ഇഖാമ പുതുക്കുന്നതിന് കമ്ബനികളുടെ ലൈസന്‍സ് കാലാവധി മാനദണ്ഡമാക്കി കുവൈത്ത്; മലയാളികള്‍ ഉള്‍പ്പെടെ പ്രതിസന്ധിയില്‍

കുവൈത്ത് സിറ്റി: കമ്ബനികള്‍ക്ക് ആറുമാസം ലൈസന്‍സില്ലെങ്കില്‍ തൊഴിലാളികള്‍ക്ക് ഇഖാമ പുതുക്കി നല്‍കില്ലെന്ന് കുവൈത്ത്. താമസകാര്യ വകുപ്പാണ് ഇത് സംബന്ധിച്ച്‌ ഉത്തരവിറക്കിയത്. ഇതോടെ മലയാളികളുടേതടക്കം നിരവധി കമ്ബനികള്‍ പ്രതിസന്ധിയിലായി. തൊഴിലാളികളുടെ ഇഖാമ പുതുക്കുന്നതിന് കമ്ബനികളുടെ ലൈസന്‍സ് കാലാവധി മാനദണ്ഡമാക്കിയതോടെയാണ് കമ്ബനികള്‍ പ്രതിസന്ധിയിലായത്. കമ്ബനികളുടെ ലൈസന്‍സ് കാലാവധി 6 മാസത്തില്‍ കുറവാണെങ്കില്‍ ജീവനക്കാരുടെ ഇഖാമ പുതുക്കി നല്‍കേണ്ടന്നാണ് താമസ കാര്യ വകുപ്പിന്റെ നിലപാട്. വാണിജ്യ മന്ത്രാലയത്തെ സമീപിച്ച്‌ ലൈസന്‍സ് കാലാവധി നീട്ടി വാങ്ങാനാണ് താമസകാര്യ വകുപ്പിന്റെ നിര്‍ദേശം. സാധാരണ ഗതിയില്‍ 3 മുതല്‍ 5 വര്‍ഷം വരെയാണ് വാണിജ്യ ലൈസന്‍സിന്റെ കാലാവധി. കാലാവധി പൂര്‍ത്തിയായതിന് ശേഷമോ തൊട്ടു മുന്‍പോ മാത്രമാണ് ലൈസന്‍സ് പുതുക്കി നല്‍കുന്നത്. എന്നാല്‍ ഇഖാമ നടപടികള്‍ക്ക് തടസം നേരിടുന്നതിനാല്‍ കാലാവധി അവസാനിക്കുന്നതിന് മുന്‍പേ ലൈസന്‍സ് പുതുക്കി നല്‍കണമെന്നാവശ്യപ്പെട്ട് നിരവധി കമ്ബനികള്‍ വാണിജ്യ മന്ത്രാലയത്തെ സമീപിച്ചിട്ടുണ്ട്.