പ്രളയ ദുരന്തം ; തമിഴ്​നാട്ടില്‍ 50,000 ഹെക്​ടറില്‍ കൃഷി നാശം

ചെന്നൈ: അതി തീവ്ര മഴയെ തുടര്‍ന്നുണ്ടായ തമിഴ്​നാട്ടില്‍ വ്യാപക കൃഷിനാശം. പേമാരിയില്‍ 50,000 ഹെക്​ടറില്‍ വ്യാപിച്ചുകിടക്കുന്ന കൃഷി ന​ശിച്ചതായാണ്​ റിപ്പോര്‍ട്ട് .മണ്‍സൂണ്‍ സീസണില്‍ ലഭിക്കുന്ന മഴയേക്കാള്‍ 68 ശതമാനം അധികമാണ്​ തമിഴ്​നാട്ടില്‍ പെയ്​ത മഴ.

ഇതേ തുടര്‍ന്നാണ് വ്യാപക കൃഷി നാശം .

ചെന്നൈ, കന്യാകുമാരി, തൂത്തുക്കുടി, വില്ലുപുരം കൂടല്ലൂര്‍, മധ്യ തമിഴ്നാട്ടിലെ ഡെല്‍റ്റ പ്രദേശങ്ങള്‍ എന്നിവിടങ്ങളിലാണ്​ മഴ കനത്ത നാശം വിതച്ചത്​. ഒക്​ടോബറില്‍ തുടങ്ങിയ മഴയില്‍ 2300 ലേറെ വീടുകള്‍​ സംസ്​ഥാനത്ത് ഇതുവരെ​ തകര്‍ന്നു. നവംബര്‍ രണ്ടാംവാരത്തില്‍ മഴ വീണ്ടും കനത്തതോടെ സംസ്​ഥാനത്തിന്‍റെ മൂന്നില്‍ രണ്ടുഭാഗവും വെള്ളത്തിനടിയിലാകുകയും ചെയ്​തു. സംസ്​ഥാനത്തെ ജലസംഭരണികളെല്ലാം നിറഞ്ഞൊഴുകി .നാഗപട്ടണം ജില്ലയിലെ കൃഷിക്കാരനായ രാസപ്പന്‍ പാട്ടത്തിനെടുത്ത 15 ഏക്കറിലെ വിളവെടുക്കാറായ നെല്‍കൃഷിയാണ്​ നശിച്ചത്​.

‘എല്ലാ വിളകളും നശിച്ചു. കടം കയറിയതോടെ ആഭരണങ്ങളെല്ലാം ബാങ്കില്‍ പണയംവെച്ചു. സര്‍ക്കാര്‍ സഹായം നല്‍കിയാല്‍ അവ തിരിച്ചെടുക്കാനും വീണ്ടും കൃഷിയിറക്കാനും സാധിക്കും. അല്ലെങ്കില്‍ ഭൂമി തരിശായി കിടക്കും’ -രാസപ്പന്‍ പ്രമുഖ ദേശീയ മാധ്യമത്തോട് പറഞ്ഞു.

അതെ സമയം പ്രളയ ദുരന്തത്തിന് പിന്നാലെ കേന്ദ്രസര്‍ക്കാറിനോട്​ സംസ്​ഥാനം 2600 കോടിയുടെ ദുരിതാശ്വാസ സഹായം ആവശ്യപ്പെട്ടിരുന്നു. ഈ സാഹചര്യത്തില്‍ ​ നാശനഷ്​ടങ്ങള്‍ വിലയിരുത്തുന്നതിനായി കേന്ദ്രസംഘം ​നാലു ദിവസത്തെ സന്ദര്‍ശനത്തിനായി സംസ്​ഥാനത്തെത്തിയിട്ടുണ്ട് .