മുന്നറിയിപ്പില്ലാതെ തമിഴ്നാട് ആളിയാര്‍ ഡാം തുറന്നുവിട്ടു; പാലക്കാട് പുഴകള്‍ നിറഞ്ഞൊഴുകുന്നു

പാലക്കാട്: ആളിയാര്‍ ഡാം തുറന്നുവിട്ടു. ഇന്നലെ രാത്രി 11 മണിയോട് കൂടിയാണ് ആളിയാര്‍ ഡാം തുറന്നത്. അണക്കെട്ട് തുറക്കുന്നതിന് മുമ്ബ് തമിഴ്നാട് മുന്നറിയിപ്പ് നല്‍കിയില്ലെന്നാണ് പരാതി.

അതേസമയം ജലവിഭവ വകുപ്പ് ഉദ്യോഗസ്ഥര്‍ക്ക് ഇന്നലെത്തന്നെ വിവരം കൈമാറിയെന്നാണ് തമിഴ്നാട് അവകാശപ്പെടുന്നത്. സെക്കന്‍റില്‍ ആറായിരം ക്യൂസെക്സ് വെള്ളം തുറന്നുവിടുമെന്ന് ഇന്നലെ തന്നെ ജലവിഭവ വകുപ്പ് ഉദ്യോഗസ്ഥര്‍ക്ക് വിവരം നല്‍കിയെന്നാണ് തമിഴ്‍നാട് അവകാശപ്പെടുന്നത്.

ആളിയാര്‍ അണക്കെട്ട് തുറന്നതോടെ പാലക്കാട്ടെ പുഴകളില്‍ കുത്തൊഴുക്കാണ്. ചിറ്റൂര്‍ പുഴ നിറഞ്ഞൊഴുകുന്നു. യാക്കരപ്പുഴയിലേക്ക് അധിക വെള്ളമെത്തി. ചിറ്റൂരിലും സമീപ പ്രദേശത്തുമുള്ളവര്‍ക്ക് പ്രാദേശിക ഭരണകൂടം മുന്നറിയിപ്പ് നല്‍കിയിട്ടുണ്ട്. പുഴയുടെ കരയിലുള്ളവര്‍ ജാഗ്രത പാലിക്കണം.