ജനീവ: ആഗോള ഉപരോധത്തിനിടയിലും ബാലസ്​റ്റിക്​ മിസൈല്‍ പരീക്ഷിച്ച ഉത്തരകൊറിയയുടെ നീക്കത്തെ വിമര്‍ശിച്ച്‌​ അമേരിക്കയും യൂറോപ്യന്‍ രാജ്യങ്ങളും. അടിയന്തര യു.എന്‍ സുരക്ഷ കൗണ്‍സില്‍ ചര്‍ച്ചക്കു പിന്നാലെയാണ്​ അമേരിക്കയും ബ്രിട്ടനും, ഫ്രാന്‍സും ഉത്തരകൊറിയക്കെതിരെ ​പ്രതികരിച്ചത്​.പുതിയ ഉപരോധത്തെ കുറിച്ച്‌​ പ്രതികരിച്ചില്ലെങ്കിലും നിലവിലുള്ള ഉപരോധം ശക്​തമാക്കുമെന്ന്​ രാജ്യ പ്രതിനിധികള്‍ പറഞ്ഞു. 2019ല്‍ അന്നത്തെ അമേരിക്കന്‍ പ്രസിഡന്‍റ്​ ഡോണല്‍ഡ്​ ട്രംപ്​ ഉത്തരകൊറിയന്‍ മേധാവി കിം ജോങ്​ ഉന്നുമായി നടത്തിയിരുന്ന സമാധാന കരാര്‍ ലംഘിക്കപ്പെടതിനെ തുടര്‍ന്ന്​ പോങ്ങിയാങ്ങില്‍ നിന്ന്​ പലതവണ ആയുധ പരീക്ഷണ വാര്‍ത്തകള്‍ പുറത്തുവന്നിരുന്നു. പിന്നാലെ യു.എന്‍ ഉപരോധം പ്രഖ്യാപിച്ചെങ്കിലും ഉത്തരകൊറിയ ബാലസ്റ്റിക്​ മിസൈല്‍ പരീക്ഷണം തുടര്‍ന്നുകൊണ്ടേയിരുന്നു.

എന്നാല്‍, മേഖലയില്‍ അശാന്തി പടര്‍ത്തുന്നത്​ അമേരിക്കയാണെന്നും ആയുധ പരീക്ഷണം ഉത്തരകൊറിയയുടെ പ്രതിരോധ മേഖലക്ക്​ അനിവാര്യമാണെന്നുമാണ്​ കിം ​ജോങ്​ ഉന്‍ പറഞ്ഞത്​. ആയുധ നിര്‍മാണത്തില്‍ അമേരിക്ക ഇരട്ടത്താപ്പ്​ തുടരുകയാണെന്നും ഉത്തര​െകാറിയ തുറന്നടിച്ചു. ഈ മാസം നിരവധി മിസൈലുകളാണ്​ ഉത്തരകൊറിയ പരീക്ഷിച്ചത്​. ജോ ബൈഡന്‍ യു.എസ്​ പ്രസിഡന്‍റായി അധികാരമേറ്റശേഷം ആദ്യമായാണ്​ ഇത്രയും മാരകമായ ആയുധം ഉത്തരകൊറിയ പരീക്ഷിക്കുന്നത്​. ഉത്തരകൊറിയയുമായി ആണവ ചര്‍ച്ച പുനരാരംഭിക്കാന്‍ തയാറാണെന്ന്​ യു.എസ്​ അറിയിച്ചതിനു പിന്നാലെയാണിത്​. കിഴക്കന്‍ തുറമുഖമായ സിന്‍പോയില്‍ നിന്നായിരുന്നു മിസൈല്‍ പരീക്ഷണം. മിസൈല്‍ ജപ്പാന്‍ കടലില്‍ പതിച്ചതായും ദക്ഷിണ കൊറിയന്‍ സൈനികവൃത്തങ്ങള്‍ അറിയിച്ചു.