റാംനഗര്‍ ഗഡായി (മധ്യപ്രദേശ്): ദലിത്​ കര്‍ഷക കുടുംബത്തിലെ പത്ത്​ മാസം പ്രായമായ കുഞ്ഞിനെ പൊലീസ്​ ലാത്തി കൊണ്ടടിച്ച്‌​ കൊലപ്പെടുത്തിയതായി കുടുംബം.

മധ്യപ്രദേശ്​ നര്‍വാര്‍ തെഹ്‌സിലിലെ വിദൂര ഗ്രാമമായ രാംനഗര്‍ ഗഡായിയിലാണ്​ സംഭവം.

ഗ്രാമത്തിലെ മലിനജലം ഒഴുക്കി വിടാന്‍ കാനകള്‍ നിര്‍മിക്കുന്നതിന്‍റെ ഭാഗമായി നടന്ന തര്‍ക്കങ്ങളാണ്​ പൊലീസ്​ ഇടപെടലിലും കുഞ്ഞിന്‍റെ മരണത്തിനും കാരണമായത്​. ശിവപുരി ജില്ലയില്‍ നിന്ന് 60 കിലോമീറ്റര്‍ അകലെയാണ്​ ഗ്രാമം. പുതിയ കാന പണിതിരിക്കുന്നത്​ തങ്ങളുടെ കൃഷിയിടത്തിലേക്ക്​ മലിന ജലം ഒഴുകിയെത്തുന്ന തരത്തിലാണെന്ന്​ ആരോപിച്ച്‌​ കുടുംബത്തിലെ അശോക്​ എന്നയാള്‍ പരാതിപ്പെട്ടിരുന്നു.ഇതാണ്​ സംഭവത്തിന്‍റെ തുടക്കം. ഗ്രാമത്തിലെ പ്രധാന പാതയോരത്താണ്​ ജാതവരായ ഇവരുടെ വീട്​. അശോകിന്​ മൂന്ന്​ സഹോദരങ്ങളാണ്​. ദയാറാം ജാതവ്, കല്ലറം ജാതവ്, ഹരുറാം ജാതവ് എന്നിവര്‍ അടുത്തടുത്തുള്ള ചെറിയ വീടുകളിലാണ്​ താമസിക്കുന്നത്​. മൂന്ന് തലമുറകളിലായി കുടുംബത്തില്‍ ആകെ 45 അംഗങ്ങളുണ്ട്. എല്ലാവരും കൃഷിയെ ആശ്രയിച്ച്‌ ജീവിക്കുന്നു. 100 മീറ്റര്‍ അകലെയാണ് ഇവരുടെ കൃഷിയിടങ്ങള്‍. ജാതവ് കുടുംബവും പൊലീസും തമ്മിലുള്ള സംഘര്‍ഷം നവംബര്‍ ആദ്യ ആഴ്ച മൂര്‍ച്ഛിച്ചിരുന്നു.

കാന നിര്‍മാണം തടഞ്ഞതിന്​ പൊലീസ്​ എത്തി ഇവരെ ലാത്തിച്ചാര്‍ജ്​ നടത്തി തുരത്താന്‍ ശ്രമിച്ചു. സ്​ത്രീകള്‍ക്കും കുട്ടികള്‍ക്കും അടക്കം ലാത്തിച്ചാര്‍ജില്‍ ഗുരുതരമായി പരിക്കേറ്റു. ഇതിനിടെ 10 മാസം പ്രായമുള്ള ശിവ എന്ന കുഞ്ഞിനും ലാത്തിയടിയേറ്റതായും ആശുപത്രിയിലെത്തിച്ചെങ്കിലും കുഞ്ഞ്​ മരിച്ചിരുന്നുവെന്നും ബന്ധുക്കള്‍ മാധ്യമങ്ങളോട്​ പറഞ്ഞു. ഞങ്ങള്‍ ഒരുപാട് അനീതി നേരിട്ടിട്ടുണ്ട്.

ഞങ്ങളെ സഹായിക്കാന്‍ ആരുമില്ല -ശിവയുടെ മുത്തച്ഛന്‍ 70കാരനായ ദയാറാം ജാതവ് മാധ്യമ പ്രവര്‍ത്തകരോട്​ പറഞ്ഞു. ഞങ്ങളുടെ കൃഷിയിടത്തിന് തൊട്ടുമുമ്ബ് ഒരു കലുങ്ക് നിര്‍മ്മിച്ചിട്ടുണ്ട്. അത് ഗ്രാമത്തില്‍ നിന്ന് ഞങ്ങളുടെ ഭൂമിയിലേക്ക് വെള്ളത്തെ തിരിച്ചുവിടും -ശിവയുടെ അച്ഛന്‍ അശോക് പറയുന്നു. ഇത് യഥാര്‍ത്ഥ നിര്‍മ്മാണ പദ്ധതിയില്‍ ഇല്ലായിരുന്നു. അധികൃതര്‍ അംഗീകരിച്ച ഡ്രോയിംഗില്‍ ഇത്തരമൊരു കലുങ്ക് ഇല്ലെന്ന് കുറച്ച്‌ ദിവസങ്ങള്‍ക്ക് മുമ്ബ് റോഡ് നിര്‍മാണത്തിന്‍റെ ചുമതലയുള്ള കരാറുകാരനും ഞങ്ങളെ അറിയിച്ചിരുന്നു.