മസ്​കത്ത്​: അറബിക്കടലില്‍ ഒമാന്‍ തീരത്ത്​ വ്യാഴാഴ്​ച ചരക്കു കപ്പല്‍ ആക്രമിക്കപ്പെട്ട സംഭവത്തിനു പിന്നില്‍ ഇറാനെന്ന്​ ഇസ്രായേല്‍. ലണ്ടന്‍ ആസ്​ഥാനമായ സോഡിയാക്​ മാരിടൈമിനായി സര്‍വീസ്​ നടത്തിയ എം.വി മെര്‍സര്‍ സ്​ട്രീറ്റാണ്​ വ്യാഴാഴ്ച ആക്രമിക്കപ്പെട്ടത്​. ഇസ്രായേല്‍ ശതകോടീശ്വരന്‍ ഇയാല്‍ ഒഫറിന്‍റെതാണ്​ സോഡിയാക്​ മാരിടൈം. രണ്ട്​ നാവികര്‍ സംഭവത്തില്‍ കൊല്ലപ്പെട്ടിരുന്നു.

ലൈബീരിയന്‍ പതാകയുള്ള ജപ്പാന്‍ കമ്ബനിയുടെ ഉടമസ്​ഥതയിലുള്ള​ കപ്പലിനു നേരെയുണ്ടായ ആക്രമണത്തിന്‍റെ വിശദ വിവരങ്ങള്‍ പുറത്തുവരുന്നേയുള്ളൂ. ഇസ്രായേല്‍ ആരോപണങ്ങളെ കുറിച്ച്‌​ ഇറാന്‍ ഔദ്യോഗികമായി പ്രതികരിച്ചിട്ടില്ല.

ഡ്രോണുകള്‍ ഉപയോഗിച്ചായിരുന്നു ആക്രമണമെന്ന്​ സുചനയുണ്ട്​. ബ്രിട്ടീഷ്​, റുമാനിയന്‍ പൗരന്മാരാണ്​ കൊല്ലപ്പെട്ടത്​.

യു.എസ്​ നാവിക സേനയുടെ സഹായത്തോടെ കപ്പല്‍ സുരക്ഷിത കേന്ദ്രത്തിലേക്ക്​ മാറ്റുകയാണെന്ന്​ കമ്ബനി വൃത്തങ്ങള്‍ അറിയിച്ചു. ആക്രമണം മേഖലയില്‍ പുതിയ സംഘര്‍ഷങ്ങള്‍ക്ക്​ തുടക്കമിടുമെന്ന ആശങ്ക ഉയര്‍ത്തിയിട്ടുണ്ട്​. ഇരുരാജ്യങ്ങള്‍ക്കുമിടയിലെ നിഴല്‍ യുദ്ധം കൂടുതല്‍ ശക്​തിയാര്‍ജിക്കാന്‍ ഇത്​ സഹായകമാകുമോ എന്നാണ്​ ലോകം ഉറ്റുനോക്കുന്നത്​. ആക്രമണത്തിനെതിരെ കടുത്ത പ്രതികരണം ആലോചിക്കുകയാണെന്നും ബ്രിട്ടീഷ്​ പ്രധാനമന്ത്രി ഡൊമിനിക്​ റാബുമായി വിഷയം ചര്‍ച്ച ചെയ്യുമെന്നും ഇസ്രായേല്‍ വിദേശകാര്യ മന്ത്രി യായര്‍ ലാപിഡ്​ പറഞ്ഞു. എന്നാല്‍, സിറിയയിലെ എയര്‍പോര്‍ട്ട്​ ആക്രമിച്ച ഇസ്രായേലിന്​ തിരിച്ചടിയാണ്​ കപ്പല്‍ ആക്രമണമെന്ന്​ ഇറാന്‍ ടെലിവിഷന്‍ പ്രതികരിച്ചു.

ടാന്‍സാനിയയി​ലെ ദാറുസ്സലാമില്‍നിന്ന്​ യു.എ.ഇയിലേക്ക്​ വരികയായിരുന്നു കപ്പല്‍. ഈ സമയം ചരക്കുണ്ടായിരുന്നില്ല.

ഇതേ സംഭവം നടന്നതിന്​ പരിസരത്ത്​ മുമ്ബും ഇറാന്‍, ഇസ്രായേല്‍ കപ്പലുകള്‍ ആക്രമിക്കപ്പെട്ടിട്ടുണ്ട്​. മൂന്നു വര്‍ഷത്തിനിടെ ഗള്‍ഫ്​ കടല്‍, ചെങ്കടല്‍, കിഴക്കന്‍ മെഡിറ്ററേനിയന്‍ കടലുകളില്‍ മാത്രം 150ലേറെ ആക്രമണങ്ങളാണ്​ നടന്നത്​. പക്ഷേ, ആളപായം അപൂര്‍വമാണ്​. അടുത്തിടെ ഇറാന്‍ എണ്ണക്കപ്പലിനു നേരെയുണ്ടായ ആക്രമണത്തില്‍ മൂന്നു പേര്‍ കൊല്ലപ്പെട്ടിരുന്നു. സമാന സംഭവത്തില്‍ ഇറാന്‍ നാവിക സേനയുടെ ഏറ്റവും വലിയ കപ്പല്‍ കഴിഞ്ഞ ജൂണില്‍ ഒമാനു സമീപം തീപിടിച്ച്‌​ മുങ്ങിയിരുന്നു.