കാലിഫോര്‍ണിയയില്‍ ഹെലികോപ്റ്റര്‍ തകര്‍ന്ന് നാല് മരണം

കാലിഫോര്‍ണിയ: ഹെലികോപ്റ്റര്‍ തകര്‍ന്ന് അമേരിക്കയില്‍ നാലു പേര്‍ കൊല്ലപ്പെട്ടു. കാലിഫോര്‍ണിയയിലാണ് അപകടം നടന്നത്. ക്ലോസാ കൗണ്ടി മേഖലയിലാണ് ഇന്നലെ ഉച്ചയ്‌ക്ക് പ്രാദേശിക സമയം 1.15ന് അപകടം സംഭവിച്ചത്. കൗണ്ടി മേഖലയിലെ സാക്രാമെന്റോ എന്ന സ്ഥലത്താണ് ഹെലികോപ്റ്റര്‍ നിലംപതിച്ചത്. യാത്രചെയ്തിരുന്ന നാലുപേരും സംഭവസ്ഥലത്തു വച്ചു തന്നെ മരണപ്പെട്ടു. ഹെലികോപ്റ്റര്‍ അപകടത്തിന്റെ കാരണം വ്യക്തമായിട്ടില്ല. മരണപ്പെട്ടവരെ സംബന്ധിച്ച വിവരങ്ങളും പോലീസ് പുറത്തുവിട്ടിട്ടില്ല. ദേശീയപാത 45ന് സമീപത്താണ് ഹെലികോപ്റ്റര്‍ തകര്‍ന്നത്. കഴിഞ്ഞ വര്‍ഷം അമേരിക്കയുടെ ബാസ്‌ക്കറ്റ്‌ബോള്‍ ഇതിഹാസം കോബേ ബ്രയാന്റും മകളും കാലിഫോര്‍ണിയയില്‍ നടന്ന മറ്റൊരു ഹെലികോപ്റ്റര്‍ അപകടത്തിലാണ് മരണപ്പെട്ടത്.