സാമുദായിക കലാപം: ബംഗ്ലാദേശില്‍ 450 പേര്‍ അറസ്​റ്റില്‍

ധാക്ക: സാമുദായിക കലാപത്തെ തുടര്‍ന്ന്​ ബംഗ്ലാദേശില്‍ 450 പേരെ അറസ്​റ്റ്​ ചെയ്​തു. ദുര്‍ഗ പൂജ ആഘോഷങ്ങളോടനുബന്ധിച്ച്‌​ തുടങ്ങിയ അക്രമങ്ങളെ തുടര്‍ന്ന്​ ആറോളം ക്ഷേത്രങ്ങള്‍ ആക്രമിക്കപ്പെട്ടിരുന്നു. എട്ടുപേര്‍ കൊല്ലപ്പെടുകയും ചെയ്​തു. കലാപത്തോടനുബന്ധിച്ച്‌​ 70ലേറെ പരാതികളാണ്​ അധികൃതര്‍ക്ക്​ ലഭിച്ചത്​. അക്രമങ്ങളില്‍ പ്രതിഷേധിച്ച്‌​ വിവിധ സംഘടനകള്‍ സമരം ശക്​തമാക്കിയിട്ടുണ്ട്​.

ബംഗ്ലാദേശില്‍ ആകെ ജനസംഖ്യയുടെ 10 ശതമാനമേ ഹിന്ദു വിഭാഗങ്ങളുള്ളൂ. കലാപത്തില്‍ അന്വേഷണം നടത്തണമെന്ന്​ ആവശ്യപ്പെട്ട്​ ആംനസ്​റ്റി ഇന്‍റര്‍നാഷനല്‍ രംഗത്തുവന്നു.

ബംഗ്ലാദേശില്‍ ഹിന്ദുമതവിഭാഗങ്ങള്‍ക്കു നേരെ നടക്കുന്ന ആക്രമണങ്ങളെ യു.എസ്​ അപലപിച്ചു. മതസ്വാതന്ത്ര്യം മനുഷ്യാവകാശമാണെന്നും ലോകത്തെല്ലായിടത്തുമുള്ള പൗരന്‍മാര്‍ക്ക്​ അവരുടെ ആചാരങ്ങളും വിശ്വാസങ്ങളും പുലര്‍ത്താനുള്ള അവകാശമുണ്ടെന്നും യു.എസ്​ സ്​റ്റേറ്റ്​ ഡിപാര്‍ട്​മെന്‍റ്​ വക്​താവ്​ വ്യക്തമാക്കി.

കര്‍ശന നടപടിക്ക്​ നിര്‍ദേശം

ധാക്ക: ക്ഷേത്രങ്ങള്‍ ആക്രമിച്ചവര്‍ക്കെതിരെ കര്‍ശന നടപടി സ്വീകരിക്കണമെന്ന്​ മന്ത്രിസഭായോഗത്തില്‍ ബംഗ്ലാദേശ്​ പ്രധാനമന്ത്രി ശൈഖ്​ ഹസീന ആഭ്യന്തരമന്ത്രി അസദുസ്സമാന്‍ ഖാന്​​ നിര്‍ദേശം നല്‍കി. ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ കര്‍ശന നടപടി സ്വീകരിക്കണമെന്നും ആവശ്യപ്പെട്ടു.