ഖത്തര്‍ ഉപപ്രധാനമന്ത്രി കാബൂളില്‍; അഫ്​ഗാന്‍ സര്‍ക്കാറുമായി ചര്‍ച്ച നടത്തി

ദോഹ: താലിബാന്‍ കാബൂള്‍ പിടിച്ചടക്കിയ ശേഷം അഫ്​ഗാനില്‍ ആദ്യ വിദേശ പ്രതിനിധിയുടെ സന്ദര്‍ശനം. ഖത്തര്‍ ഉപപ്രധാനമന്ത്രിയും വിദേശകാര്യമന്ത്രിയുമായ ശൈഖ്​ മുഹമ്മദ്​ ബിന്‍ അബ്​ദുല്‍ റഹ്​മാന്‍ ആല്‍ഥാനിയാണ്​ ഞായറാഴ്​ച വൈകീട്ട്​ കാബൂളിലെത്തിയത്​. അഫ്​ഗാന്‍ മുന്‍ പ്രസിഡന്‍റ്​ ഹാമിദ് കര്‍സായി, സമാധാന സമിതി ചെയര്‍മാന്‍ അബ്​ദുല്ല അബ്​ദുല്ല, താലിബാന്‍ ഇടക്കാല സര്‍ക്കാറിലെ ആക്​ടിങ്​ പ്രധാനമന്ത്രി മുല്ലാ മുഹമ്മദ്​ ഹസന്‍ അകുന്ദ്​ എന്നിവരുമായി പ്രത്യേകം കൂടികാഴ്​ചകള്‍ നടത്തി.

ആഗസ്​റ്റ്​ 31ന്​ അമേരിക്കന്‍ സൈന്യം രാജ്യം വിട്ട ശേഷം അഫ്​ഗാനില്‍ വിദേശരാജ്യത്തു നിന്നുമെത്തുന്ന ആദ്യ ഉന്നത വ്യക്​തിയാണ്​ ശൈഖ്​ മുഹമ്മദ്​ ബിന്‍ അബ്​ദുല്‍റഹ്​മാന്‍ ആല്‍ഥാനി. കാബൂള്‍ വിമാനത്താവളത്തില്‍ മുതിര്‍ന്ന താലിബാന്‍ നേതാക്കള്‍ അദ്ദേഹത്തെ സ്വീകരിച്ചു. തുടര്‍ന്നായിരുന്നു ഹസന്‍ അകുന്ദുമായുള്ള കൂടികാഴ്​ച.

ഇടക്കാല മന്ത്രിസഭയിലെ വിദേശകാര്യമന്ത്രിമാര്‍, മറ്റു ഉന്നതനേതാക്കള്‍, അഫ്​ഗാനില്‍ ഖത്തര്‍ അംബാസഡര്‍ തുടങ്ങിയവര്‍ ചര്‍ച്ചയില്‍ പ​ങ്കെടുത്തു. ശേഷമായിരുന്നു മുന്‍ പ്രസിഡന്‍റ്​ ഹമീദ് കര്‍സായിയെയും അബ്ദുല്ല അബ്ദുല്ലയെയും കണ്ടത്​. അഫ്ഗാനിലെ നിലവിലുള്ള രാഷ്ട്രീയ സാഹചര്യവും അഫ്ഗാന്‍ ജനതയ്ക്കായി ഖത്തര്‍ നടത്തിവരുന്ന സഹായപ്രവര്‍ത്തനങ്ങളും കൂടിക്കാഴ്ച്ചയില്‍ നേതാക്കള്‍ വിലയിരുത്തി. ഔദ്യോഗിക സന്ദര്‍ശനത്തിന്‍റെ ദൃശ്യങ്ങള്‍ താലിബാനും ഖത്തര്‍ ന്യൂസ് ഏജന്‍സിയും പുറത്തുവിട്ടു. നിലവില്‍ താലിബാനുമായി അടുത്ത ബന്ധം പുലര്‍ത്തുന്ന വിദേശരാജ്യമാണ്​ ഖത്തര്‍.

അഫ്​ഗാനിലെ സമാധാന പ്രവര്‍ത്തനങ്ങള്‍ക്കും, നയതന്ത്ര ചര്‍ച്ചകള്‍ക്കും ഏറെനാളായി നേതൃത്വം നല്‍കുന്ന ഖത്തര്‍ വിദേശകാര്യ മന്ത്രി, ഇതു സംബന്ധിച്ച വിദേശ പര്യടനത്തിനൊടുവിലാണ്​ ഞായറാഴ്​ച കാബൂളിലെത്തിയത്​.