ആസ്​ട്രേലിയയില്‍ ലോക്​ഡൗണ്‍ വിരുദ്ധ പ്രക്ഷോഭം ശക്​തിപ്പെടുന്നു; ആയിരങ്ങള്‍ തെരുവില്‍

മെല്‍ബണ്‍: കോവിഡ്​ നിയന്ത്രണത്തിന്‍റെ ഭാഗമായി ആസ്​ട്രേലിയന്‍ സര്‍ക്കാര്‍ ഏ​ര്‍പ്പെടുത്തിയ ലോക്​ഡൗണിനെതിരെ തെരുവിലിറങ്ങി ജനം. സിഡ്​നി, മെല്‍ബണ്‍ പോലുള്ള നഗരങ്ങളിലടക്കം വ്യാപക ​പ്രതിഷേധമാണുള്ളത്​​.സമരക്കാരെ അടിച്ചമര്‍ത്താന്‍ ആയിരക്കണക്കിന്​ പൊലീസ്​ ഉദ്യോഗസ്​ഥരെ​ സര്‍ക്കാര്‍ നിയോഗിച്ചിട്ടുണ്ട്​. നഗരങ്ങളില്‍ ചെക്ക്​ പോയന്‍റുകളും ബാരിക്കേഡുകളും സ്​ഥാപിച്ചു. മെല്‍ബണ്‍ നഗരത്തില്‍ പതിനായിരക്കണക്കിന്​​ ആളുകള്‍ ഒരുമിച്ചതായും പൊലീസുമായി ഏറ്റുമുട്ടല്‍ ഉണ്ടായതായും പ്രാദേശിക മാധ്യമങ്ങള്‍ റിപ്പോര്‍ട്ട്​ ചെയ്​തു. സമരക്കാര്‍ക്കുനേരെ പൊലീസ് മുളക്​ സ്​പ്രേ ഉപയോഗിച്ചു. പലരെയും​ അറസ്റ്റ്​​ ചെയ്​ത്​ നീക്കി.നഗരത്തില്‍ 2000 പൊലീസുകാരെ വിന്യസിച്ചതോടെ പലയിടങ്ങളും നിരോധന മേഖലയായി മാറി. നഗരത്തിലേക്കുള്ള പൊതുഗതാഗതവും റൈഡ് ഷെയറുകളും നിര്‍ത്തിവച്ചു. സിഡ്നിയിലെ തെരുവുകളില്‍ കലാപ സ്ക്വാഡ് ഓഫിസര്‍മാര്‍, ഹൈവേ പട്രോള്‍, ഡിറ്റക്ടീവുകള്‍, ജനറല്‍ ഡ്യൂട്ടി പൊലീസ് എന്നിവരെയാണ്​ വിന്യസിച്ചത്​.രാജ്യത്ത്​ ശനിയാഴ്ച 1882 കോവിഡ്​ കേസുകളാണ്​ സ്​ഥിരീകരിച്ചത്​. ജൂണ്‍ പകുതിയോടെയാണ്​ ആസ്​ട്രേലിയയില്‍ കൊറോണ വൈറസിന്‍റെ ഡെല്‍റ്റ വകഭേദം പടരുന്നത്​. ഇതിനെ​ തുടര്‍ന്ന്​ സിഡ്നിയും മെല്‍ബണും തലസ്ഥാനമായ കാന്‍ബെറയുമെല്ലാം ആഴ്ചകളായി കര്‍ശനമായ ലോക്​ഡൗണുകളിലാണ്. ഇതില്‍ പ്രതിഷേധിച്ചാണ്​ ജനം തെരുവിലിറങ്ങിയത്​.

വിക്ടോറിയ, ന്യൂ സൗത്ത് വെയില്‍സ്, കാന്‍ബറ എന്നിവിടങ്ങളിലടക്കം കോവിഡ്​ വാക്​സിനേഷന്‍ 70 ശതമാനമെങ്കിലും പൂര്‍ത്തിയായാല്‍ മാത്രമേ നിയന്ത്രണങ്ങള്‍ നീക്കൂ എന്നാണ്​ സര്‍ക്കാര്‍ നിലപാട്​. ഒക്ടോബര്‍ അവസാനമോ നവംബര്‍ ആദ്യമോ ആണ്​ ഇത്​ സാധ്യമാവുക.കര്‍ശന നിയന്ത്രണങ്ങള്‍ ഏര്‍പ്പെടുത്തിയതിനാല്‍ രാജ്യത്ത്​ കോവിഡിനെ ഒരുപരിധി വരെ പിടിച്ചുകെട്ടാന്‍ സര്‍ക്കാറിന്​ സാധിച്ചിട്ടുണ്ട്​. 85,000 കോവിഡ്​ കേസുകളും 1145 മരണങ്ങളുമാണ്​ രാജ്യത്ത്​ ഇതുവരെ റിപ്പോര്‍ട്ട്​ ചെയ്​തത്​.ബഹുഭൂരിപക്ഷം ആസ്ട്രേലിയക്കാരും പ്രതിരോധ കുത്തിവെപ്പിനെയും പൊതുജനാരോഗ്യ നടപടികളെയും പിന്തുണക്കുന്നുണ്ട്​. എന്നാല്‍, പകര്‍ച്ചവ്യാധി കൈകാര്യം ചെയ്യുന്നതിലെ അപകാതകളാണ്​ ജനങ്ങളില്‍ പ്രതിഷേധത്തിന്​ ഇടയാക്കുന്നത്​.പ്രതിഷേധക്കാര്‍ക്ക്​ ന്യൂ സൗത്ത് വെയില്‍സ് ​പൊലീസ് വെള്ളിയാഴ്ച മുന്നറിയിപ്പ് നല്‍കിയിട്ടുണ്ട്​. പിഴ മുതല്‍ അറസ്റ്റ് വരെയുണ്ടാകുമെന്നാണ്​ മുന്നറിയിപ്പ്​. അതേസമയം, ശനിയാഴ്ചയും രാജ്യത്തിന്‍റെ വിവിധ ഭാഗങ്ങളില്‍ പ്രക്ഷോഭം തുടരുകയാണ്​.