ഡമസ്​കസ്​: സിറിയയില്‍​ എണ്ണ ഇറക്കുമതിക്കും ഇറാന്​ കയറ്റുമതിക്കും ഉപരോധമേര്‍പെടുത്തിയ യു.എസിനെ ഞെട്ടിച്ച്‌​ ഇറാനില്‍നിന്ന്​ എണ്ണ വഹിച്ചുള്ള കപ്പല്‍ സിറിയന്‍ തുറമുഖമായ ബനിയാസിലേക്ക്​. വരുംദിവസം തുറമുഖത്തെത്തുമെന്നാണ്​ കരുതുന്നത്.

ഇറാനും സിറിയക്കുമെതിരെ അമേരിക്ക ഏറെയായി ഏര്‍പെടുത്തിയ കടുത്ത വ്യാപാര ഉപരോധം തുടരുകയാണ്​. ഇതുപ്രകാരം സിറിയക്ക്​ ആവശ്യമായ എണ്ണ ഇറക്കുമതി ചെയ്യാന്‍ അനുമതിയില്ല. എണ്ണ സമ്ബന്നമായ ഇറാന്​ കയറ്റുമതിയും പാടില്ല. കടുത്ത പ്രതിസന്ധിയില്‍ ഉഴലുന്ന സിറിയയിലേക്ക്​ എണ്ണ എത്താത്ത സ്​ഥിതി തുടരുന്നതിനിടെയാണ്​ പുതിയ രാഷ്​ട്രീയ നീക്കങ്ങളുടെ ഭാഗമായി ഇറാന്‍ ടാങ്കര്‍ പുറപ്പെട്ടത്​. എന്നാല്‍, ഉപരോധങ്ങള്‍ മറികടന്ന്​ എണ്ണ ടാങ്കര്‍ എത്തുന്നത്​ രാജ്യത്തിന്​ പുതുനിശ്വാസം പകരുന്നതാണെന്ന്​ ലബനാനിലെ രാഷ്​ട്രീയ കക്ഷി ഹിസ്​ബുല്ല നേതൃത്വം പറഞ്ഞു. ഇറാനുമായി ഏറെ അടുത്തുനില്‍ക്കുന്ന പാര്‍ട്ടിയാണ്​ ഹസന്‍ നസ്​റുല്ല നേതൃത്വം നല്‍കുന്ന ഹിസ്​ബുല്ല.

കപ്പലിനെതിരെ യു.എസ്​ ആക്രമണം നടത്തിയാല്‍ പുതിയ സംഘര്‍ഷത്തിലേക്ക്​ നീങ്ങുമെന്നിരിക്കെ ഉപരോധം ഇനിയും തുടരുമോ എന്ന ആശങ്ക നിലനില്‍ക്കുകയാണ്​. നേരത്തെ ട്രംപ്​ പിന്‍വലിച്ച ഇറാന്‍ ആണവ കരാര്‍ വീണ്ടും ഒപ്പുവെക്കാന്‍ ഒരുവശത്ത്​ ഇറാനുമായി ശ്രമങ്ങള്‍ തകൃതിയായി പുരോഗമിക്കുകയാണ്​. സിറിയയാക​ട്ടെ, ഒരു പതിറ്റാണ്ടായി തുടരുന്ന ആഭ്യന്തര യുദ്ധത്തില്‍നിന്ന്​ പതി​യെ കരകയറാന്‍ പാടുപെടുന്ന ഘട്ടവും. ഇതിനിടയില്‍ രണ്ടു രാജ്യങ്ങളെയും വീണ്ടും ആക്രമണത്തിലേക്ക്​ നയിക്കുന്നതാകും എണ്ണക്കപ്പലിനെതിരെ ആക്രമണം.

സൂയസ്​ കനാല്‍ കടന്ന്​ സിറിയ​യിലേക്ക്​ നീങ്ങാനൊരുങ്ങുന്ന കപ്പലിനു നേരെ എന്തു നടപടി സ്വീകരിക്കുമെന്ന്​ യു.എസ്​ ഇനിയും വ്യക്​തമാക്കിയിട്ടില്ല. ബനിയാസ്​ തുറമുഖത്ത്​ ഇറക്കുന്ന എണ്ണ സിറിയയില്‍ എല്ലായിടത്തും വിതരണം ചെയ്യാനാണ്​ പദ്ധതി. തൊട്ടുപിറകെ രണ്ടു ഇറാന്‍ എണ്ണക്കപ്പലുകള്‍ കൂടി സിറിയയിലേക്ക്​ പുറപ്പെടും. ഹിസ്​ബുല്ലയുടെ ആവശ്യം മുന്‍നിര്‍ത്തിയാണ്​ ഇറാന്‍ എണ്ണക്കപ്പല്‍ സൂയസ്​ കടന്ന്​ സിറിയയിലേക്ക്​ പുറപ്പെടുന്നതെന്ന്​ ​അമേരിക്ക പറയുന്നു.

ഇറാനെ ഒഴിവാക്കി ഈജിപ്​തില്‍നിന്ന്​ ഇറക്കുമതിക്ക്​ അനുമതി നല്‍കാന്‍ നേരത്തെ യു.എസ്​ സന്നദ്ധത അറിയിച്ചിരുന്നു. എന്നാല്‍, ആ പദ്ധതി ഇതുവരെ മുന്നോട്ടുപോയിട്ടില്ല.

ഇറാന്‍ എണ്ണ ലബനാന്​ നല്‍കുന്നതില്‍ ഇസ്രായേല്‍ നേരത്തെ എതിര്‍പ്പ്​ പരസ്യമാക്കിയിരുന്നു. ഇറാനും ഇസ്രായേലും പ്രദേശത്തെ കടലുകളില്‍ പരസ്​പരം കപ്പലുകള്‍ക്കെതിരെ നിഴല്‍ ആക്രമണം നടത്തുന്ന സംഭവങ്ങള്‍ തുടരുകയാണ്​.