ഇല്ലിനോയി ഉള്‍പ്പെടെ അമേരിക്കയിലെ 22 സംസ്ഥാനങ്ങളിലെ പൊതുമേഖലാ സ്ഥാപനങ്ങളിലെ തൊഴിലാളി സംഘടനകള്‍, സംഘടനയുടെ പ്രവര്‍ത്തനങ്ങളോട് വിയോജിപ്പോ, താല്പര്യമോ ഇല്ലാത്ത ജീവനക്കാരില്‍ നിന്നും നിര്‍ബന്ധിത അംഗത്വഫീസ് പിരിയ്ക്കുന്ന നടപടി യു.എസ്സ്. സുപ്രീംകോടതി നിയമവിരുദ്ധമായി പ്രഖ്യാപിച്ചു. ജൂണ്‍ 27 ബുധനാഴ്ച യു.എസ്സ്. സുപ്രീംകോടതിയിലെ 5 യാഥാസ്ഥിതിക ന്യായാധിപന്മാര്‍ അനുകൂലിച്ചും 4 ലിബറല്‍ ന്യായാധിപര്‍ വിയോജിച്ചും പുറപ്പെടുവിച്ച പ്രസ്തുത നിര്‍ണ്ണായക വിധിന്യായം അമേരിക്കയിലെ തൊഴിലാളി സംഘടനകളുടെ പ്രവര്‍ത്തനങ്ങളെ സാരമായി ബാധിയ്ക്കുമെന്ന് കരുതപ്പെടുന്നു. ദുര്‍ബലമാകുന്ന അമേരിക്കയിലെ തൊഴിലാളി പ്രസ്ഥാനങ്ങള്‍ക്ക് ജാനസ്സ് Vs ഏ.എഫ്.എസ്സ്.സി.എം. ഈ കൗണ്‍സില്‍ 31 കേസ്സിലെ സുപ്രീംകോടതി വിധി മറ്റൊരു പ്രഹരമായി മാറുമെന്ന് പൊതുവേ കരുതപ്പെടുന്നു.