എണ്ണ ഉല്‍പാദനം വര്‍ധിപ്പിക്കണമെന്ന ബൈഡന്‍റെ ആവശ്യം തള്ളി ഒപെക് രാജ്യങ്ങൾ

അടിയന്തരമായി ഉല്‍പാദനം വര്‍ധിപ്പിക്കണമെന്ന അമേരിക്കന്‍ പ്രസിഡന്‍റ് ജോ ബൈഡ​ന്‍റെ അഭ്യര്‍ഥന എണ്ണ ഉല്‍പാദക രാജ്യങ്ങളുടെ കൂട്ടായ്​മയായ ഒപെക്​ തള്ളി.

വിപണിയുടെ സുസ്​ഥിരതക്കും സന്തുലിതാവസ്​ഥക്കും അത്​ ഗുണം ചെയ്യില്ലെന്നും ഒപെക്​ മന്ത്രിതല യോഗം വ്യക്​തമാക്കി. അതേസമയം പ്രതിദിന എണ്ണ ഉല്‍പാദനത്തില്‍ ആവശ്യകത മുന്‍നിര്‍ത്തി നേരിയ വര്‍ധനയെന്ന നേരത്തെയുള്ള തീരുമാനത്തില്‍ മാറ്റമില്ല.

ഒപെക്​ രാജ്യങ്ങളുടെ ഇരുപത്തിരണ്ടാമത്​ മന്ത്രിതല യോഗമാണ്​ ഉല്‍പാദനം അടിയന്തരമായി ഉയര്‍ത്തേണ്ട സാഹചര്യം ഇല്ലെന്ന്​ വിലയിരുത്തിയത്​. കുതിച്ചുയരുന്ന എണ്ണവില പിടിച്ചു നിര്‍ത്താല്‍ ഗണ്യമായ ഉല്‍പാദന വര്‍ധനവിന്​ ഒപെക്​ തയ്യാറാകണം എന്നായിരുന്നു യു.എസ്​ പ്രസിഡന്‍റ്​ ജോ ബൈഡ​ന്‍റെ അഭ്യര്‍ഥന. പ്രധാന എണ്ണ ഉല്‍പാദക രാജ്യങ്ങളായ സൗദി അറേബ്യ, യു.എ.ഇ എന്നിവ ഉല്‍പാദനം ഉയര്‍ത്താന്‍ മടിക്കരുതെന്നും ബൈഡന്‍ ആവശ്യപ്പെട്ടിരുന്നു. ജപ്പാന്‍, ഇന്ത്യ എന്നീ രാജ്യങ്ങളും ഉല്‍പാദനം ഉയര്‍ത്തി വില നിയന്ത്രിക്കണമെന്ന്​ ഒപെകിനോട്​ നിര്‍ദേശിച്ചിരുന്നു.

അടുത്ത മാസം മുതല്‍ പ്രതിദിന ഉല്‍പാദനത്തില്‍ നാല്​ ലക്ഷം ബാരലി​ന്‍റെ വര്‍ധനക്ക്​ ഒപെക്​ നേതൃയോഗം ആഗസ്​തില്‍ തീരുമാനിച്ചതാണ്​. 2022 വരെ തല്‍സ്​ഥിതി തുടരുമെന്ന്​ ഒപെക്​ രാജ്യങ്ങള്‍ക്കൊപ്പം റഷ്യയും വ്യക്​തമാക്കി. ഒപെക്​ തീരുമാനത്തോടെ എണ്ണവിപണിയില്‍ വിലയിടിവിന്‍റെ സാഹചര്യം മങ്ങി. കോവിഡ്​ പ്രതിസന്ധി കുറഞതോടെ ഉല്‍പാദന മേഖലയില്‍ രൂപപ്പെട്ട ഉണര്‍വും എണ്ണയുടെ ആവശ്യകത ഉയര്‍ത്തുകയാണ്​. ആഗോളവിപണിയില്‍ ബാരലിന്​ 81 ഡോളര്‍ എന്ന 2014നു ശേഷമുള്ള ഉയര്‍ന്ന നിരക്കിലാണ്​ എണ്ണവില്‍പന. വിലവര്‍ധന തുടരുന്നത്​ ഇന്ത്യ ഉള്‍പ്പെടെ ഇറക്കുമതി രാജ്യങ്ങള്‍ക്ക്​ വലിയ തിരിച്ചടിയാകും.