ഡല്‍ഹിയിലെ വായുമലിനീകരണത്തിന്​ പരിഹാരമാകുന്നു; രാജ്യത്തെ ആദ്യ വായുശുദ്ധീകരണ​ ടവര്‍ സ്​ഥാപിച്ചു

ന്യൂഡല്‍ഹി: ഡല്‍ഹിയിലെ കൊണാട്ട് പ്ലേസില്‍ ഇന്ത്യയിലെ ആദ്യത്തെ വായു ശുദ്ധീകരണ ടവര്‍ മുഖ്യമന്ത്രി അരവിന്ദ് കെജ്​രിവാള്‍ ഉദ്ഘാടനം ചെയ്തു. ഒരു കിലോമീറ്റര്‍ ചുറ്റളവിലുള്ള 1,000 ക്യുബിക് മീറ്റര്‍ വായു ഓരോ സെക്കന്‍ഡിലും ശുദ്ധീകരിക്കാന്‍ ശേഷിയുള്ള സംവിധാനമാണ്​​ ഇവിടെ ഒരുക്കിയത്​.പ്രാരംഭ പദ്ധതിയായിട്ടാണ്​ ഇത്​ തുടങ്ങുന്നതെന്നും ഇതിന്‍റെ ആദ്യ ഫലങ്ങള്‍ ഒരു മാസത്തിനുള്ളില്‍ ലഭ്യമാകുമെന്നും കെജ്​രിവാള്‍ പറഞ്ഞു. പദ്ധതി വിജയകരമാണെങ്കില്‍ രാജ്യതലസ്ഥാനത്ത് കൂടുതല്‍ സ്മോഗ് ടവറുകള്‍ സ്ഥാപിക്കും.കൊണാട്ട് പ്ലേസിലെ ശിവാജി സ്റ്റേഡിയം മെട്രോ സ്റ്റേഷനു പിന്നിലായി 24.2 മീറ്റര്‍ ഉയരത്തിലാണ് ടവര്‍ നിര്‍മിച്ചത്. ടവറിന്‍റെ അടിയില്‍ മൊത്തം 40 ഫാനുകള്‍ സ്ഥാപിച്ചിട്ടുണ്ട്. മുകളില്‍നിന്ന് വായു വലിച്ചെടുത്ത് ശുദ്ധീകരിച്ച​ശേഷം​ താഴെയുള്ള ഫാനുകളിലൂടെ അന്തരീക്ഷത്തിലേക്ക്​ തന്നെ പുറത്തുവിടുന്നതാണ്​ ഇതിന്‍റെ പ്രവര്‍ത്തനം.
രണ്ട് വര്‍ഷത്തെ പ്രവര്‍ത്തനച്ചെലവ് ഉള്‍പ്പെടെ മൊത്തം പദ്ധതി ചെലവ് ഏകദേശം 20 കോടിയാണ്​ കണക്കാക്കുന്നത്​. ഡല്‍ഹി മലിനീകരണ നിയന്ത്രണ സമിതിയാണ്​ (ഡി.പി.സി.സി) ഇതിന്‍റെ നോഡല്‍ ഏജന്‍സി.
എത്രത്തോളം വായു ശുദ്ധീകരിക്കുമെന്ന പഠനം നടത്തുന്നത്​ ഡല്‍ഹി ഐ.ഐ.ടിയും ബോംബെ ഐ.ഐ.ടിയും ചേര്‍ന്നാണ്​. രണ്ട്​ വര്‍ഷത്തേക്കാണ്​ പഠനം. ഈ രണ്ട്​ സ്​ഥാപനങ്ങളും തന്നെയാണ്​ പദ്ധതിയുടെ സാങ്കേതിക ഉപദേഷ്ടാക്കള്‍.