ഡെല്‍റ്റ വകഭേദം ആശങ്കയാകുന്നു; യു.എസില്‍ കോവിഡ് വാക്സിന്‍റെ ബൂസ്റ്റര്‍ ഡോസിന് എഫ്.ഡി.എ അനുമതി

രോഗപ്രതിരോധശേഷി കുറഞ്ഞവര്‍ക്ക് കോവിഡ് വാക്​സിന്‍റെ ബൂസ്റ്റര്‍ ഡോസ് നല്‍കാനുള്ള നീക്കങ്ങളുമായി യു.എസ്. ഡെല്‍റ്റ വകഭേദം പടരുന്നതിനിടെയാണ് യു.എസ്​ ഫുഡ്​ ആന്‍ഡ്​ ഡ്രഗ്​ അഡ്​മിനിസ്​ട്രേഷന്‍റെ (എഫ്.ഡി.എ) നിര്‍ണായക തീരുമാനം.

പുതിയ ഉത്തരവ് പ്രകാരം പ്രതിരോധശേഷി കുറഞ്ഞവര്‍ക്ക്​ ബൂസ്റ്റര്‍ ഡോസ്​ വാക്​സിന്‍ നല്‍കാന്‍ ഡോക്ടര്‍മാര്‍ക്ക്​ അനുമതിയുണ്ടാവുമെന്ന്​ എഫ്​.ഡി.എ കമീഷണര്‍ ഡോ.ജാനറ്റ്​ വുഡ്​കോക്ക്​ അറിയിച്ചു. അവയവമാറ്റ ശസ്​ത്രക്രിയക്ക്​ വിധേയമായവര്‍ക്കും മറ്റ്​ ഗുരുതര രോഗമുള്ളവര്‍ക്കുമാണ് ബൂസ്റ്റര്‍ ഡോസ്​ നല്‍കുകയെന്നാണ്​ സൂചന. അതായത്, ഇവര്‍ക്ക്​ ഫൈസര്‍ അല്ലെങ്കില്‍ മോഡേണ വാക്​സിന്‍റെ മൂന്നാം ഡോസു കൂടി സ്വീകരിക്കാം.

വാക്​സിന്‍ ഉപദേശക സമിതിയും എഫ്​.ഡി.എയും ഇന്ന്​ ചേരുന്ന അടിയന്തര യോഗത്തിലാണ് ഇതുസംബന്ധിച്ച അന്തിമ തീരുമാനമുണ്ടാവുക. അര്‍ബുദ, എയ്​ഡ്​സ്​ രോഗികള്‍ക്ക്​ കോവിഡ്​ വാക്​സിന്‍റെ ബൂസ്റ്റര്‍ ഡോസ്​ നല്‍കണമെന്ന്​ വൈറ്റ്​ ഹൗസ്​ ആരോഗ്യ ഉപദേഷ്​ടാവ് ഡോ. ആന്റണി ഫൗച്ചി ആവശ്യപ്പെട്ടിരുന്നു. വാക്‌സിനെടുത്ത എല്ലാവര്‍ക്കും ബൂസ്റ്റര്‍ ഡോസ് നല്‍കുന്നതിനെക്കാള്‍ പ്രാമുഖ്യം രോഗപ്രതിരോധ ശേഷി കുറഞ്ഞവര്‍ക്ക് ബൂസ്റ്റര്‍ ഡോസ് നല്‍കുന്നതിനാണെന്നായിരുന്നു ആന്റണി ഫൗച്ചി അഭിപ്രായപ്പെട്ടത്.

അതേസമയം, ലോകത്തെ വാക്​സിന്‍ ക്ഷാമം കണക്കിലെടുത്ത് ബൂസ്റ്റര്‍ ഡോസ്​ നല്‍കുന്നതില്‍ നിന്നും സമ്ബന്ന രാജ്യങ്ങള്‍ പിന്മാറണമെന്ന്​ ലോകാരോഗ്യ സംഘടന നിര്‍ദേശിച്ചിരുന്നു. എന്നാല്‍, ഡെല്‍റ്റ വകഭേദങ്ങളെ നേരിടാന്‍ മൂന്നാം ഡോസ് വാക്സിനുകള്‍ നല്‍കുന്നത് ഗുണകരമാകുമെന്ന പഠനങ്ങളുടെ അടിസ്ഥാനത്തില്‍ ഫ്രാന്‍സ്, ഇസ്രായേല്‍, ജര്‍മ്മനി തുടങ്ങിയ രാജ്യങ്ങള്‍ ബൂസ്റ്ററുകള്‍ നല്‍കാന്‍ തീരുമാനമെടുത്തിരുന്നു.