പേജര്‍ ആക്രമണത്തിനു പിന്നാലെ സുരക്ഷാ ഗാര്‍ഡുകള്‍ക്ക് ആശയവിനിമയ ഉപകരണങ്ങള്‍ നിരോധിച്ച്‌ ഇറാൻ;
തെഹ്റാൻ: ലെബനാനില്‍ ഹിസ്ബുല്ല ഉപയോഗിച്ച ആയിരക്കണക്കിന് പേജറുകളും വാക്കി-ടോക്കികളും മാരകമായ ആക്രമണങ്ങളില്‍ പൊട്ടിത്തെറിച്ചതിനെത്തുടർന്ന് ഇറാനിലെ എലൈറ്റ് റെവല്യൂഷണറി ഗാർഡ്സ് കോർപ്സിലെ(ഐ.ആർ.ജി.സി) മുഴുവൻ അംഗങ്ങളും ഏതെങ്കിലും തരത്തിലുള്ള ആശയവിനിമയ ഉപകരണങ്ങള്‍ ഉപയോഗിക്കുന്നത് നിർത്താൻ ഉത്തരവിട്ടു.ഇക്കാര്യം മുതിർന്ന ഇറാനിയൻ സുരക്ഷാ ഉദ്യോഗസ്ഥർ പറഞ്ഞതായി റോയിട്ടേഴ്സ് ആണ് പുറത്തുവിട്ടത്. ആശയവിനിമയ ഉപകരണങ്ങള്‍ മാത്രമല്ല എല്ലാ ഉപകരണങ്ങളും പരിശോധിക്കാൻ വലിയ തോതിലുള്ള ശ്രമം നടക്കുന്നുണ്ടെന്നും സുരക്ഷാ ഉദ്യോഗസ്ഥരിലൊരാള്‍ പറഞ്ഞു. ഈ ഉപകരണങ്ങളില്‍ ഭൂരിഭാഗവും ആഭ്യന്തരമായി നിർമിച്ചതോ ചൈനയില്‍നിന്നും റഷ്യയില്‍നിന്നും ഇറക്കുമതി ചെയ്തതോ ആണ്.ഇറാനികള്‍ ഉള്‍പ്പെടെയുള്ള ഇസ്രായേലി ഏജന്‍റുമാരുടെ നുഴഞ്ഞുകയറ്റത്തെക്കുറിച്ച്‌ ഇറാൻ നേരത്തെത്തന്നെ ആശങ്കാകുലരായിരുന്നു. ഐ.ആർ.ജി.സിയിലെ ഇടത്തരവും ഉയർന്നതുമായ റാങ്കിലുള്ള അംഗങ്ങളെ ലക്ഷ്യമിട്ട് സമഗ്രമായ അന്വേഷണം ഇതിനകം ആരംഭിച്ചതായും ഉദ്യോഗസ്ഥൻ കൂട്ടിച്ചേർത്തു. ഇതില്‍ ഇറാനിലും വിദേശത്തുമുള്ളവരുടെ ബാങ്ക് അക്കൗണ്ടുകളുടെയും അവരുടെ യാത്രകളുടെയും കുടുംബങ്ങളുടെയും സൂക്ഷ്മപരിശോധനയും ഉള്‍പ്പെടുന്നു.സംയോജിത ആക്രമണത്തിലാണ് കഴിഞ്ഞ ചൊവ്വാഴ്ച ഹിസ്ബുല്ലയുടെ ശക്തികേന്ദ്രങ്ങളില്‍ പേജർ ഉപകരണങ്ങള്‍ പൊട്ടിത്തെറിച്ചത്. ബുധനാഴ്ച നൂറുകണക്കിന് വാക്കി-ടോക്കികളും പൊട്ടിത്തെറിച്ചു. ആക്രമണത്തില്‍ 39 പേർ കൊല്ലപ്പെടുകയും മൂവായിരത്തിലധികം പേർക്ക് പരിക്കേല്‍ക്കുകയും ചെയ്തു. ആക്രമണത്തിന് പിന്നില്‍ ഇസ്രായേലാണെന്ന് ലെബനാനും ഹിസ്ബുല്ലയും പറയുന്നു. ഇസ്രായേല്‍ പങ്കാളിത്തം നിഷേധിക്കുകയോ സ്ഥിരീകരിക്കുകയോ ചെയ്തിട്ടില്ല.
