ഓരോ വീട്ടിലും എത്തി വാക്‌സിന്‍ നല്‍കണം; കോവിഡ് പോരാട്ടത്തില്‍ അലംഭാവം അരുതെന്ന് പ്രധാനമന്ത്രി

ന്യൂഡല്‍ഹി: വാക്‌സിന്‍ വിതരണം കുറവുള്ള പ്രദേശങ്ങളില്‍ വീടു വീടാന്തരം കയറിയിറങ്ങി വാക്‌സിനേഷന്‍ നടത്തണമെന്ന് പ്രധാനമന്ത്രി നരേന്ദ്ര മോദി.

എല്ലാ വീട്ടിലും വാക്‌സിന്‍, വീടുകള്‍ തോറും വാക്‌സിന്‍ എന്നതായിരിക്കണം പുതിയ മുദ്രാവാക്യമെന്ന് മോദി പറഞ്ഞു. വാക്‌സിനേഷനില്‍ പിന്നാക്കം നില്‍ക്കുന്ന ജില്ലകളിലെ ആരോഗ്യപ്രവര്‍ത്തകരെ അഭിസംബോധന ചെയ്യുകയായിരുന്നു പ്രധാനമന്ത്രി.

വാക്‌സിന് എതിരായ തെറ്റിദ്ധാരണകളും ഊഹാപോഹങ്ങളുമെല്ലാം പല രീതിയില്‍ പ്രചരിക്കുന്നുണ്ട്. ഇതിനെതിരെ ആളുകളെ ബോധവത്കരണം നടത്തുകയെന്നതാണ് പ്രധാനമായ പരിഹാരം. ഇതിനായി ആത്മീയ നേതാക്കളുടെ സഹായം തേടാവുന്നതാണെന്ന് പ്രധാനമന്ത്രി പറഞ്ഞു.

രോഗത്തെയും ശത്രുവിനെയും കുറച്ചുകാണരുത്

രോഗങ്ങളെയും ശത്രുവിനെയും ഒരിക്കലും കുറച്ചുകാണരുത്. അവയ്‌ക്കെതിരായ പോരാട്ടം അവസാനം വരെ കൊണ്ടുപോവേണ്ടതുണ്ട്. അതുകൊണ്ടുതന്നെ കോവിഡിന് എതിരായ പോരാട്ടത്തില്‍ ഒരു ലാഘവവും പാടില്ല.