നരേന്ദ്ര ഗിരിയുടെ മരണം: യു.പി പോലീസില്‍ നിന്ന്​ അന്വേഷണം സി.ബി.ഐ ഏറ്റെടുത്തു​

ലഖ്നോ: സന്യാസി സംഘടനയായ അഖില ഭാരതീയ അഖാഡ പരിഷത് അധ്യക്ഷന്‍ മഹന്ത് നരേന്ദ്ര ഗിരിയെ മരിച്ച നിലയില്‍ കണ്ടെത്തിയ സംഭവത്തിന്‍റെ അന്വേഷണം യു.പി പൊലീസില്‍ നിന്ന്​ സി.ബി.ഐ ഏറ്റെടുത്തു. നരേന്ദ്ര ഗിരിയുടെ മരണം സംബന്ധിച്ച്‌​ വിവാദം ഉയര്‍ന്ന സാഹചര്യത്തില്‍ യു.പി സര്‍ക്കാര്‍ സി.ബി.ഐ അന്വേഷണം ആവശ്യപ്പെട്ടിരുന്നു. ഇതനുസരിച്ച്‌​ അന്വേഷണം ഏറ്റെടുത്ത സി.ബി.ഐ എഫ്​​.ഐ.ആര്‍ സമര്‍പ്പിച്ചു. ആറംഗ സി.ബി.ഐ സംഘമാണ്​ കേസ്​ അന്വേഷിക്കുന്നത്​.

തിങ്കളാഴ്ച വൈകീട്ടാണ് നേരന്ദ്ര ഗിരിയെ ആശ്രമത്തില്‍ തൂങ്ങിമരിച്ച നിലയില്‍ കണ്ടെത്തിയത്. സാധാരണയായി നടന്നുവരാറുള്ള പ്രഭാഷണത്തിന് നരേന്ദ്ര ഗിരി എത്താതിനാല്‍ അന്വേഷിച്ചെത്തിയ ശിഷ്യര്‍ മുറിയുടെ വാതില്‍ അകത്തുനിന്നും കുറ്റിയിട്ടതാണ് കണ്ടത്. വാതില്‍ പൊളിച്ചു അകത്തുകടന്നപ്പോള്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു. നരേന്ദ്ര ഗിരി എഴുതിയതെന്ന്​ കരുതുന്ന ആത്​മഹത്യ കുറിപ്പും പൊലീസ്​ കണ്ടെടുത്തിരുന്നു. നരേന്ദ്ര ഗിരിയുടെ പ്രധാന ശിഷ്യനായ ആനന്ദ്​ ഗിരി, അനുയായികളായ ആധ്യ തിവാരി, മകന്‍ സന്ദീപ്​ തിവാരി എന്നിവരാണ്​ ആത്​മഹത്യക്ക്​ കാരണമെന്ന്​ നരേന്ദ്ര ഗിരി കുറിപ്പില്‍ പറയുന്നുണ്ട്​. ഇവരെ പൊലീസ്​ അറസ്​റ്റ്​ ചെയ്​തിട്ടുണ്ട്​.

മരിക്കുന്നതിന്​ ഒരു മണിക്കൂര്‍ മുമ്ബ്​ നരേന്ദ്ര ഗിരി മൊബൈലില്‍ ഷൂട്ട്​ ചെയ്​ത വീഡിയോയും പൊലീസ്​ കണ്ടെടുത്തിരുന്നു. നാലര മിനിറ്റുള്ള വീഡിയോയിലും 13 പേജുള്ള ആത്​മഹത്യ കുറിപ്പിലെ കാരണങ്ങള്‍ തന്നെയാണ്​ പറയുന്നത്​. ഒരു സ്​ത്രീക്കൊപ്പമുള്ള തന്‍റെ ചിത്രം ആനന്ദ്​ ഗിരി കമ്ബ്യൂട്ടറിന്‍റെ സഹായത്താല്‍ സൃഷ്​ടിച്ചെന്നും തന്നെ അപകീര്‍ത്തിപ്പെടുത്താന്‍ അത്​ പ്രചരിപ്പിക്കുമെന്നുമാണ്​ നരേന്ദ്ര ഗിരി ചൂണ്ടിക്കാട്ടുന്നത്​. സാമ്ബത്തിക ക്രമക്കേടുകളടക്കമുള്ള ആരോപണത്തെ തുടര്‍ന്ന്​ മേയില്‍ ആശ്രമത്തില്‍ നിന്ന്​ പുറത്താക്കപ്പെട്ടയാളാണ്​ ആനന്ദ് ഗിരി. പിന്നീട്​ ഗുരുവും ശിഷ്യനും തമ്മിലുള്ള ബന്ധം വീണ്ടും പുനഃസ്ഥാപിച്ചതായി പറയപ്പെടുന്നു.

