മധ്യപ്രദേശിലെ എന്‍ജി. സിലബസില്‍ ഇനി രാമായണവും മഹാഭാരതവും

ഭോപാല്‍: മധ്യപ്രദേശിലെ എന്‍ജിനീയറിങ്​ വിദ്യാര്‍ഥികള്‍ക്ക്​ രാമായണവും മഹാഭാരതവും രാമസേതുവും സിലബസില്‍ ഉള്‍പ്പെടുത്താന്‍ സംസ്​ഥാന സര്‍ക്കാര്‍ നീക്കം. എം.ബി.ബി.എസ്​ വിദ്യാര്‍ഥികളുടെ സിലബസില്‍ ആര്‍.എസ്​.എസ്​ സ്​ഥാപകന്‍ കെ.ബി ഹെഡ്​ഗേവറിനെയും ജനസംഘ്​ സ്​ഥാപകന്‍ ദീന്‍ദയാല്‍ ഉപാധ്യായയെയും ഉള്‍പ്പെ​ടുത്താന്‍ തീരുമാനിച്ചതിന്​ പിന്നാലെയാണിത്​.

രാമായണത്തിലെയും മഹാഭാരതത്തിലെയും ഭാഗങ്ങള്‍ക്ക്​ പുറമെ രാമസേതുവും പഠനവിഷയമാക്കും. രാമന്‍ തന്‍റെ പത്​നിയായ സീതയെ രാവണില്‍നിന്ന്​ വീണ്ടെടുക്കാന്‍ രാ​മസേതു നിര്‍മിക്കുകയും ലങ്കയിലെത്തി രാവണനെ നിഗ്രഹിച്ചുവെന്നുമാണ്​ ഐതിഹ്യം. രാമസേതു പഠിക്കുന്നതിലൂടെ രാമന്‍റെ കാലഘട്ടത്തിലെ എന്‍ജിനീയറിങ്​ വിദ്യകളെക്കുറിച്ച്‌​ വിദ്യാര്‍ഥികള്‍ക്ക്​ പഠിക്കാന്‍ അവസരമൊരുങ്ങുമെന്നാണ്​ ഉന്നത വിദ്യാഭ്യാസമന്ത്രിയുടെ പ്രതികരണം.

സിലബസില്‍ ഇവ ഉള്‍പ്പെടുത്തുന്നതില്‍ തെറ്റില്ലെന്നും രാമന്‍റെ സ്വഭാവത്തെക്കുറിച്ചും ആ കാലഘട്ടത്തിലെ അദ്ദേഹത്തിന്‍റെ സംഭാവനകളെക്കുറിച്ചും പഠിക്കാന്‍ ആഗ്രഹിക്കുന്നവര്‍ക്ക്​ ഇവ പഠിക്കാമെന്ന്​ ഉന്നത വിദ്യാഭ്യാസ മന്ത്രി ഡോ. മോഹന്‍ യാദവ്​ പറഞ്ഞു. ഗസലുകളിലൂടെ ഉര്‍ദുവും പാഠ്യപദ്ധതിയില്‍ ഉള്‍പ്പെടു​ത്താന്‍ ശ്രമിക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു.

ഉന്നതവിദ്യാഭ്യാസത്തില്‍ രാമചരിതവും മഹാഭാരതവും പഠിപ്പിക്കാനും ബി.ജെ.പി സര്‍ക്കാര്‍ തീരുമാനിക്കുന്നുണ്ട്​. ഉന്നതവിദ്യാഭ്യാസ വകുപ്പ്​ ഒരു സിലബസും ഇതിനായി തയാറാക്കി കഴിഞ്ഞു. ബി.എ അപ്ലൈഡ്​ ഫിലോസഫി സിലബസിലാകും ഇവ ഉള്‍പ്പെടുക. ഓപ്​ഷനല്‍ വിഷയമായാണ്​ ഇവ തെരഞ്ഞെടുക്കുക. 100 മാര്‍ക്കിന്‍റെ ചോദ്യപേപ്പറായിരുന്നു ഇതിന്​ നല്‍കുക.

അതേസമയം, ബി.ജെ.പി സര്‍ക്കാറിന്‍റെ നീക്കത്തിനെതിരെ മധ്യപ്രദേശിലെ കോണ്‍ഗ്രസ്​ രംഗത്തെത്തി. രാമചരിതവും മഹാഭാരതവും സിലബസില്‍ ഉള്‍പ്പെടുത്തുന്നുണ്ടെങ്കില്‍ ഖുറാനും ബൈബിളും ഗുരുഗ്രന്ഥ്​​ സാഹിബും സിലബസില്‍ ഉള്‍പ്പെടുത്തണമെന്ന്​​ ഭോപാല്‍ മധ്യ എം.എല്‍.എ ആരിഫ്​ മസൂദ്​ ആവശ്യപ്പെട്ടു.