യു.എന്‍ 76-ാം പൊതു സമ്മേളനം ഇന്നുമുതല്‍; ലോകനേതാക്കള്‍ ന്യൂയോര്‍ക്കിലേക്ക്

ന്യൂയോര്‍ക്ക്: കൊറോണ മഹാമാരിയുടെ കാലഘട്ടത്തില്‍ നടക്കുന്ന ഐക്യരാഷ്‌ട്ര സഭ 76-ാം പൊതു സമ്മേളനത്തിന് ഇന്ന് തുടക്കം. ന്യൂയോര്‍ക്കിലെ യു.എന്‍. ആസ്ഥാനത്ത് നടക്കുന്ന സമ്മേളനത്തിനായി അംഗരാജ്യങ്ങളുടെ പ്രതിനിധികളായ ലോകനേതാക്കളും വിദേശ കാര്യമന്ത്രിമാരും അമേരിക്കയിലേക്ക് എത്തിതുടങ്ങി. കൊറോണ മഹാമാരിയുടെ കാലഘട്ടത്തില്‍ ഇതാദ്യമായാണ് ഐക്യരാഷ്‌ട്ര സഭാ വേദിയില്‍ ലോകനേതാക്കള്‍ നേരിട്ട് പങ്കെടുക്കുന്നത്. കഴിഞ്ഞ വര്‍ഷം നടന്ന 75-ാം സമ്മേളനത്തില്‍ ലോകനേതാക്കള്‍ വെര്‍ച്വല്‍ സംവിധാനത്തിലൂടെയാണ് സംസാരിച്ചത്. അഫ്ഗാനിസ്താനില്‍ താലിബാന്‍ ഭരണം പിടിച്ചെടുത്തതും, അമേരിക്കന്‍ സൈനിക പിന്മാറ്റവും, യൂറോപ്പിലെ പ്രളയവും, ചൈനയുടെ പസഫിക് മേഖലയിലെ കയ്യേറ്റ ശ്രമങ്ങളും, ആഗോള വ്യാപാര പ്രതിസന്ധികളും എല്ലാ രാജ്യങ്ങളേയും ബാധിച്ചിരിക്കുന്ന പശ്ചാത്ത ലത്തിലാണ് യോഗം നടക്കുന്നത്.