അഖില ഭാരതീയ അഖാഡ പരിഷത്തിന്‍റെ ലെറ്റര്‍ഹെഡില്‍​ കൈ കൊണ്ട്​ എഴുതിയ ആത്​മഹത്യ കുറിപ്പില്‍ എഴുതിയിരിക്കുന്നത്​ ഇതാണ്​-'ആനന്ദ്​ ഗിരി കാരണം എന്‍റെ മനസ്സ്​ ഏറെ അസ്വസ്​ഥമാണ്​. 2021 സെപ്​റ്റംബര്‍ 13ന്​ ഞാന്‍ ജീവനൊടുക്കാന്‍ തീരുമാനിച്ചിരുന്നു. പക്ഷേ, അതിനുള്ള ധൈര്യം കിട്ടിയില്ല. ഇന്ന്​ എനിക്ക്​ ഒരു വിവരം കിട്ടി, ഒന്നോ രണ്ടോ ദിവസത്തിനുള്ളില്‍ ഒരു സ്​ത്രീക്കൊപ്പമുള്ള എന്‍റെ ​േഫാ​ട്ടോ കമ്ബ്യൂട്ടര്‍ സഹായത്തോടെ ആനന്ദ്​ ഗിരി സൃഷ്​ടിക്കുമെന്നും എന്നെ അപകീര്‍ത്തിപ്പെടുത്താന്‍ അത്​ പ്രചരിപ്പിക്കുമെന്നും. എന്‍റെ ഭാഗം ന്യായീകരിക്കാന്‍ എനിക്ക്​ കഴീയും പക്ഷേ, അതുണ്ടാക്കുന്ന അപമാനം ഞാനെങ്ങിനെ സഹിക്കും? ഇത്രകാലം അന്തസ്സോടെയാണ്​ ജീവിച്ചത്​. അപമാനിതനായി ജീവിക്കാന്‍ എനിക്ക്​ കഴിയില്ല. ഫോ​ട്ടോ വൈറലായി കഴിഞ്ഞാല്‍ എന്തൊക്കെ വിശദീകരണങ്ങളാണ്​ നിങ്ങള്‍ക്ക്​ നല്‍കാന്‍ കഴിയുക എന്ന്​ ആനന്ദ്​ ഗിരി ചോദിച്ചിരുന്നു. ഇതെന്നെ അസ്വസ്​ഥനാക്കുകയാണ്​. അതുകൊണ്ട്​ ഞാന്‍ ജീവനൊടുക്കാന്‍ തീരുമാനിച്ചു'. ആനന്ദ്​ ഗിരി, ആധ്യ തിവാരി, സന്ദീപ്​ തിവാരി എന്നിവരാണ്​ തന്‍റെ മരണത്തിന്​ കാരണക്കാരെന്നും ഇവര്‍ ശിക്ഷിക്കപ്പെട്ടാലേ തന്‍റെ ആത്​മാവിന്​ ശാന്തി ലഭിക്കൂയെന്നും അദ്ദേഹം എഴുതിയിട്ടുണ്ട്​.

അതേസമയം, കുറിപ്പ്​ നരേ​ന്ദ്ര ഗിരി എഴുതിയതല്ലെന്നും അദ്ദേഹത്തിന്‍റെ തലക്ക്​ പരിക്കേറ്റിട്ടുണ്ടെന്നുമൊക്കെയുള്ള ആരോപണങ്ങള്‍ അഖില ഭാരതീയ അഖാഡ പരിഷത്തിന്‍റെ ഭാഗത്തുനിന്ന്​ തന്നെ ഉയരുകയും സംഭവത്തില്‍ ദുരൂഹത ഏറുകയും ചെയ്​തതോടെയാണ്​ യു.പി മുഖ്യമന്ത്രി യോഗി ആദിത്യനാഥ്​ സി.ബി.ഐ അന്വേഷണം ആവശ്യപ്പെട്ടത്​.