനങ്ങള്‍ എടുക്കുന്നുവെന്ന് ഓർത്തഡോക്സ് സഭയ്ക്കായി ഹാജരായ സീനിയർ അഭിഭാഷകൻ കൃഷ്ണൻ വേണുഗോപാല്‍ സുപ്രീം കോടതിയില്‍ ആരോപിച്ചു. ജനാധിപത്യപരമായി തിരഞ്ഞെടുക്കപ്പെട്ട സർക്കാരിന് രാഷ്ട്രീയ തീരുമാനങ്ങള്‍ എടുക്കാൻ അധികാരമുണ്ടെന്നും ആര് ആർക്ക് പിന്തുണ നല്‍കുന്നു എന്നത് തങ്ങളെ ബാധിക്കുന്ന വിഷയമല്ലെന്നും സുപ്രീം കോടതി വ്യക്തമാക്കി.സംസ്ഥാന സർക്കാരിനുവേണ്ടി സ്റ്റാന്റിങ് കോണ്‍സല്‍ സി.കെ ശശി, അഭിഭാഷക മീന കെ. പൗലോസ് എന്നിവർ ഹാജരായി. ഓർത്തഡോക്സ് സഭയ്ക്ക് വേണ്ടി സീനിയർ അഭിഭാഷകരായ കെ.കെ വേണുഗോപാല്‍, സി.യു സിങ്, കൃഷ്ണൻ വേണുഗോപാല്‍, അഭിഭാഷകൻ ഇ.എം.എസ്. അനാം എന്നിവർ ഹാജരായി. യാക്കോബായ സഭയ്ക്ക് വേണ്ടി സീനിയർ അഭിഭാഷകരായ രഞ്ജിത്ത് കുമാർ, ശ്യാം ദിവാൻ, അഭിഭാഷകരായ എ. രഘുനാഥ്, സനന്ദ് രാമകൃഷ്ണൻ എന്നിവരാണ് ഹാജരായത്.
