മസ് ജിദിനുള്ളില്‍ കൃഷ്ണ വിഗ്രഹം സ്ഥാപിക്കുമെന്ന് ഹിന്ദു മഹാസഭയുടെ ഭീഷണി ; മഥുരയില്‍ നിരോധനാജ്​ഞ

മഥുര: ഷാഹി ഈദ്ഗാഹ്​ മസ്​ജിദില്‍ ശ്രീകൃഷ്ണ വിഗ്രഹം സ്ഥാപിക്കുമെന്ന് ഭീഷണി ഉയര്‍ത്തി അഖില ഭാരത് ഹിന്ദു മഹാസഭ.ഡിസംബര്‍ 6 ന് ഷാഹി ഈദ്ഗാഹില്‍ മഹാജലാഭിഷേകത്തിന് ശേഷം കൃഷ്ണ വിഗ്രഹം സ്ഥാപിക്കുമെന്ന് ഹിന്ദു മഹാസഭ നേതാവ് രാജ്യശ്രീ ചൗധരി വ്യക്തമാക്കിയിരുന്നു .

പള്ളി പൊളിക്കണമെന്നാവശ്യപ്പെട്ട് വിശ്രം ഘട്ടില്‍ നിന്ന് ശ്രീകൃഷ്ണ ജന്മസ്ഥാനിലേക്ക് മാര്‍ച്ച്‌ നടത്തുമെന്ന് തീവ്ര ഹിന്ദുത്വ സംഘടനയായ നാരായണി സേനയും പ്രഖ്യാപിച്ചിരുന്നു. ഇതേതുടര്‍ന്ന്​ മഥുര ജില്ലാ ഭരണകൂടം സി.ആര്‍.പി.സി സെക്​ഷന്‍ 144 പ്രകാരം ജില്ലയില്‍ നിരോധന ഉത്തരവ് ഏര്‍പ്പെടുത്തി.

മഥുരയിലെ കത്ര കേശവ് ദേവ് ക്ഷേത്രത്തിന് സമീപത്തുള്ള ഷാഹി ഈദ്ഗാഹ്​ മസ്​ജിദ്​ സ്ഥിതി ചെയ്യുന്ന സ്ഥലമാണ് ശ്രീകൃഷ്ണന്‍റെ ‘യഥാര്‍ത്ഥ ജന്മസ്ഥല’മെന്നാണ് ഹിന്ദു മഹാസഭ അവകാശവാദം ഉന്നയിക്കുന്നത് . 17 ആം നൂറ്റാണ്ടില്‍ നിര്‍മിച്ചതാണ്​ ഈ പള്ളി. പള്ളി പൊളിക്കണമെന്നാവശ്യപ്പെട്ട്​ ഹിന്ദുത്വ സംഘടനകള്‍ പ്രാദേശിക കോടതികളെ സമീപിച്ചിരുന്നു. ഈ ഹര്‍ജികള്‍ കോടതി പരിഗണണനയിലിരിക്കെയാണ്​ പള്ളിയില്‍ കൃഷ്​ണ വിഗ്രഹം സ്​ഥാപിക്കുമെന്ന ഭീഷണിയുമായി ഹിന്ദു മഹാസഭ രംഗത്തെത്തിയത് .

പള്ളി തകര്‍ക്കാനാവശ്യപ്പെട്ട നാരായണി സേനയുടെ സെക്രട്ടറി അമിത് മിശ്രയെ മഥുര കോട്‌വാലിയില്‍ കരുതല്‍ തടങ്കലിലാക്കിയതായി പൊലീസ് അറിയിച്ചു. അതേസമയം, മഥുരയിലെ സമാധാനം തകര്‍ക്കാന്‍ ആരെയും അനുവദിക്കില്ലെന്ന് ജില്ലാ മജിസ്ട്രേറ്റ് നവനീത് സിങ്​ ചാഹല്‍ പറഞ്ഞു.

കത്ര കേശവ് ദേവ് ക്ഷേത്രം, ഷാഹി ഈദ്ഗാഹ്​ എന്നീ ആരാധനാലയങ്ങളുടെ സുരക്ഷാകാര്യങ്ങള്‍ സീനിയര്‍ പൊലീസ് സൂപ്രണ്ട് ഗൗരവ് ഗ്രോവറുമായി ചേര്‍ന്ന് അവലോകനം ചെയ്തതായി നവനീത് സിങ്​ ചാഹല്‍ പറഞ്ഞു.മസ്ജിദില്‍ വിഗ്രഹം സ്ഥാപിക്കാന്‍ മഹാസഭ അനുമതി തേടിയെന്ന കാര്യം അദ്ദേഹം സ്​ഥിരീകരിച്ചു. എന്നാല്‍, പ്രസ്​തുത ആവശ്യം അംഗീകരിക്കില്ല. സമാധാനം തകര്‍ക്കാന്‍ സാധ്യതയുള്ള ഒരുപരിപാടിക്കും അനുമതി നല്‍കുന്ന പ്രശ്​നമേയില്ലന്നും ചാഹല്‍ കൂട്ടിച്ചേര്‍ത്തു.