ഗസ്സ സമ്ബദ്‍വ്യവസ്ഥ പഴയ നിലയിലേക്ക് എത്തണമെങ്കില്‍ 350 വര്‍ഷം വേണ്ടി വരുമെന്ന് യു.എൻ;
വാഷിങ്ടണ്‍: ഇസ്രായേല്‍ ആക്രമണങ്ങളെ തുടർന്ന് തകർന്നടിഞ്ഞ ഗസ്സയിലെ സമ്ബദ്‍വ്യവസ്ഥ പഴയ നിലയിലേക്ക് എത്തണമെങ്കില്‍ 350 വർഷം വേണ്ടി വരുമെന്ന് റിപ്പോർട്ട്.യു.എന്നാണ് ഇതുസംബന്ധിച്ച മുന്നറിയിപ്പ് നല്‍കിയത്. യുദ്ധത്തിന് മുമ്പ് തന്നെ ഗസ്സയിലെ സാമ്പത്തിക പ്രവർത്തനങ്ങള്‍ വലിയ തകർച്ചയെ അഭിമുഖീകരിച്ചിരുന്നു. എന്നാല്‍, ഇസ്രായേല്‍ അധിനിവേശത്തോടെ സാമ്ബത്തിക പ്രവർത്തനങ്ങള്‍ പൂർണമായും നിലച്ചു. കടുത്ത കുടിവെള്ള, ഇന്ധന, വൈദ്യുതി ക്ഷാമം ഗസ്സയെ വലച്ചു. ഭക്ഷ്യവസ്തുക്കളും ആരോഗ്യസേവനങ്ങളും പോലും ഗസ്സക്ക് ലഭിക്കാതെയായി.യു.എന്നിന്റെ കണക്കുകള്‍ പ്രകാരം നിർമാണ പ്രവർത്തനങ്ങള്‍ 96 ശതമാനം ഇടിഞ്ഞു. കാർഷിക പ്രവർത്തനങ്ങള്‍ 93 ശതമാനവും സേവനമേഖലയില്‍ 76 ശതമാനവും ഇടിവുണ്ടായി. ഗസ്സയിലെ തൊഴിലില്ലായ്മ 2024 സാമ്പത്തിക വർഷത്തിന്റെ ആദ്യപാദത്തില്‍ 81.7 ശതമാനമായി ഉയർന്നു. ഗസ്സയിലെ ഇസ്രായേല്‍ അധിനിവേശം ഇനിയും തുടരുകയാണെങ്കില്‍ സ്ഥിതി വീണ്ടും രൂക്ഷമാകുമെന്നാണ് യു.എന്നിന്റെ മുന്നറിയിപ്പ്.വെടിനിർത്തല്‍ കരാർ യാഥാർഥ്യമായാലും 2007 മുതല്‍ 2022 വരെയുള്ള അവസ്ഥയിലേക്ക് ഗസ്സയുടെ സമ്ബദ്‍വ്യവസ്ഥ എത്തണമെങ്കില്‍ 350 വർഷം വേണ്ടി വരുമെന്നും യു.എൻ റിപ്പോർട്ട് ചൂണ്ടിക്കാട്ടുന്നു.2023 സാമ്പത്തിക വർഷത്തിന്റെ ആദ്യ മൂന്ന് പാദങ്ങളില്‍ യുദ്ധം തുടങ്ങുന്നതിന് മുമ്ബ് മൂന്ന് ശതമാനം നെഗറ്റീവ് വളർച്ചയാണ് ഗസ്സ സമ്ബദ്‍വ്യവസ്ഥയില്‍ ഉണ്ടായത്. 2023ല്‍ സമ്പത് വ്യവസ്ഥയില്‍ 22.6 ശതമാനം നെഗറ്റീവ് വളർച്ചുണ്ടായി. അടുത്തപാദത്തില്‍ സമ്പത് വ്യവസ്ഥയില്‍ 90 ശതമാനം തകർച്ചയുണ്ടാവുമെന്നാണ് പ്രതീക്ഷിക്കുന്നത്.
റിപ്പോർട്ട് പ്രകാരം ഗസ്സയിലെ 88 ശതമാനം സ്കൂളുകളും തകർക്കപ്പെട്ടിരിക്കുന്നു. 36 ആശുപത്രികളില്‍ 21 എണ്ണവും പ്രവർത്തിക്കുന്നില്ല. പ്രാഥമിക ആരോഗ്യകേന്ദ്രങ്ങളില്‍ 105 എണ്ണത്തില്‍ 45 എണ്ണമാണ് പ്രവർത്തിക്കുന്നത്. 62 ശതമാനം വീടുകളും തകർക്കപ്പെട്ടു. 59 ശതമാനം കുടിവെള്ള വിതരണ സംവിധാനങ്ങളും അഴുക്കുചാലുകളും തകർക്കപ്പെട്ടുവെന്നും യു.എൻ റിപ്പോർട്ടില്‍ ചൂണ്ടിക്കാട്ടുന്നു.