അതേസമയം, 190,000 ഉദ്യോഗസ്ഥർ അടങ്ങുന്ന ഐ.ആർ.ജി.സി സേന എങ്ങനെ ആശയവിനിമയം നടത്തും എന്നതിനെക്കുറിച്ചുള്ള വിശദാംശങ്ങള്‍ നല്‍കാൻ സുരക്ഷാ ഉദ്യോഗസ്ഥൻ വിസമ്മതിച്ചു. നിലവില്‍ മെസേജിംഗ് സിസ്റ്റങ്ങളില്‍ എൻഡ്-ടു-എൻഡ് എൻക്രിപ്ഷൻ ഉപയോഗിക്കുന്നുവെന്ന് അദ്ദേഹം പറഞ്ഞു. ഇറാന്‍റെ ഭരണ സ്ഥാപനങ്ങള്‍ക്കിടയില്‍ വ്യാപകമായ ആശങ്കയുണ്ടെന്നാണ് സൂചന. സാങ്കേതിക വിലയിരുത്തലുകള്‍ക്കായി ഐ.ആർ.ജി.സി ഉദ്യോഗസ്ഥർ ഹിസ്ബുല്ലയെ സമീപിച്ചതായും പൊട്ടിത്തെറിച്ച ഉപകരണങ്ങളുടെ നിരവധി അവശിഷ്ടങ്ങള്‍ ഇറാനിയൻ വിദഗ്ധരുടെ പരിശോധനക്കായി ടെഹ്‌റാനിലേക്ക് അയച്ചതായും റിപ്പോർട്ട് പറയുന്നു.ഇറാന്‍റെ പ്രധാന ആശങ്ക രാജ്യത്തിന്‍റെ ആണവ- മിസൈല്‍ സൗകര്യങ്ങളുടെ പ്രത്യേകിച്ച്‌ ഭൂഗർഭ കേന്ദ്രങ്ങളുടെ സംരക്ഷണവുമായി ബന്ധപ്പെട്ടാണെന്ന് മറ്റൊരു ഇറാനിയൻ ഉദ്യോഗസ്ഥൻ പറഞ്ഞു. എന്നാല്‍ കഴിഞ്ഞ വർഷം മുതല്‍, ആ സൈറ്റുകളിലെ സുരക്ഷാ നടപടികള്‍ ഗണ്യമായി വർധിച്ചതായും 2023 ല്‍ ഇറാന്‍റെ മിസൈല്‍ പദ്ധതി അട്ടിമറിക്കാനുള്ള ഇസ്രായേലിന്‍റെ ശ്രമം ഇറാൻ അധികാരികള്‍ അറിഞ്ഞതിനുശേഷം നടപടികള്‍ ശക്തമാക്കിയിരുന്നുവെന്നും അദ്ദേഹം പറഞ്ഞു. എന്നാല്‍, ഇസ്രായേല്‍ ഇതിനെക്കുറിച്ച്‌ ഒരിക്കലും പ്രതികരിച്ചിട്ടില്ല. ലെബനനിലെ പേജർ സ്‌ഫോടനങ്ങള്‍ക്ക് ശേഷം മുൻ നിലകളേക്കാള്‍ സുരക്ഷ ഗണ്യമായി വർധിപ്പിച്ചിട്ടുണ്ടെന്ന് അദ്ദേഹം കൂട്ടിച്ചേർത്തു. ഇപ്പോഴത്തേത് പോലെ കർശനമായ സുരക്ഷയും നടപടികളും ഒരിക്കലും ഉണ്ടായിട്ടില്ല.പരമോന്നത നേതാവ് ആയത്തുല്ല അലി ഖുമേനിയുമായി അടുത്ത ബന്ധമുള്ള ഇറാനിലെ ശക്തമായ രാഷ്ട്രീയ, സൈനിക, സാമ്ബത്തിക ശക്തിയാണ് ഐ.