ബംഗാളിൽ ഇടതുവോട്ടുകൾ ബിജെപിയിൽ; തൃണമൂലിൻ്റെ കണക്ക് ശരി

ബംഗാള്‍ മുൻമുഖ്യമന്ത്രി ബുദ്ധദേബ് ഭട്ടാചാര്യയും സിപിഎം മുൻ ജനറൽ സെക്രട്ടറി പ്രകാശ് കാരാട്ടും തെരഞ്ഞെടുപ്പ് വേളയിൽ സിപിഎം വോട്ടുകള്‍ ബിജെപിയിലേയ്ക്ക് ഒഴുകിയിട്ടുണ്ടെന്ന് തുറന്നു സമ്മതിച്ചിരുന്നു. തൃണമൂൽ കോൺഗ്രസിന്‍റെ തേരോട്ടത്തിൽ സിപിഎം സംസ്ഥാനത്ത് അടിപതറിയെങ്കിലും വോട്ടുബാങ്കിൽ കുറവുണ്ടായിരുന്നില്ല.

കൊൽക്കത്ത: പാര്‍ലമെന്‍റ് തെരഞ്ഞെടുപ്പിൽ സംസ്ഥാനത്തെ സിപിഎം വോട്ടുകള്‍ ബിജെപിയിലേയ്ക്ക് ഒഴുകുമെന്ന തൃണമൂൽ കോൺഗ്രസിന്‍റെ ആഭ്യന്തര റിപ്പോര്‍ട്ട് ശരിവെച്ച് തെരഞ്ഞെടുപ്പ് ഫലം. ഒരു സീറ്റു പോലും സംസ്ഥാനത്ത് നേരിടാനാകെ പരാജയപ്പെട്ട സിപിഎമ്മിന് ഒരിടത്തു പോലും രണ്ടാം സ്ഥാനം പോലും ലഭിച്ചില്ല. ലോക്സഭാ തെരഞ്ഞെടുപ്പിന്‍റെ അവസാനഘട്ടത്തിലാണ് തൃണമൂൽ കോൺഗ്രസിന്‍റെ ആഭ്യന്തര റിപ്പോര്‍ട്ട് പുറത്തുവന്നത്.

ബംഗാള്‍ മുൻമുഖ്യമന്ത്രി ബുദ്ധദേബ് ഭട്ടാചാര്യയും സിപിഎം മുൻ ജനറൽ സെക്രട്ടറി പ്രകാശ് കാരാട്ടും തെരഞ്ഞെടുപ്പ് വേളയിൽ സിപിഎം വോട്ടുകള്‍ ബിജെപിയിലേയ്ക്ക് ഒഴുകിയിട്ടുണ്ടെന്ന് തുറന്നു സമ്മതിച്ചിരുന്നു. തൃണമൂൽ കോൺഗ്രസിന്‍റെ തേരോട്ടത്തിൽ സിപിഎം സംസ്ഥാനത്ത് അടിപതറിയെങ്കിലും വോട്ടുബാങ്കിൽ കുറവുണ്ടായിരുന്നില്ല. 2014ൽ പശ്ചിമ ബംഗാളിൽ വെറും രണ്ട് സീറ്റുകള്‍ മാത്രം വിജയിച്ചപ്പോഴും സിപിഎം വോട്ട് ബാങ്കിൽ 30 ശതമാനത്തോളം വോട്ടുകളുണ്ടായിരുന്നു. എന്നാൽ ഇത്തവണ വെറും എട്ട് ശതമാനം വോട്ടാണ് ഇടതുമുന്നണിയ്ക്ക് ലഭിച്ചത്. കഴിഞ്ഞ തെരഞ്ഞെുപ്പിൽ 17 ശതമാനം വോട്ടുമായി രണ്ട് സീറ്റുകള്‍ മാത്രം വിജയിച്ച ബിജെപിയ്ക്കാകട്ടെ ഇത്തവണ 18 സീറ്റും 40.2 ശതമാനം വോട്ടും നേടാനായി.

തൃണമൂൽ കോൺഗ്രസിന്‍റെ ഭീഷണിയിൽ തങ്ങളുടെ പാര്‍ട്ടി കൃത്യമായി പ്രതിരോധം തീര്‍ക്കുന്നില്ലെന്ന വികാരമുണ്ടായ സിപിഎം പ്രവര്‍ത്തകരെ തങ്ങളോട് ചേര്‍ത്തു നിര്‍ത്താൻ ബിജെപിയ്ക്കായി. ബിജെപിയുടെ കരുത്തുറ്റ സംഘടനാസംവിധാനവും കൃത്യമായ ആസൂത്രണവുമാണ് സിപിഎം വോട്ടുകള്‍ കൈക്കലാക്കാൻ ഉപകരിച്ചത്.
പശ്ചിമ ബംഗാള്‍ സംസ്ഥാനഭരണം ലക്ഷ്യമിടുന്ന ബിജെപിയ്ക്ക് ലോക്സഭാ വിജയം അതിനുള്ള കരുത്താകും. വരും നാളുകളിൽ തൃണമൂൽ - ബിജെപി സംഘര്‍ഷം സംസ്ഥാനത്ത് കൊഴുക്കും.