അഴിമതിക്കാരായ നിങ്ങള്‍ അഫ്​ഗാനെ താലിബാന്​ കൈമാറുകയായിരുന്നു; ഗനി സര്‍ക്കാറിനെ കുറ്റപ്പെടുത്തി​ അമേരിക്കന്‍ അംബാസിഡര്‍

അഴിമതിക്കാരായ അഷ്​റഫ്​ ഗനി സര്‍ക്കാര്‍ താലിബാന്​ അഫ്​ഗാനിസ്​ഥാനെ അനായാസം കൈമാറുകയായിരുന്നെന്ന്​ മുന്‍ അംബാസിഡര്‍. ജൂലൈയില്‍ സ്​ഥാനമൊഴിഞ്ഞ അമേരിക്കയിലെ അഫ്​ഗാന്‍ അംബാസിഡര്‍ റോയ റഹ്​മാനിയാണ്​ ആരോപണം ഉന്നയിച്ചത്​. കാബൂളിലെ അമേരിക്കന്‍ പിന്തുണയുള്ള സര്‍ക്കാര്‍ രാജ്യത്തെ നയിക്കുന്നതില്‍ പരാജയപ്പെട്ടുവെന്നും വ്യാപകമായ അഴിമതിയാണ് താലിബാന്റെ വിജയത്തിന് വഴിയൊരുക്കിയതെന്നും റഹ്മാനി കുറ്റപ്പെടുത്തി.

താലിബാ​െന്‍റ വരവിനെ താന്‍ ഭീതിയോടെയാണ്​ കാണുന്നതെന്നും ഇൗ വിജയം വളരെ അസ്വസ്​ഥതപ്പെടുത്തുന്നതാണെന്നും അവര്‍ അഭിമുഖത്തില്‍ പറഞ്ഞു. താലിബാന്റെ വരവ്​ മേഖലയിലെ രാഷ്​ട്രീയ ഭൂപടത്തില്‍ ദൂരവ്യാപകമായ പ്രത്യാഘാതങ്ങളുണ്ടാക്കുമെന്ന് അവര്‍ അമേരിക്കയ്ക്ക് മുന്നറിയിപ്പ് നല്‍കി. 'താലിബാന്‍ അഫ്​ഗാനിസ്ഥാന്‍ പിടിച്ചെടുത്തതിലും അവര്‍ അത്​ ഇത്ര വേഗത്തില്‍ ചെയ്​തതിലും ഞാന്‍ ആശ്ചര്യപ്പെടുന്നില്ല. അഫ്​ഗാന്‍ സര്‍ക്കാരിനെ​ നേതൃത്വത്തിന്റെ  അഭാവം അലട്ടിയിരുന്നു'-റഹ്മാനി പറഞ്ഞു.

'അഫ്​ഗാന്‍ സേനയല്ല ഒന്നിനും ഉത്തരവാദി. ജനങ്ങളുടെ സ്വാതന്ത്ര്യത്തിനും സംരക്ഷണത്തിനും വേണ്ടി പോരാടാന്‍ രാഷ്​ട്രീയ നേതൃത്വം തയ്യാറായില്ല. നേതൃത്വമാണ് അഴിമതി നടത്തിയത്. അവര്‍ താലിബാന് രാജ്യം അനായാസം കൈമാറുകയായിരുന്നു'-അവര്‍ പറഞ്ഞു.

പ്രസിഡന്‍റ്​ സ്ഥാനം ഉപേക്ഷിച്ച്‌ ഓഗസ്റ്റ് 15ന് അഫ്​ഗാനിസ്ഥാന്‍ വിടാനുള്ള അഷ്റഫ് ഗനിയുടെ തീരുമാനം 'അങ്ങേയറ്റം നിരാശാജനകവും ലജ്ജാകരവുമാണെന്നും' അവര്‍ പറഞ്ഞു.രക്തച്ചൊരിച്ചില്‍ ഒഴിവാക്കാന്‍ ആഗ്രഹിച്ചതിനാലാണ് താന്‍ നാടുവിട്ടതെന്ന്​ ഗനി ബുധനാഴ്​ച പറഞ്ഞിരുന്നു. പുറത്തുപോകുമ്പോള്‍ ദശലക്ഷക്കണക്കിന് ഡോളര്‍ മോഷ്​ടിച്ചെന്ന ആരോപണം അദ്ദേഹം നിഷേധിച്ചു. 'കാബൂള്‍ വിടുന്നത് എന്റെ  ജീവിതത്തിലെ ഏറ്റവും ബുദ്ധിമുട്ടുള്ള തീരുമാനമായിരുന്നു'എന്നും ഗനി പറഞ്ഞു.

43 വയസ്സുള്ള റോയ റഹ്മാനി മൂന്ന് വര്‍ഷം അമേരിക്കയിലെ അഫ്​ഗാന്‍ അംബാസഡര്‍ ആയിരുന്നു. ഇൗ ജൂലൈയിലാണ്​ അവര്‍ സ്​ഥാനമൊഴിഞ്ഞത്​. പുതിയ മാറ്റത്തില്‍ ഏറ്റവുമധികം നേട്ടമുണ്ടാക്കുക പാക്കിസ്ഥാന്‍ ആയിരിക്കുമെന്ന് അവര്‍ പറഞ്ഞു.'അമേരിക്ക ഒരു പുതിയ പാകിസ്​ഥാനെ അഭിമുഖീകരിക്കുമെന്ന് ഞാന്‍ വിശ്വസിക്കുന്നു. ഇന്ത്യ, ചൈന, തുര്‍ക്കി എന്നിവിടങ്ങളിലും താലിബാ​െന്‍റ വരവ്​ പ്രകമ്ബനങ്ങളുണ്ടാക്കും'

കഴിഞ്ഞ തവണ താലിബാന്‍ അഫ്​ഗാനിസ്ഥാന്‍ ഭരിച്ചപ്പോള്‍ പെണ്‍കുട്ടികള്‍ക്ക് സ്​കൂളില്‍ പോകാന്‍ കഴിഞ്ഞിരുന്നില്ല. സ്ത്രീകളെ ജോലിയില്‍ നിന്നും വിദ്യാഭ്യാസത്തില്‍ നിന്നും വിലക്കുകയും ചെയ്​തിരുന്നു. ചൊവ്വാഴ്​ച പ്രഖ്യാപിച്ച താലിബാന്‍ സര്‍ക്കാറിലെ പദവികളില്‍ നിന്ന്​ സ്ത്രീകളെ ഒഴിവാക്കാനുള്ള തീരുമാനം സ്ത്രീകള്‍ക്ക് ഇരുണ്ട കാലം വരാനിടയുണ്ടെന്നതിന്റെ  തെളിവാണെന്നും റഹ്മാനി പറയുന്നു.