ആർ.ജി.സി. 1979ലെ ഇസ്‍ലാമിക വിപ്ലവത്തിനുശേഷം പൗരോഹിത്യ ഭരണസംവിധാനത്തെ സംരക്ഷിക്കുന്നതിനായി സ്ഥാപിതമായ ഇതിന് രാജ്യത്തിന്‍റെ തന്ത്രപ്രധാനമായ ആയുധങ്ങളുടെ മേല്‍നോട്ടം വഹിക്കുന്ന സ്വന്തം കരസേനയും നാവികസേനയും വ്യോമസേനയും ഉണ്ട്.ഇറാന്‍റെ സൈന്യം സുരക്ഷിത ആശയവിനിമയത്തിനായി വാക്കി-ടോക്കികള്‍ ഉള്‍പ്പെടെയുള്ള എൻക്രിപ്റ്റ് ചെയ്ത ആശയവിനിമയ ഉപകരണങ്ങള്‍ ഉപയോഗിക്കുന്നുണ്ട്. നിർദ്ദിഷ്ട മോഡലുകളും ബ്രാൻഡുകളും വ്യത്യാസപ്പെടാമെങ്കിലും ഇറാനിയൻ സൈനിക ആശയവിനിമയ ഉപകരണങ്ങള്‍ പലപ്പോഴും ആഭ്യന്തരമായി വികസിപ്പിച്ചെടുത്തതാണ്. രണ്ട് പതിറ്റാണ്ടിലേറെയായി ഇറാന്‍റെ സായുധ സേന പേജറുകള്‍ ഉപയോഗിക്കുന്നത് നിർത്തിയിരിക്കുകയാണെന്ന് അദ്ദേഹം അറിയിച്ചു. വിദേശ ഇറക്കുമതിയെ ആശ്രയിക്കുന്നത് ഒഴിവാക്കാൻ ടെഹ്‌റാൻ അതിന്‍റെ പ്രതിരോധ വ്യവസായത്തിലൂടെ സ്വന്തം സൈനിക-ഗ്രേഡ് റേഡിയോ പ്രക്ഷേപണങ്ങള്‍ വികസിപ്പിച്ചെടുത്തിട്ടുണ്ട്. പ്രത്യേകിച്ചും ആണവ പരിപാടിയുടെ പേരില്‍ തെഹ്‌റാനില്‍ പാശ്ചാത്യ ഉപരോധം ഏർപ്പെടുത്തിയതിനാലെന്നും ഉദ്യോഗസ്ഥൻ കൂട്ടിച്ചേർത്തു.എന്നാല്‍, മുൻകാലങ്ങളില്‍ ചൈന,റഷ്യ തുടങ്ങിയ രാജ്യങ്ങളില്‍ നിന്നും ജപ്പാനില്‍ നിന്നുപോലും ഇറാൻ ആശയവിനിമയ ഉപകരണങ്ങള്‍ ഇറക്കുമതി ചെയ്തിട്ടുണ്ട്. ഇറാനും ഇസ്രായേലും പതിറ്റാണ്ടുകളായി നിഴല്‍ യുദ്ധത്തിലാണ്. ഹമാസ് നേതാവ് ഇസ്മായില്‍ ഹനിയയെ തെഹ്‌റാനിലും ഹിസ്ബുല്ലയുടെ ഏറ്റവും മുതിർന്ന സൈനിക കമാൻഡറായ ഫുആദ് ഷുക്ക്റിനെ ബെയ്റൂത്തില്‍ വെച്ച്‌ ജൂലൈയിലും കൊലപ്പെടുത്തിയതിന് ഇറാനും ഹിസ്ബുല്ലയും ഇസ്രായേലിനെ കുറ്റപ്പെടുത്തിയിരുന്നു.
