തിരുവനന്തപുരത്ത് അതിശക്തമായ മഴ തുടരുന്നു; വാമനപുരത്ത് ഉരുള്‍ പൊട്ടി

വാമനപുരം പുഴയില്‍ ജനിരപ്പ് ഉയര്‍ന്നു. വിതുര, പൊന്മുടി, നെടുമങ്ങാട് മേഖലകളില്‍ കനത്ത മഴ ഇപ്പോഴും തുടരുകയാണ്. മഴക്കെടുതി നേരിടാന്‍ തിരുവനന്തപുരത്ത് കണ്‍ട്രോള്‍ റൂം സജ്ജമാക്കി. എല്ലാ മുന്‍കരുതലുകളും സ്വീകരിച്ചെന്ന് ജില്ലാ കളക്ടര്‍ വ്യക്തമാക്കി. ഇതിനിടെ തിരുവനന്തപുരം മാമ്ബഴക്കരയില്‍ മണ്ണിടിഞ്ഞ് വീണ് ഫാമിലെ 25 ആടുകള്‍ ചത്തു. മാമ്ബഴക്കര സ്വദേശി രാജന്റെ ഉടമസ്ഥതയിലുള്ള ഫാമിലേക്കാണ് മണ്ണിടിഞ്ഞ് വീണത്. ഇന്ന് ഉച്ചയോടെയാണ് സംഭവം ഉണ്ടായത്. അതിശക്തമായ മഴ തുടരുന്ന സാഹചര്യത്തില്‍ ജില്ലയില്‍ റെഡ് അലേര്‍ട്ട് പ്രഖ്യാപിച്ചിരിക്കുകയാണ്. മലയോര മേഖലയില്‍ മണ്ണിടിഞ്ഞും വെള്ളം കയറിയും ജനജീവിതം ദുസ്സഹമായി. പാറശ്ശാലയില്‍ റെയില്‍വേ ട്രാക്കില്‍ മണ്ണിടിഞ്ഞുവീണതിനെ തുടര്‍ന്ന് രണ്ട് ട്രെയിനുകള്‍ പൂര്‍ണമായും ആറുട്രെയിനുകള്‍ ഭാഗികമായും റദ്ദാക്കി.