ബ്രസീലില്‍ വന്‍ ബാങ്കുകൊള്ള

സവോപോളോ: ബ്രസീലിനെ ഞെട്ടിച്ച്‌​ വന്‍ ബാങ്കുകവര്‍ച്ച. 20ഓളം വരുന്ന സംഘം അരാകറ്റുബ പട്ടണം കീഴടക്കി വാഹനങ്ങള്‍ക്ക്​ തീയിട്ടും ടയറുകള്‍ കത്തിച്ച്‌​ റോഡുകളില്‍ ഗതാഗതം മുടക്കിയുമായിരുന്നു മൂന്നു ബാങ്കുകളില്‍ കൊള്ള നടത്തിയത്​. ഇതുകഴിഞ്ഞ്​ നഗരത്തിലുണ്ടായിരുന്ന നിരവധി പേരെ ബന്ദികളാക്കി വാഹനങ്ങളില്‍ കെട്ടിയിട്ട്​ സംഘം രക്ഷപ്പെട്ടു. ബന്ദികള്‍ മോചിതരായോ എന്ന്​ വ്യക്​തമല്ല. മൂന്നു പേര്‍ കൊല്ലപ്പെട്ടിട്ടുണ്ട്​. ഇവരില്‍ ഒരാള്‍ കവര്‍ച്ച സംഘത്തിലെ അംഗമാണെന്ന്​ പൊലീസ്​ പറയുന്നു.

ബാങ്കു കവര്‍ച്ച സംഭവങ്ങള്‍ അടുത്തിടെ വര്‍ധിച്ചുവരുന്ന ബ്രസീലിനെ ശരിക്കും മുള്‍മുനയിലാക്കിയാണ്​ കഴിഞ്ഞ ദിവസം രാത്രി വന്‍ കവര്‍ച്ച അരങ്ങേറിയത്​. 50​ലേറെ വരുന്ന സംഘം എത്തിയെന്നായിരുന്നു ആദ്യ റിപ്പോര്‍ട്ടുകളെങ്കിലും ഇത്​ 15-20 പേരാണെന്ന്​ ​പിന്നീട്​ പൊലീസ്​ തിരുത്തി. കൊള്ള വിഡിയോയില്‍ പകര്‍ത്തിയ ആളെ സംഘം വെടിവെച്ചുകൊന്നു. പൊലീസുമായി ഏറ്റുമുട്ടലിനിടെ കവര്‍ച്ച സംഘത്തിലെ ഒരാളും കൊല്ലപ്പെട്ടു. മൂന്നാമത്​ ഒരു സ്​ത്രീയുമാണ്​ മരണത്തിന്​ കീഴടങ്ങിയത്​.

സംഘം റോഡില്‍ വിതറിയ സ്​ഫോടക വസ്​തു പൊട്ടിത്തെറിച്ച്‌​ അതുവഴി സൈക്കിളില്‍ സഞ്ചരിച്ച ഒരാള്‍ക്ക്​ ഗുരുതരമായി പരിക്കേറ്റു. പട്ടണത്തിലുടനീളം സംഘം സ്​ഫോടക വസ്​തുക്കള്‍ ​സ്​ഥാപിച്ചത്​ അപകട ഭീഷണി ഉയര്‍ത്തുന്നതായി പൊലീസ്​ മുന്നറിയിപ്പ്​ നല്‍കി. മൂന്നു പേരെ അറസ്റ്റ്​ ചെയ്​തിട്ടുണ്ട്​.

ആക്രമണം നടന്നതിങ്ങനെ:

സര്‍വായുധ സജ്ജരായ സംഘം തിങ്കളാഴ്​ച പുലര്‍ച്ചെ സമയത്ത്​ അരാകറ്റുബ പട്ടണ മധ്യത്തില്‍ എത്തുന്നു. മൂന്നു ബാങ്കുകളില്‍ കവര്‍ച്ച പൂര്‍ത്തിയാക്കിയ സംഘം കാഴ്ച കണ്ടുനിന്ന നിരവധി പേരെ ബന്ദിയാക്കി. ഇതുകഴിഞ്ഞ്​ പ്രദേശത്തെ പൊലീസ്​ സ്​റ്റേഷനും സംഘം വളഞ്ഞു. പട്ടണത്തിലേക്ക്​ എത്താനുള്ള റോഡുകളില്‍ കാറുകള്‍ക്കും ടയറുകള്‍ക്കും തീയിട്ട്​​ ഗതാഗതം തടസ്സപ്പെടുത്തിയിരുന്നു. സുരക്ഷിതമെന്ന്​ ഉറപ്പുവരുത്താന്‍ ഇവര്‍ എത്തിയ കാറുകള്‍ക്ക്​ മുകളിലും ബോണറ്റിലും ആളുകളെ കെട്ടിയിട്ടായിരുന്നു മടക്കം. പലരെയും അപകടകരമായ നിലയിരുന്നു കെട്ടിയിട്ടത്​. ഇവരുമായി മടങ്ങുന്നതിനിടെ വെടിയൊച്ചകള്‍ കേള്‍ക്കുന്നുണ്ടായിരുന്നുവെന്ന്​ നാട്ടുകാര്‍ പറഞ്ഞു.

ജനം തെരുവിലിറങ്ങിയതിനാല്‍ പൊലീസിന്​ വേണ്ടത്ര ഇടപെടാന്‍ കഴിഞ്ഞില്ലെന്ന്​ സ്​ഥലം മേയര്‍ ഡിലാഡര്‍ ബൊര്‍ഹെസ്​ പറഞ്ഞു. പട്ടണത്തിന്‍റെ നിയന്ത്രണം തിരിച്ചുപിടിച്ചിട്ടുണ്ടെന്നും അദ്ദേഹം പറഞ്ഞു. ജനം ഭയന്നുപോയതിനാല്‍ സ്​കൂളുകള്‍ക്ക്​ അവധി നല്‍കിയിട്ടുണ്ട്​.

2017ലും ഇതേ പട്ടണത്തില്‍ സമാനമായ ആക്രമണവും കവര്‍ച്ചയും നടന്നിരുന്നു. 1920കളിലും 30കളിലും ബ്രസീലില്‍ പിടിമുറുക്കിയ പ്രത്യേക സംഘമായിരുന്ന 'കന്‍ഗാചോ' മാതൃകയിലാണ്​ പുതിയ കവര്‍ച്ചക​ളുമെന്ന്​ റിപ്പോര്‍ട്ടുകള്‍ പറയുന്നു. നിരവധി അക്രമികള്‍ ചേര്‍ന്നാകും ഇത്തരം കവര്‍ച്ചകള്‍ നടത്തുക. ബാങ്കുകളും വിലപിടിപ്പുള്ള വസ്​തുക്കള്‍ വില്‍ക്കുന്ന കടകളുമാകും ഇവരുടെ ലക്ഷ്യം.