എടിഎമ്മുകളിലും അപേക്ഷ ഫോമുകളിലും തമിഴ് ഭാഷ വേണം; ബാങ്കുകള്‍ക്ക് നിര്‍ദേശം നല്‍കി തമിഴ്നാട് സര്‍ക്കാര്‍

 à´šàµ†à´¨àµà´¨àµˆ: എടിഎമ്മുകളും ബാങ്ക് ഫോമുകളും ഉള്‍പ്പെടെ എല്ലായിടത്തും തമിഴ് ഭാഷ ഉപയോഗിക്കുന്നുണ്ടെന്ന് ഉറപ്പാക്കാന്‍ തമിഴ്‌നാട്  സര്‍ക്കാര്‍ സംസ്ഥാനത്തെ ബാങ്കുകളോട് അഭ്യര്‍ത്ഥിച്ചു.2022-23 സാമ്പത്തിക വര്‍ഷത്തേക്കുള്ള വരാനിരിക്കുന്ന സംസ്ഥാന ബജറ്റിനായി മുന്നോടിയായി വിവിധ ബാങ്ക് അധികൃതരുമായി സര്‍ക്കാര്‍ കൂടിക്കാഴ്ച നടത്തുകയും അവരില്‍നിന്ന് നിര്‍ദേശങ്ങള്‍ തേടുകയും ചെയ്തു. അതിനിടെയാണ് തമിഴ് ഭാഷയുടെ ഉപയോഗം ഉറപ്പാക്കാന്‍ സര്‍ക്കാര്‍ ബാങ്കുകളോട് നിര്‍ദേശിച്ചത്.

സംസ്ഥാന ധനമന്ത്രി പി ടി ആര്‍ പളനിവേല്‍ ത്യാഗ രാജന്‍ തിങ്കളാഴ്ച സെക്രട്ടേറിയറ്റില്‍ പ്രത്യേക സംസ്ഥാന തല ബാങ്കേഴ്സ് കമ്മിറ്റി യോഗം വിളിച്ചു. യോഗത്തില്‍, മുഖ്യമന്ത്രി എം കെ സ്റ്റാലിന്റെ നിര്‍ദ്ദേശപ്രകാരം, എടിഎം, ബാങ്ക് ഫോമുകള്‍ തുടങ്ങി എല്ലാ പൊതു ഇടങ്ങളിലും തമിഴ് ഭാഷ ഉപയോഗിക്കുന്നുണ്ടെന്ന് ഉറപ്പാക്കാന്‍ എല്ലാ ബാങ്കുകളോടും മന്ത്രി അഭ്യര്‍ത്ഥിച്ചു. കൂടാതെ, ബാങ്ക് ഉദ്യോഗസ്ഥരുടെ ആവശ്യകത അദ്ദേഹം ഊന്നിപ്പറഞ്ഞു. ഫ്രണ്ട് ഡെസ്‌ക്കുകളിലും ഹെല്‍പ്പ്‌ലൈന്‍ ഡെസ്‌ക്കുകളിലും തമിഴില്‍ സംസാരിക്കാന്‍ ഉദ്യോഗസ്ഥര്‍ തയ്യാറാകണമെന്നും സര്‍ക്കാര്‍ നിര്‍ദേശം നല്‍കി.

വിവിധ സര്‍ക്കാര്‍ പദ്ധതികളുടെ നടത്തിപ്പിലെ പുരോഗതിയും മന്ത്രി അവലോകനം ചെയ്യുകയും എല്ലാ മുന്‍ഗണനാ മേഖലയിലെ വായ്പാ പദ്ധതികളും വേഗത്തിലാക്കാനും സമൂഹത്തിലെ പാവപ്പെട്ട വിഭാഗങ്ങളിലെ വിദ്യാര്‍ത്ഥികള്‍ക്ക് വിദ്യാഭ്യാസ വായ്പകള്‍ നല്‍കാനും ബാങ്കുകളോട് അഭ്യര്‍ത്ഥിച്ചു. ബാങ്കില്ലാത്ത വിദൂര പ്രദേശങ്ങളില്‍, പ്രത്യേകിച്ച്‌ വനപ്രദേശങ്ങളിലും ആദിവാസി മേഖലകളിലും ബാങ്കിംഗ് സേവനം ഉറപ്പാക്കാന്‍ അദ്ദേഹം ബാങ്കുകളോട് അഭ്യര്‍ത്ഥിച്ചു.

ഒരു മാസം മുമ്ബ്, എഴുത്തുകാരിയും ഗവേഷകയുമായ സുചിത്ര വിജയന്‍, നഗരത്തിലെ ഒരു സ്വകാര്യ ബാങ്കിലെ ഫോമുകളെല്ലാം ഹിന്ദിയിലാണെന്നും അവ പൂരിപ്പിക്കാന്‍ അമ്മ ബുദ്ധിമുട്ടുന്നുവെന്നും ട്വിറ്ററില്‍ പരാതിപ്പെട്ടിരുന്നു. തങ്ങളുടെ പ്രാദേശിക ടീം ഉപഭോക്താവിനെ ബന്ധപ്പെടുകയും പ്രശ്നം പരിഹരിക്കാന്‍ ആവശ്യമായ നടപടികള്‍ കൈക്കൊള്ളുകയും ചെയ്തതായി ബാങ്ക് പിന്നീട് അറിയിച്ചിരുന്നു.