കോവിഡ്​ രോഗികളുടെ എണ്ണത്തില്‍ വര്‍ധന; ഭാഗിക ലോക്​ഡൗണ്‍ ഏര്‍പ്പെടുത്തി നെതര്‍ലാന്‍ഡ്​

ആംസ്റ്റര്‍ഡാം: കോവിഡ്​ രോഗികളുടെ എണ്ണം ഉയര്‍ന്നതോടെ ഭാഗിക ലോക്​ഡൗണ്‍ ഏര്‍പ്പെടുത്തി നെതര്‍ലാന്‍ഡ്​. കാവല്‍ പ്രധാനമന്ത്രി മാര്‍ക്ക്​ റൂ​ട്ടെയാണ്​ ലോക്​ഡൗണ്‍ ഏര്‍പ്പെടുത്തുന്ന വിവരം അറിയിച്ചത്​.

മൂന്നാഴ്ചത്തേക്കാവും നിയന്ത്രണങ്ങള്‍ ഏര്‍പ്പെടുത്തുക.

ശനിയാഴ്ച രാത്രിയാണ്​ ലോക്​ഡൗണ്‍ ആരംഭിക്കുക. കോവിഡ്​ കേസുകളില്‍ വീണ്ടും വര്‍ധനയുണ്ടായതിനെ തുടര്‍ന്ന്​ ലോക്​ഡൗണ്‍ ഏര്‍പ്പെടുത്തിയ ആദ്യ പടിഞ്ഞാറന്‍ യുറോപ്യന്‍ രാജ്യമാണ്​ നെതര്‍ലാന്‍ഡ്​. ലോക്​ഡൗണ്‍ കാലയളവില്‍ ബാറുകളും ​റസ്റ്ററന്‍റുകളും സൂപ്പര്‍മാര്‍ക്കറ്റുകളും എട്ട്​ മണിക്ക്​ അടക്കണമെന്ന്​ സര്‍ക്കാര്‍ ഉത്തരവിട്ടു. കായിക മത്സരങ്ങള്‍ അടച്ചിട്ട സ്​റ്റേഡിയങ്ങളില്‍ നടത്തണം. ആവശ്യവസ്​തുക്കളല്ലാത്തവ വില്‍ക്കുന്ന കടകള്‍ ആറ്​ മണിക്ക്​ അടക്കണമെന്നും സര്‍ക്കാര്‍ അറിയിച്ചു. സന്തോഷകരമല്ലാത്ത വാര്‍ത്ത അറിയിക്കാനുണ്ടെന്ന്​ പറഞ്ഞായിരുന്നു നെതര്‍ലാന്‍ഡ്​ പ്രധാനമന്ത്രി ലോക്​ഡൗണ്‍ പ്രഖ്യാപിച്ചത്​.

നെതര്‍ലാന്‍ഡ്​-നോര്‍വേ ലോകകപ്പ്​ യോഗ്യത മത്സരം അടച്ചിട്ട സ്​റ്റേഡയത്തിലാവും നടക്കുക. 16,364 പേര്‍ക്കാണ്​ കഴിഞ്ഞ ദിവസം നെതര്‍ലാന്‍ഡ്​സില്‍ കോവിഡ്​ ബാധിച്ചത്​. ഇതാദ്യമായാണ്​ നെതര്‍ലാന്‍ഡ്​സില്‍ പ്രതിദിന കോവിഡ്​ രോഗികളുടെ എണ്ണം ഇത്രയും ഉയരുന്നത്​. 18,000ത്തോളം പേര്‍ ഇതുവരെ നെതര്‍ലാന്‍ഡ്​സില്‍ കോവിഡ്​ ബാധിച്ച്‌​ മരിച്ചിരുന്നു.

യുറോപ്പിലെ ചില രാജ്യങ്ങള്‍ കോവിഡിന്‍റെ കാര്യത്തില്‍ മോശം അവസ്ഥയിലേക്ക്​ പോവുകയാണെന്ന്​ ലോകാരോഗ്യ സംഘടന എമര്‍ജന്‍സീസ്​ തലവന്‍ ഡോ മൈക്കിള്‍ റയാന്‍ മുന്നറിയിപ്പ്​ നല്‍കിയിരുന്നു. യുറോപ്യന്‍ രാജ്യങ്ങള്‍ ഹൃസ്വകാലത്തേക്ക്​ എങ്കിലും നിയന്ത്രണങ്ങള്‍ ഏര്‍പ്പെടുത്താന്‍ തയാറാവണമെന്ന്​ അദ്ദേഹം ആവശ്യപ്പെട്ടിരുന്നു.