ന്യൂഡല്‍ഹി: കോവിഡിന്‍റെ ഒമിക്രോണ്‍ വകഭേദത്തെ പ്രതിരോധിക്കാന്‍ ശാസ്ത്രീയമായ സമീപനങ്ങള്‍ രാജ്യങ്ങള്‍ സ്വീകരിക്കണമെന്ന്​ ലോകാരോഗ്യസംഘടന മുഖ്യ ശാസ്ത്രജ്ഞ സൗമ്യ സ്വാമിനാഥന്‍.

രാത്രി കര്‍ഫ്യു എന്നത്​ ശാസ്ത്രീയമായ സമീപനമല്ലെന്നും അതിന്‍റെ ഫലപ്രാപ്തി ഇതുവരെ തെളിയിക്കപ്പെട്ടിട്ടില്ലെന്നും അവര്‍ പറഞ്ഞു. സി.എന്‍.ബി.സി-ടി.വി 18ക്ക്​ നല്‍കിയ അഭിമുഖത്തിലാണ്​ അവരുടെ പരാമര്‍ശം.നമ്മള്‍ ജാഗ്രത പുലര്‍ത്തേണ്ട സമയമാണ്​. ഒരിക്കലും പരി​​ഭ്രാന്തരാകരുത്​. ഇന്ത്യയില്‍ ഒമിക്രോണ്‍ കേസുകളുടെ വര്‍ധന പ്രതീക്ഷിക്കാം. ഇത്​ തുടക്കം മാത്രമാണ്​ പല നഗരങ്ങളിലും കോവിഡിന്‍റെ വ്യാപനം ഇനിയും ഉണ്ടായേക്കാം. ഒമിക്രോണുമായി ബന്ധപ്പെട്ട്​ രാജ്യങ്ങള്‍ സാഹചര്യങ്ങള്‍ വിലയിരുത്തണം. കോവിഡ്​ ബാധിച്ച്‌​ മരിച്ചവര്‍ ഏത്​ വാക്സിനാണ്​ സ്വീകരിച്ചതെന്ന്​ പരിശോധിക്കണം. എത്രകാലം മുൻപ് ​അവര്‍ വാക്സിന്‍ സ്വീകരിച്ചുവെന്നതും നോക്കണം.ബൂസ്റ്റര്‍ ഡോസ്​ നല്‍കേണ്ടത്​ ഏത്​ വിഭാഗത്തിനാണെന്നും അതാത്​ രാജ്യങ്ങള്‍ തീരുമാനിക്കണം.

നിലവില്‍ ജനങ്ങള്‍ക്ക്​ നല്‍കിയിരിക്കുന്ന വാക്സിനുകളുടെ ആന്‍റിബോഡിയുടെ ശേഷി ആറ്​ മാസം കഴിയുമ്പോള്‍ കുറയുമെന്നാണ്​ കണക്കാക്കുന്നതെന്നും അവര്‍ പറഞ്ഞു. രോഗം ഏറ്റവും കൂടുതല്‍ ബാധിക്കാന്‍ സാധ്യതയുള്ള വിഭാഗത്തിന് ബൂസ്റ്റര്‍ ഡോസ്​​ വാക്സിന്‍ നല്‍കണമെന്നാണ്​ ലോകാരോഗ്യസംഘടനയുടെ നിലപാട്​. എല്ലാ വിഭാഗം ജനങ്ങള്‍ക്ക്​ വാക്സിന്‍ നല്‍കണമെന്നത്​ സംബന്ധിച്ച്‌​ പഠനഫലങ്ങളൊന്നും പുറത്ത്​ വന്നിട്ടില്ല.

ഒമിക്രോണ്‍ തടയാനുള്ള നിയന്ത്രണങ്ങള്‍ ഏര്‍പ്പെടുത്തുമ്പോള്‍ രോഗബാധ തടയുന്നതിനൊപ്പം സമ്പദ്​വ്യവസ്ഥയേയും പരിഗണിക്കണം. കോവിഡ്​ കേസുകള്‍ കൂടുമ്ബോള്‍ ആദ്യം സ്കൂളുകള്‍ അടക്കുകയെന്ന സമീപനം ശരിയല്ല. നിയന്ത്രണം ഏര്‍പ്പെടുത്തുമ്ബോള്‍ അവസാനം അടക്കേണ്ടത്​ സ്കൂളുകളാ​ണ്​. സ്കൂളുകള്‍ ആദ്യം അടച്ചാല്‍ അത്​ കുട്ടികളുടെ വിദ്യാഭ്യാസത്തെ ഗുരുതരമായി ബാധിക്കുമെന്നും അവര്‍ പറഞ്ഞു. ബൂസ്റ്റര്‍ ഡോസിന്​ വ്യത്യസ്ത വാക്സിന്‍ തെരഞ്ഞെടുക്കുന്നത്​ ഗുണം ചെയ്യുമെന്നും ഡോ.സൗമ്യ സ്വാമിനാഥന്‍ കൂട്ടിച്ചേര്‍ത്തു.