തോട്ടം ഭൂമി തരംമാറ്റല്‍; ഇരുട്ടില്‍തപ്പി സര്‍ക്കാര്‍, പാട്ടം എന്ന നിലയില്‍ നഷ്ടമായത് കോടികള്‍

പാട്ടം അടക്കേണ്ട ഭൂമിക്ക് പല തോട്ടം ഉടമകളും നികുതിയാണ് അടക്കുന്നത്. അതിന് അവസരമൊരുക്കിയത് റവന്യൂ ഉദ്യോഗസ്ഥരുടെ കെടുകാര്യസ്ഥതയും അഴിമതിയുമാണ്. ഇളവ് നല്‍കിയ ഭൂമി സംബന്ധിച്ച്‌ താലൂക്ക് ലാന്‍ഡ് ബോര്‍ഡുകള്‍ കണക്ക് തയാറാക്കണമെന്ന് ലാന്‍ഡ് റവന്യൂ കമ്മീഷമര്‍ നേരത്തെ നിര്‍ദേശം നല്‍കിയെങ്കിലും ഉദ്യോഗസ്ഥര്‍ അതൊന്നും തയാറാക്കിയില്ല. പല താലൂക്ക് ലാന്‍ഡ് ബോര്‍ഡുകളിലും ഇത് സംബന്ധിച്ച്‌ ഫയലുകള്‍ സൂക്ഷിച്ചിട്ടില്ലെന്നാണ് മറുപടി നല്‍കുന്നത്. ക്രയ സര്‍ട്ടിഫിക്കറ്റ് നേടാതെ ഭൂമി കൈവശം വെച്ചരിക്കുന്ന തോട്ടം ഉടമകളുമുണ്ട്.

ഉദാഹരണമായി റവന്യൂ വകുപ്പ് 2021 ഒക്ടോബര്‍ 28ലെ ഉത്തരവ് നോക്കുക. ഭാരത് പെട്രോളിയത്തിന് പമ്ബ് നടത്തുന്നതിന് ഭൂമി നല്‍കിയതിന് മൂന്ന് വര്‍ഷത്തെ പാട്ടമായി 24.31 ലക്ഷം അടക്കണമെന്നാണ് ഉത്തരവ്. ഏറാനാട് താലൂക്കില്‍ മലപ്പുറം വില്ലേജിലാണ് 22 സെന്‍റ് ഭൂമിയാണ് പാട്ടത്തിന് നല്‍കിയത്. ഭൂമിയുടെ ന്യാവില വര്‍ധനവ് കണക്കാക്കി 22 സെന്‍റ് ഭൂമിയുടെ കമ്ബോളവില 1.78 കോടിയാണ്. അതിന്‍റെ അഞ്ച് ശതമാനമാണ് 2020-21 ലെ പാട്ടത്തുകയായി 8,90,000 രൂപ നിശ്ചയിച്ചുവെന്ന് ലാന്‍ഡ് റവന്യൂ കമ്മീഷണര്‍ അറിയിച്ചു. സര്‍ക്കാര്‍ ഭൂമിക്ക് ഇളവ് നല്‍കിയ തോട്ടം ഭൂമിയില്‍നിന്ന് കമ്ബോളവിലയുടെ അഞ്ച് ശതമാനം നല്‍കേണ്ടിവരുമെന്ന് ചുരുക്കം. 1970 ജനുവരി ഒന്നിന് നിയമം നിലവില്‍വന്നു. കഴിഞ്ഞ 50 വര്‍ഷം സംസ്ഥാനത്തിന് ഈ ഇനത്തില്‍ എത്ര കോടി നഷ്ടമുണ്ടായിയെന്ന കണക്കാക്കാന്‍പോലുമാവില്ല.