സി.ബി.ഐയെ സ്വതന്ത്ര ഏജന്‍സിയാക്ക​ണമെന്ന്​ മദ്രാസ്​ ഹൈക്കോടതി

ചെന്നൈ: പാര്‍ലമെന്‍റിനു മുമ്ബില്‍ മാത്രം റിപ്പോര്‍ട്ട്​ ചെയ്യുന്ന സ്വതന്ത്ര ഏജന്‍സിയായി സെന്‍ട്രല്‍ ബ്യൂറോ ഓഫ്​ ഇന്‍വെസ്​റ്റിഗേഷനെ (സി.ബി.ഐ) മാറ്റണമെന്ന്​ മദ്രാസ്​ ഹൈക്കോടതി. ബി.ജെ.പി ഭരിക്കുന്ന കേ​ന്ദ്ര സര്‍ക്കാറിന്‍റെ കൈയിലെ പാവയായി മാറിയെന്ന്​ വ്യാപക വിമര്‍ശനം നിലനില്‍ക്കുന്നതിനിടെയാണ്​​ കടുത്ത ഭാഷയില്‍ വിമര്‍ശനവുമായി കോടതി എത്തിയത്​. ''പാര്‍ലമെന്‍റിനു മുമ്ബാകെ മാത്രം റിപ്പോര്‍ട്ട്​ ചെയ്യേണ്ട കംപ്​ട്രോളര്‍ ആന്‍റ്​ ഓഡിറ്റര്‍ ജനറലിന്​ സമാനമായി സി.ബി.ഐക്കും സ്വയംഭരണം നല്‍കണം''- കോടതി ആവശ്യപ്പെട്ടു. നിലവിലെ സംവിധാനത്തെ ഉടച്ചുവാര്‍ക്കാന്‍ അനിവാര്യമെന്നു കണ്ട്​ 12 ഇന നിര്‍ദേശങ്ങള്‍ മു​േമ്ബാട്ടുവെച്ച കോടതി 'ഇൗ ഉത്തരവ്​ കൂട്ടിലടചച തത്തയെ (സി.ബി.ഐയെ) മോചിപ്പിക്കാനുള്ള ശ്രമമാണെന്നും' കൂട്ടിച്ചേര്‍ത്തു. 2013ല്‍ സുപ്രീം കോടതിയാണ്​ സി.ബി.ഐയെ കൂട്ടിലടച്ച ത​ത്തയെന്ന്​ വിശേഷിപ്പിച്ചിരുന്നത്​. അന്നുപക്ഷേ, ബി.ജെ.പി പ്രതിപക്ഷത്തായിരുന്നു. കോണ്‍ഗ്രസ്​ ഏജന്‍സിയെ ഭരിക്കുന്നുവെന്നായിരുന്നു വിമര്‍ശനം.
അടുത്തിടെയായി പ്രതിപക്ഷത്ത്​ മമത ബാനര്‍ജി ഉള്‍പെടെ നിരവധി നേതാക്ക​ള്‍ക്കെതിരെയാണ്​ സി.ബി.ഐ അന്വേഷണം പ്രഖ്യാപിച്ചത്​. 1941ല്‍ സ്​ഥാപിച്ച ഏജന്‍സി നിലവില്‍ പ്രധാനമന്ത്രിയുടെ ഓഫീസിനു കീഴിലെ പഴ്​സണല്‍ വകുപ്പിനു മുമ്ബാകെയാണ്​ റിപ്പോര്‍ട്ട്​ ചെയ്യേണ്ടത്​. പ്രധാനമന്ത്രി, സുപ്രീം കോടതി ചീഫ്​ ജസ്റ്റീസ്​, പ്രതിപക്ഷ നേതാവ്​ എന്നിവരടങ്ങിയ മൂന്നംഗ പാനലാണ്​ തെരഞ്ഞെടുക്കുന്നത്​.